មន្ត្រីជាន់ខ្ពស់ក្រសួងធនធានទឹក ដឹកនាំគណៈប្រតិភូក្រុមបេសកកម្មធនាគារអភិវឌ្ឍន៍អាស៊ី (ADB) ចុះពិនិត្យវឌ្ឍនភាពគម្រោងដែលសម្រេចបាន ក្នុងភូមិសាស្ត្រខេត្តតាកែវ

ភ្នំពេញ៖ នៅថ្ងៃអាទិត្យ ២កើត ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៧ ខែកក្កដា ឆ្នាំ២០២៤នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំគណៈប្រតិភូក្រុមបេសកកម្មធនាគារអភិវឌ្ឍន៍អាស៊ី (ADB) មកពីទីស្នាក់ការកណ្តាលក្នុងទីក្រុងម៉ានីល ប្រទេសហ្វីលីពីន ចុះពិនិត្យវឌ្ឍនភាពការងារដែលបានអនុវត្តនាពេលកន្លងមកនៅតាមបណ្តាប្រព័ន្ធធារាសាស្ត្រ ក្នុងភូមិសាស្ដ្រខេត្តតាកែវ។

ក្នុងឱកាសនោះ ឯកឧត្តមរដ្ឋលេខាធិការ និងគណៈប្រតិភូ អមដំណើរដោយឯកឧត្តមជាថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តតាកែវ ព្រមទាំងសហការីជាតិ-អន្តរជាតិ បានអញ្ជើញចុះពិនិត្យវឌ្ឍនភាពគម្រោងអនុវត្តនាពេលកន្លងមក នៅក្នុងតំបន់ប្រព័ន្ធធារាសាស្រ្តប្រឡាយលេខ១៥ ប្រឡាយលេខ៨៧ ស្ថានីយបូមទឹកបំពាក់ដោយបច្ចេកទេសទំនើបពីប្រព័ន្ធប្រឡាយមេដល់ប្រព័ន្ធប្រឡាយជើងក្អែប និងប្រព័ន្ធធារាសាស្រ្តទំនប់អាងត្នោតទេរ ស្ថិតនៅក្រុងដូនកែវ ស្រុកអង្គរបូរី និងស្រុកទ្រាំង ខេត្តតាកែវ ដែលមានសក្តានុពលស្រោស្រពបានគ្រប់រដូវកាលលើផ្ទៃដីប្រមាណ ១៧,០០០ហិកតា។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា តំណាងគណៈប្រតិភូធនាគារអភិវឌ្ឍន៍អាស៊ី (ADB) បានបង្ហាញនូវការពេញចិត្តសប្បាយរីករាយ និងវាយតម្លៃខ្ពស់ចំពោះវឌ្ឍនភាពការងារដែលសម្រេចបានជោគជ័យដ៏ត្រចះត្រចង់ និងបានបញ្ជាក់ពីជំហរក្នុងការពង្រឹងពង្រីកនិងជំរុញការអនុវត្តផែនការកាងារមេរបស់ក្រសួងធនធានទឹក និងឧតុនិយមជាបន្តទៀត ដើម្បីធានាយ៉ាងណាឱ្យខេត្តតាកែវទទួលបាននូវសន្តិសុខទឹកពេញលេញ ៕