នាយឧត្តមសេនីយ៍ ជួន សុវណ្ណ ណែនាំដល់អាជ្ញាធរពាក់ព័ន្ធគ្រប់លំដាប់ថ្នាក់ក្នុងខេត្តបន្ទាយមានជ័យ ត្រូវធ្វើការបិទទាំងស្រុងរាល់ល្បែងស៊ីសងខុសច្បាប់
ភ្នំពេញ៖ កាលពីរសៀលថ្ងៃទី២៨ ខែសីហា ឆ្នាំ ២០២៤ គណៈបញ្ជាការឯកភាពរដ្ឋបាលខេត្តបន្ទាយមានជ័យ ជាមួយក្រុមការងារពិសេសតាមដានការអនុវត្តគោលការណ៍របស់នាយករដ្ឋមន្ត្រីពាក់ព័ន្ធកិច្ចការសន្តិសុខ សណ្តាប់ធ្នាប់សង្គម បានបើកកិច្ចប្រជុំដែលប្រារព្ធធ្វើឡើង ក្រោមអធិបតីភាពឯកឧត្តម នាយឧត្តមសេនីយ៍ ជួន សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារពិសេសតាមដានការអនុវត្តគោលការណ៍របស់នាយករដ្ឋមន្ត្រីពាក់ព័ន្ធកិច្ចការ សន្តិសុខ សណ្តាប់ធ្នាប់សង្គម។
កិច្ចប្រជុំនេះក៏មានការអញ្ជើញចូលរួមពី ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ស្ថាប័នតុលាខេត្ត គណៈអភិបាលរងខេត្ត មេបញ្ជាការ កង កម្លាំង ទាំង៣ប្រភេទ អភិបាលក្រុង-ស្រុកទាំង៩ ប៉ុស្តិ៍ នគរបាល មេឃុំ-ចៅសង្កាត់ទាំង៦៧ទូទាំងខេត្ត ។
នាកាសនោះឯកឧត្តម អ៊ុំ រាត្រី ក៏បានមានមតិស្វាគមន៍យ៉ាង ចំពោះឯកឧត្តម នាយឧត្តមសេនីយ៍ ជួន សុវណ្ណ ព្រមទាំងប្រតិភូអមដំណើរ ដែលបានអញ្ជើញជាអធិបតី ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នោងបានលើកឡើងពីរបាយការណ៍សង្ខេប ដោយឯក ឧត្តម បានលើកឡើងថា នៅក្នុងភូមិសាស្រ្តខេត្តបន្ទាយមានជ័យ កន្លងមកមានទីតាំងអាជីវកម្មឆ្នោតឡូតូចំនួន៧៤កន្លែង ក្នុងចំណោមទីតាំងទាំង៧៤ខាងលើនេះ គឺបានបិទឈប់ដំណើរការទាំងស្រុង ត្រឹមថ្ងៃទី០៤ ខែមីនា ឆ្នាំ២០២៤ កន្លងមកនេះ។ ដោយឡែកទីតាំងអាជីវកម្មទទួលបញ្ចាំ និងទទួលប្រាតិភោគដោយអនុប្បទាន ដូចមានខាងក្រោម ១-ក្រុមហ៊ុន-សហគ្រាសមានអាជ្ញាបណ្ណពីក្រសួងសេដ្ឋកិច្ចនិងហិរញ្ញវត្ថុ ចំនួន១៦ ទីតាំង, ២-ក្រុមហ៊ុន-សហគ្រាសមានលិខិតអនុញ្ញាតពីមន្ទីរសេដ្ឋកិច្ចនិងហិរញ្ញវត្ថុចំនួន១៧ទីតាំង, ៣-ហាងបញ្ចាំពុំមានលិខិតអនុញ្ញាត ចំនួន១៩កន្លែង ហាងបញ្ចាំទាំងអស់នេះ ក្រុមការងារចម្រុះ បានចុះធ្វើកិច្ចសន្យាបិទទីតាំង រួចរាល់ហើយដែរ។
ឯកឧត្តមនាយឧត្តមសេនីយ៍ ជួន សុវណ្ណ បានថ្លែងថា យោងតាមបទបញ្ជាសម្តេចនាយករដ្ឋមន្រ្តី ហ៊ុន ម៉ាណែត រួចមក គណ:កម្មការគ្រប់គ្រងល្បែងពាណិជ្មកម្ម កម្ពុជា (គ ល ក) ត្រូវបិទ និងនិរាករណ៍ អាជ្ញាប័ណ្ណដែលជាអាជីវកម្មល្បែងឆ្នោតផ្សងសំណាង និងល្បែងស៊ីសងខុសច្បាប់គ្រប់ប្រភេទក្នុងទូទាំប្រទេស ពិសេសនៅភូមិសាស្ត្រខេត្តបន្ទាយមានជ័យ ព្រមទាំងជំរុញឲ្យអាជ្ញាធរពាក់ព័ន្ធគ្រប់លំដាប់ថ្នាក់ ចុះធ្វើបច្ចុប្បន្នភាពក្នុងខេត្ត និងធ្វើការបិទទាំងស្រុងរាល់ល្បែងខុសច្បាប់ទាំងអស់។
នាយឧត្តមសេនីយ៍ បានបន្តថា យើងមិនធ្វើតែរាល់ល្បែងខុសច្បាប់នោះទេ គឺត្រូវរួមគ្នាទប់ស្កាត់បទល្មើសចរាចរណ៍ បង្ការ បង្រ្កាប បទល្មើសផ្សេងទៀតដូចជា អ្នកចែកចាយគ្រឿងញៀន ក្មេងទំនើង ត្រូវដាក់ទោសឲ្យធ្ងន់បំផុត ដោយអនុវត្តតាមពាក្យស្លោក ៣កុំ ១រាយការណ៍គឺ ១៖កុំពាក់ព័ន្ធ ២៖កុំអន្តរាគមន៍ ៣៖កុំបន្ធូបន្ថយទោស (ជាសមត្ថកិច្ចតុលាការ) និង១ បើឃើញបទល្មើសហើយត្រូវរាយការណ៍ជូនសមត្ថកិច្ចបន្ទាន់។
នាយឧត្តមសេនីយ៍ បានបញ្ជាក់ថា៖ដើម្បីឲ្យការបង្រ្កាបមានប្រសិទ្ធភាពបំផុតនោះ គឺអាជ្ញាធរ សមត្ថកិច្ចពាក់ព័ន្ធតាមមូលដ្ឋាន មិនត្រូវពាក់ព័ន្ធជាមួយគ្រប់បទល្មើស ជាដាច់ខាតទើបការបង្រ្កាបនោះ មានតម្លាភាព ប្រសិទ្ធភាព ទប់ស្កាត់បានទាន់ពេលវេលា ធ្វើឲ្យគោលនយោបាយភូមិ សង្កាត់ មានសុវត្ថិភាពផងដែរ៕
