ភ្លៀងធ្លាក់ខ្លាំងបណ្តាលឲ្យស្លាប់មនុស្សម្នាក់ និងរាប់ពាន់នាក់ត្រូវជម្លៀសខ្លួន នៅភាគខាងត្បូងប្រទេសថៃ

បាងកក៖ អាជ្ញាធរបានឲ្យដឹងថា គ្រោះទឹកជំនន់ដែលបង្កឡើង ដោយភ្លៀងធ្លាក់ចុះ យ៉ាងខ្លាំងរយៈពេល៣ថ្ងៃ បានបណ្តាលឲ្យស្លាប់មនុស្សម្នាក់ និងរាប់ពាន់នាក់ត្រូវបានជម្លៀសខ្លួន នៅភាគខាងត្បូង នៃប្រទេសថៃឡង់ដ៏ ដោយមានការព្យាករណ៍ថា នឹងមានភ្លៀងធ្លាក់ចុះជាច្រើនថ្ងៃទៀត ។

លោក Wasan Chaitaweewong ប្រធាននាយកដ្ឋានបង្ការ និងកាត់បន្ថយគ្រោះមហន្តរាយ នៅក្នុងតំបន់បាន ប្រាប់ដល់ទីភ្នាក់ងារ AFP ថា គ្រោះទឹកជំនន់បានសម្លាប់សិស្សសាលាម្នាក់នៅក្នុងខេត្ត Narathiwat និងបានជម្លៀសមនុស្សជាង២.៧០០នាក់ចេញតំបន់ងាយរងគ្រោះ ។
លោកបានបន្តឲ្យដឹងថា ភ្លៀងធ្លាក់ចុះអូសបន្លាយក៏បាន បង្ខំឱ្យផ្អាកដំណើរការ សាលាក្នុងស្រុកចំនួន ៦៥ផងដែរ ។

នាយកដ្ឋានឧតុនិយមរបស់ប្រទេសថៃឡង់ដ៏ បានឱ្យដឹងថា ការព្រមានអំពីភ្លៀងធ្លាក់ចុះខ្លាំងនៅតែជាធរមាន ដោយមានការព្យាករណ៍ថា នឹងមានភ្លៀងធ្លាក់ចុះជាបន្តបន្ទាប់ នៅទូទាំងខេត្តចំនួន៧០ភាគរយ រហូតដល់ដើមខែធ្នូ។

ក្រុមយោធា និងអ្នកស្ម័គ្រចិត្តជាង៥០០នាក់ត្រូវបានគេដាក់ ពង្រាយដើម្បីចែកអំណោយសង្គ្រោះ និងជួយជម្លៀសអ្នកស្រុកទៅ កាន់តំបន់សុវត្ថិភាព៕