ជ្រូកទឹកដែលបាត់ខ្លួនជាង១០ឆ្នាំ បានបង្ហាញវត្តមានក្នុងសមុទ្រកម្ពុជាឡើងវិញ ឯផ្សោតក៏កើនដែរក្នុងឆ្នាំ២០២៤
ភ្នំពេញ៖ ជ្រូកទឹកដែលបាត់ខ្លួនជាង១០ឆ្នាំ បានបង្ហាញវត្តមានក្នុងសមុទ្រកម្ពុជាឡើងវិញ។ ចំណែក ផ្សោតក៏មានកំណើនដែរនៅក្នុងឆ្នាំ២០២៤។ ការកើនឡើងគួរឱ្យកត់សម្គាល់នេះ កើតចេញពីការការពារ និងអភិរក្សធនធានជលផលបានល្អប្រសើរ។
របាយការណ៍សង្ខេបលទ្ធផលអនុវិស័យជលផលឆ្នាំ២០២៤ របស់រដ្ឋបាលជលផល បានបញ្ជាក់ថា នៅក្នុងឆ្នាំ២០២៤នេះ ជ្រូកទឹកជាច្រើន បានបង្ហាញវត្តមានក្នុងសមុទ្រកម្ពុជាឡើងវិញ បន្ទាប់ពីបាត់ខ្លួនជាង១០ឆ្នាំ។ ចំណែក ផ្សោតពណ៌ផ្កាឈូក និងក្បាលត្រឡោក ក៏កើនឡើងដែរ ក្នុងចំនួនជាង១០០ក្បាល។ ប្រភេទសត្វកម្រទាំងនេះ បង្ហាញខ្លួនញឹកញាប់នៅតំបន់ឆ្នេរ ពិសេសខេត្តកែប និងកំពត។
នៅក្នុងឆ្នាំដដែលនេះ ផ្សោតទន្លេមេគង្គកើតកូនបាន៩ក្បាល និងងាប់ទៅវិញ៤ក្បាល ដែលនាំឱ្យផ្សោតសព្វថ្ងៃមានប្រមាណ ១០៤ក្បាល។ លើសពីនោះ មន្រ្តីជំនាញផ្នែកអភិរក្ស ក៏រកឃើញសម្បុកអណ្តើកសមុទ្រចំនួន៣កន្លែង នៅកោះប៉ូឡូវ៉ៃ ក្នុងនោះញាស់កូនបាន៩០ក្បាល។ ជាមួយគ្នានេះ អាជ្ញាធរ និងពលរដ្ឋក៏បានលែង ត្រីរាជ១៦ក្បាល, ត្រីគល់រាំង៣៣ក្បាល, បបែលយក្សទឹកសាប១ក្បាល, កន្ទាយក្បាលកង្កែប២៣ក្បាល, អណ្តើកហ្លួង៤០ក្បាល និងអណ្តើកសមុទ្រ៤៤ក្បាល ទៅបឹងធម្មជាតិវិញផងដែរ។
នៅក្នុងពិធីបិទកិច្ចប្រជុំបូកសរុបការងារអនុវិស័យជលផល ឆ្នាំ២០២៤ និងលើកទិសដៅអនុវត្តឆ្នាំ២០២៥ កាលពីថ្ងៃទី២៥ ខែធ្នូ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការវិលត្រលប់មកវិញនូវជ្រូកទឹក និងប្រភេទធនធានកម្រងជិតផុតពូជទាំងអស់នេះ បានបង្ហាញថា សមុទ្រកម្ពុជាមានជម្រកសុវត្ថិភាព និងចំណីគ្រប់គ្រាន់ តាមរយៈការអភិរក្សធនធានជលផលបានល្អប្រសើរ ជាពិសេស ការពារបានស្មៅសមុទ្រ និងជម្រកត្រី ដែលជាចំណីរបស់ពួកវា។
ឯកឧត្តមរដ្ឋមន្ត្រី បានបន្ថែមថា ជាក់ស្ដែង ឥឡូវយើងថតបានជ្រូកទឹក ហើយពួកវាមកក្នុងចំនួនច្រើន និងច្រើនដង ដែលមានទាំងកូនទៀត។ មូលហេតុដែលពួកវាមក គឺមកពីការការពាររបស់យើងបានល្អ ដែលធ្វើឱ្យវាមានសេចក្ដីសុខ សុវត្ថិភាព និងអាហារគ្រប់គ្រាន់។ អាហារគ្រប់គ្រាន់នេះ កើតឡើងដោយយើងថែរក្សាស្មៅសមុទ្រ និងជម្រកត្រីមួយចំនួនបាន បង្កើតចំណីសម្រាប់ផ្សោត និងជ្រូកទឹក ៕
