រដ្ឋបាលខេត្តព្រៃវែង ចេញមកបញ្ជាក់ចំពោះការផ្សព្វផ្សាយតាមរយៈFacebook គណនីឈ្មោះ “អន ភារិ” ដែលថា ក្រុមហ៊ុនសាងសង់បានធ្វើការឈូសឆាយទៅលើដីកម្មសិទ្ធិរបស់ពួកគាត់ ដោយមិនទាន់បានទទួលប្រាក់សំណងនៅឡើយ

ភ្នំពេញ៖ រដ្ឋបាលខេត្តព្រៃវែង សូមជម្រាបជូនសាធារណជន ជ្រាបថា កាលពីថ្ងៃទី២៨ ខែសីហា ឆ្នាំ ២០២៤ តាមរយៈប្រព័ន្ធបណ្តាញសង្គម Facebook ដែលមានគណនីឈ្មោះ អន ភារិ បានផ្សព្វផ្សាយព័ត៌មានថា ក្រុមហ៊ុនសាងសង់បានធ្វើការឈូសឆាយទៅលើដីកម្មសិទ្ធិរបស់ពួកគាត់ ដោយមិនទាន់បានទទួលប្រាក់សំណង នៅឡើយ។

ពាក់ព័ន្ធករណីនេះរដ្ឋបាលខេត្តព្រៃវែង សូមជម្រាបជូនថា អនុគម្រោងសាងសង់ផ្លូវខេត្តលេខ ៣១២ នេះមានប្រជាពលរដ្ឋរងផលប៉ះពាល់សរុប ចំនួន៩៦៤គ្រួសារ ក្នុងនោះគិតត្រឹមបច្ចុប្បន្នមានប្រជាពលរដ្ឋចំនួន ៩៦២គ្រួសារ បានឯកភាពទទួលយកប្រាក់សំណងគោលនយោបាយ តាមអត្រាតម្លៃជំនួស លើកលែងតែគ្រួសារ ចំនួន២ប៉ុណ្ណោះ ដែលមិនទាន់ឯកភាពទទួលយកប្រាក់សំណងក្នុងនោះមានឈ្មោះដូចជា៖១-លោក អន ភារិ ភេទប្រុស ប៉ះពាល់ដីទំហំ ៣៦០,២១ ម៉ែត្រក្រឡា ២- លោកស្រី សន ចាន់ថ្លា ភេទស្រី ប៉ះពាល់ដីទំហំ ៣៣២,៧៧ ម៉ែត្រក្រឡា ដែលទីតាំងដីទាំងពីរខាងលើស្ថិតក្នុងភូមិសំពោង ឃុំបន្ទាយចក្រី ស្រុកព្រះស្តេច ខេត្តព្រៃវែង។

សូមជម្រាបជូនថាការទូទាត់សំណងនេះ ត្រូវបានធ្វើឡើងដោយផ្អែកតាមអត្រាតម្លៃជំនួសដែលបានសិក្សាដោយ ក្រុមហ៊ុនប្រកបដោយវិជ្ជាជីវៈ តាមប្រភេទដី ទំហំដី និងទីតាំងដែលរងផលប៉ះពាល់ជាក់ស្តែង។ ហើយកន្លងមក ករណីបងប្អូនប្រជាពលរដ្ឋទាំង២គ្រួសារ ខាងលើ ក្រុមការងារអន្តរក្រសួង បានសហការណ៍ជាមួយអាជ្ញាធរពាក់ព័ន្ធ បានធ្វើការអញ្ជើញពួកគាត់មកធ្វើការសម្របសម្រួលចំនួន៣លើក រួចមកហើយ។ លើកទី១ និងលើកទី ២ នៅ សាលាស្រុកព្រះស្តេច និងការចុះដល់ទីតាំងប៉ះពាល់តែម្តង និងលើកទី ៣ បានអញ្ជើញពួកគាត់មកធ្វើការសម្រប សម្រួលនៅសាលប្រជុំសាលាខេត្តព្រៃវែង ជាលទ្ធផលពួកគាត់មិនឯកភាពអត្រាតម្លៃ និងទាមទារតម្លៃខ្ពស់។

ផ្អែកតាមច្បាប់ និងលិខិតបទដ្ឋានគតិយុត្ត ព្រមទាំងនីតិវិធីការងារ និងដើម្បីបម្រើផលប្រយោជន៍សាធារណៈ និង ជៀសវាងការរាំងស្ទះដល់ការងារសាងសង់ កន្លងមករដ្ឋបាលខេត្តព្រៃវែង បានចេញលិខិត ជម្រាបជូនលោក អភិបាលស្រុកព្រះស្តេច ធ្វើការសហការណ៍ ជាមួយក្រុមការងារអន្តរក្រសួងដោះស្រាយផលប៉ះពាល់ ធ្វើការ ឈូសឆាយ ត្រឹមចំណុចរងផលប៉ះពាល់ ចំពោះប្រាក់ឧបត្ថម្ភគោលនយោបាយដោះស្រាយផលប៉ះពាល់ គណៈ កម្មការនៅតែរក្សាជំហរសម្របសម្រួលជូនដដែល ហើយពួកគាត់នៅតែមានសិទ្ធិអាចបន្តពាក្យបណ្តឹងតាមនីតិវិធី តុលាការបាន៕