រុស្ស៊ី បាញ់បង្ហោះគ្រាប់រ៉ុក្កែត Soyuz ដឹកផ្កាយរណបរាប់សិបគ្រឿងទៅគន្លងតារាវិថី ក្នុងមាន ២គ្រឿងជារបស់អ៊ីរ៉ង់
មូស្គូ៖ រុស្ស៊ីបានបាញ់បង្ហោះគ្រាប់រ៉ុក្កែត Soyuz នៅព្រឹកថ្ងៃអង្គារទី៥ ខែវិច្ឆិកានេះ ដោយដឹកផ្កាយរណបចំនួនពីរដែលត្រូវបានរចនាឡើង ដើម្បីតាមដានអាកាសធាតុក្នុងលម្ហអាកាសជុំវិញផែនដី និងផ្កាយរណបតូចៗចំនួន៥៣គ្រឿងផ្សេងទៀត រួមទាំងផ្កាយរណបអ៊ីរ៉ង់ចំនួនពីរផងដែរ។ នេះបើតាមទីភ្នាក់ងារអវកាស Roscosmos របស់រុស្ស៊ី។
ទីភ្នាក់ងារអវកាសដដែលបានបង្ហាញថា យានអវកាស Soyuz-2.1 បានបង្ហោះចេញពីទីលានអវកាស Vostochny Cosmodrome របស់រុស្ស៊ី ដោយបានដឹកផ្កាយរណប Ionosfera-M ចំនួនពីរ នឹងក្លាយជាផ្នែកមួយនៃប្រព័ន្ធអវកាសសម្រាប់ត្រួតពិនិត្យស្រទាប់បរិយាកាសលើផែនដី លាតសន្ធឹងប្រហែល៨០ ទី៦៤៤គីឡូម៉ែត្រពីលើផ្ទៃផែនដី។ នេះបើយោងតាមព័ត៌មានផ្តល់នៅលើគេហទំព័ររបស់អង្គការណាសា(NASA)។
យោងតាមទីភ្នាក់ងារព័ត៌មាន Interfax ផ្កាយរណប Ionosfera-M នីមួយៗមានទម្ងន់៤៣០គីឡូក្រាម ហើយគន្លងគោចររបស់វា ស្ថិតនៅរយៈកម្ពស់ ៨២០គីឡូម៉ែត្រ។ ប្រព័ន្ធនេះនឹងរួមបញ្ចូលផ្កាយរណប Ionosfera-M សរុបចំនួនបួន។ ក្នុងចំណោមផ្កាយរណបតូចៗទាំង៥៣ មានផ្កាយរណបអ៊ីរ៉ង់ចំនួនពីរគឺផ្កាយរណប Kowsar ជាផ្កាយរណបចាប់រូបភាពច្បាស់ខ្លាំង និងផ្កាយរណប Hodhod ជាផ្កាយរណបទំនាក់ទំនងខ្នាតតូច។ ជាចុងក្រោយ ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍ថា រុស្ស៊ីកាលពីខែកុម្ភៈ បានបាញ់បង្ហោះផ្កាយរណបស្រាវជ្រាវរបស់អ៊ីរ៉ង់ ដែលនឹងស្កែនផ្ទៃប្រទេសអ៊ីរ៉ង់ពីគន្លងតារាវិថី៕
