ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា វិទ្យាស្ថានបច្ចេកវិទ្យាកម្ពុជា (សាលាតិចណូ) គ្មានការលក់ ឬដោះដូរឱ្យឯកជននោះឡើយ ពោលសាលានេះបានពង្រីកសាលារបស់ខ្លួន បន្ថែមនៅលើមហាវិថីឈ្នះឈ្នះ ដោយសារតែកំណើននិស្សិតជាលំដាប់។
ការបញ្ជាក់របស់សម្តេចបវរធិបតី ហ៊ុន ម៉ាណែត ធ្វើឡើងបន្ទាប់ពីកាលពីថ្ងៃទី៧ ខែវិច្ឆិកា VOD Khmer បានផ្សាយថា «វិទ្យាស្ថានបច្ចេកវិទ្យាកម្ពុជា ឬហៅកាត់ថា សាលាតិចណូ ត្រូវគេលក់ឱ្យឈ្មួញហើយ ក្រោមរូបភាពដោះដូរដី»។
ក្នុងឱកាសអញ្ជើញសម្ពោធ និងប្រសិទ្ធិនាមវិថីតេជោសន្តិភាពអង្កោល នៅខេត្តកែប នាថ្ងៃទី១១ ខែវិច្ឆិកា ឆ្នាំ២០២៤ សម្តេចបវរធិបតី ហ៊ុន ម៉ាណែត បានបញ្ជាក់ថថា«VOD ចេញមកថា រដ្ឋាភិបាលដោះដូរលក់តិចណូ អត់ទេ សាលាតិចណូនៅដដែលគ្រាន់តែសាលានេះ ឥឡូវសិស្សកើន ចឹងគេបង្កើតសាលាមួយទៀត នៅមហាវិថីឈ្នះឈ្នះ ដោយសារសាលានេះទើបបង្កើតសាលាថ្មីទៀត ស្រាប់តែ VOD ចេញផ្សាយថា រដ្ឋលក់ដីសាលាតិចណូ ហើយការផ្សាយគ្មានប្រភពព័ត៌មានច្បាស់»។
សម្តេចបវរធិបតី ហ៊ុន ម៉ាណែត បានលើកឡើងថា ចំពោះករណីនេះវិទ្យាស្ថានបច្ចេកវិទ្យា (តិចណូ) និងក្រសួងអប់រំ យុវជន និងកីឡា បានចេញមកបំភ្លឺចំពោះការចេញផ្សាយនូវព័ត៌មានក្លែងក្លាយនេះដើម្បីឱ្យមហាជនបានដឹងច្បាស់ ពីស្ថានរឿងពិតចំពោះភាពស្អាតស្អំរបស់សាលាផងដែរ។ សម្តេចយល់យល់ឃើញថា សម្រាប់ព័ត៌មានក្លែងក្លាយ គឺបានសាយភាយលឿនរហ័សជាងព័ត៌មានពិតប្រាកដ ខណៈព័ត៌មានពិតបែរជាមិនសូវមានការចូលមើលនោះទេ ចំណុចនេះបានធ្វើឱ្យប្រជាពលរដ្ឋទទួលបានព័ត៌មានមិនពិត និងបានផ្តល់ឱកាសដល់ជនខិលខូច បង្កើតព័ត៌មានក្លែងក្លាយបន្ថែមទៀត។
សម្តេចបបវរធិបតី ហ៊ុន ម៉ាណែត បានបន្ថែមថា ប្រជាពលរដ្ឋម្នាក់ៗមានសិទ្ធិអានព័ត៌មាន ដើម្បីទទួលបានព័ត៌មានពិតប្រាកដ ត្រូវបានបំផ្លាញដោយសារព័ត៌មានក្លែងក្លាយ (Fack News)។ ប្រជាពលរដ្ឋគ្រប់រូប គឺមានសិទ្ធិអាន មើល និងស្តាប់ព័ត៌មានមានប្រភពច្បាស់លាស់ ពិតប្រាកដ ដើម្បីបានដឹងពីស្ថានភាពជាក់ស្តែងនៅក្នុងប្រទេសរបស់ខ្លួន។
សម្តេចបវរធិបតី ហ៊ុន ម៉ាណែត សង្កត់ធ្ងន់ថា «VOD គឺរលាយអស់សិទ្ធិ ធ្វើសកម្មភាពនៅកម្ពុជា ហើយឥឡូវអត់ចោលសណ្តាន កាលពីមុនដោយសារតែដាក់ព័ត៌មានខុស (ក្លែងក្លាយ) វិជ្ជាជីវៈសារព័ត៌មានមិនមែនត្រូវគ្រប់ពេលនោះទេ ប៉ុន្តែនៅពេលដែលខ្លួនផ្សាយខុស ត្រូវផ្សាយចេញកែសម្រួល ពេលដែលខ្លួនដឹងការពិតយ៉ាង» ៕
