កម្លាំងនគរបាលខេត្តបន្ទាយមានជ័យ បង្ក្រាបជនសង្ស័យជួញដូរ និងប្រើប្រាស់គ្រឿងញៀនចំនួន ៦នាក់ និងវត្ថុតាងថ្នាំញៀនមេតំហ្វេតាមីន WY ចំនួន ៣.២៤៨គ្រាប់

ភ្នំពេញ៖ ដើម្បីភូមិ ឃុំ សង្កាត់ មានសុវត្ថិភាព កម្លាំងនគរបាលខេត្តបន្ទាយមានជ័យ ក្រោមការដឹកនាំរបស់លោកឧត្តមសេនីយ៍ទោសិទ្ធិ ឡោះ ស្នងការនគរបាលខេត្តបន្ទាយមានជ័យ បានយកចិត្តទុកដាក់ជាប្រចាំក្នុងការស៊ើបអង្កេតស្រាវជ្រាវបទល្មើសគ្រឿងញៀនតាមវិធានការជំនាញ ចាប់ពីទ្រង់ទ្រាយតូចដល់ទ្រង់ទ្រាយធំ។ ជាក់ស្តែងនៅរសៀលថ្ងៃទី៣០ ខែកក្កដា ឆ្នាំ២០២៤ កម្លាំងនគរបាលជំនាញបានបង្ហាញមុខសញ្ញាជនសង្ស័យ ចំនួន៦នាក់ ពាក់ព័ន្ធករណីជួញដូរនិងប្រើប្រាស់គ្រឿងញៀនប្រភេទមេតំហ្វេតាមីន ចំនួន៣.២៤៨គ្រាប់និងរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនិតិវិធី។

លោកឧត្តមសេនីយ៍ត្រី ធិន ស៊ិនដេត ស្នងការរងទទួលផែនការងារប្រឆាំងគ្រឿងញៀន បានឲ្យដឹងថា អនុវត្តាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលដោយ ឯកឧត្តមកើត វណ្ណារ៉េត ព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ។

ជាលទ្ធផល នៅវេលាម៉ោង១៣រសៀលថ្ងៃទី២៨ ខែកក្កដា ឆ្នាំ២០២៤ កម្លាំងនគរបាលផ្នែកប្រឆាំងគ្រឿងញៀននៃអធិការដ្ឋាននគរបាលកក្រុងប៉ោយប៉ែត បានសហការជាមួយមេសន្តិសុខកាស៊ីណូ ចុះបង្រ្កាបករណីជួញដូរគ្រឿងញៀននៅបន្ទប់ជួលយកន្លែង ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បានឃាត់ខ្លួនជនសង្ស័យចំនួន ៦នាក់ រួមទាំងវត្ថុតាងថ្នាំញៀនមួយចំនួនធំ។

លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត បានឲ្យដឹងថា ជនសង្ស័យទាំង៦នាក់ មានឈ្មោះ៖ ទី១.ឈ្មោះផូ សុភក្រ្ត  ភេទប្រុស អាយុ៣៩ឆ្នាំ , ទី២.ឈ្មោះគុណ សំបូរ ភេទប្រុស អាយុ៣៩ឆ្នាំ, ទី៣.ឈ្មោះ អុំ សុធាភេទប្រុសអាយុ៤២ឆ្នាំ, ទី៤.ចាប ថុនា ភេទប្រុសអាយុ២៦ឆ្នាំ, ទី៥.ពៅ សឿន ភេទប្រុស អាយុ២៤ឆ្នាំ និងទី៦.ឃីម សៅលិញ ភេទប្រុសអាយុ៣២ឆ្នាំ។

ក្នុងកិច្ចប្រតិបត្តិការនេះ កម្លាំងនរបាលស្រាវជ្រាវរកឃើញ វត្ថុតាងរួមមាន៖
១.ថ្នាំគ្រាប់ WY ចំនួន ៣.២៤៨គ្រាប់
២.ម្សៅក្រាមពណ៌ថ្លាសង្ស័យថ្នាំញៀនចំនួន ៣កូនថង់តូច
៣.ជញ្ជីងសម្រាប់ថ្លឹងថ្នាំញៀនចំនួន ១
៤.ទូរស័ព្ទដៃចំនួន ៣គ្រឿង
៥.កញ្ឆាក្រៀម ១កូនថង់។

បច្ចុប្បន្នជនសង្ស័យនិងវត្ថុតាងកម្លាំងនគរបាលជំនាញកំពុងរៀបចំសំណុំរឿងបញ្ជូនទៅសាលាដំបូងអនុវត្តតាមនិតិវិធី ៕