គណៈប្រតិភូគណៈកម្មការទី៦នៃរដ្ឋសភា ចុះស្វែងយល់ពីវឌ្ឍនភាពការងារ និងបញ្ហាប្រឈមនានាលើវិស័យទទួលបន្ទុករបស់គណៈកម្មការនៅខេត្តកំពត
ភ្នំពេញ៖ នៅរសៀលថ្ងៃទី៧ ខែសីហា ឆ្នាំ២០២៤ គណៈប្រតិភូគណៈកម្មការទី៦ នៃរដ្ឋសភា ដឹកនាំដោយ ឯកឧត្តម អង្គ វង្ស វឌ្ឍានា ប្រធានគណៈកម្មការ ព្រមទាំង អនុប្រធាន លេខាធិការ និងសមាជិក សមាជិកាគណៈកម្មការនីតិកម្ម និងយុត្តិធម៌ នៃរដ្ឋសភា (គណៈកម្មការទី៦) បានជួបប្រជុំពិភាក្សាការងារជាមួយថ្នាក់ដឹកនាំរដ្ឋបាលខេត្តកំពតដឹកនាំដោយ ឯកឧត្តមបណ្ឌិត ម៉ៅ ធនិន គណៈភិបាល និងជាអភិបាលខេត្តកំពត ឯកឧត្តម តាក ហាប់ ប្រធានក្រុមប្រឹក្សាខេត្ត ព្រមទាំងមន្ទីរពាក់ព័ន្ធជុំវិញខេត្ត នៅសាលាខេត្តកំពត។
ក្នុងជំនួបពិភាក្សាការងារជាមួយរដ្ឋបាលខេត្តកំពត ឯកឧត្តម អង្គ វង្ស វឌ្ឍានា បានមានប្រសាសន៍ថា បេសកកម្មរបស់គណៈកម្មការទី៦ មកកាន់ខេត្តកំពតនាពេលនេះ គឺដើម្បីសិក្សាស្វែងយល់ និងប្រមូលព័ត៌មានមួយចំនួន ពាក់ព័ន្ធនឹងវិស័យទទួលបន្ទុករបស់គណៈកម្មការ ដោយផ្ដោតលើវឌ្ឍនភាពការងារ ប្រសិទ្ធភាពនៃការអនុវត្តច្បាប់ លិខិតបទដ្ឋានគតិយុត្តិនានា និងបញ្ហាប្រឈមរបស់ខេត្ត ដែលពាក់ព័ន្ធនឹងសមត្ថកិច្ចដែលទទួលខុសត្រូវរបស់គណៈកម្មការ នៅក្នុងខេត្ត ដើម្បីរួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាឱ្យមានប្រសិទ្ធភាពខ្ពស់។
នារសៀលថ្ងៃដដែលនោះ គណៈកម្មការទី៦ នៃរដ្ឋសភា ក៏បានអញ្ជើញចុះមកសិក្សាស្វែងយល់ ជាមួយ ឯកឧត្តម លាង សំណាត់ ប្រធាន សាលាដំបូងខេត្តកំពតលើការអនុវត្តការងារ ពាក់ព័ន្ធវិស័យយុត្តិធម៌របស់សាលាដំបូង និងអយ្យការអមសាលាដំបូងខេត្តកំពតផងដែរ៕
