នាយឧត្តមសេនីយ៍ ប៉ោ ភក្តិ ដឹកនាំគណៈប្រតិភូជាន់ខ្ពស់ SOMTC-កម្ពុជា ចូលរួមកិច្ចប្រជុំពិគ្រោះយោបល់ជាមួយដៃគូសន្ទនា បូកបី
ភ្នំពេញ៖ នៅថ្ងៃទី២៧-២៨ ខែមិថុនា ឆ្នាំ២០២៤ នៅរដ្ឋធានីវៀងចន្ទន៍ សាធារណរដ្ឋប្រជាមានិតឡាវ ឯកឧត្តមនាយឧត្តមសេនីយ៍ ប៉ោ ភក្តិ រដ្ឋលេខាធិការក្រសួងមហាផ្ទៃ និងជាប្រធាន SOMTC-កម្ពុជា បានបន្តដឹកនាំគណៈប្រតិភូជាន់ខ្ពស់ SOMTC-កម្ពុជា ចូលរួមកិច្ចប្រជុំពិគ្រោះយោបល់ជាមួយដៃគូសន្ទនា បូកបី ចិន ជប៉ុន កូរ៉េ អូស្រ្តាលី អាមេរិក EU ឥណ្ឌា នូវែលណេឡង់ និងកាណាដា។
បន្ថែមពីនេះ ក្នុងនាមជាប្រទេសសម្របសម្រួលជាមួយសហព័ន្ធរុស្ស៊ី ឯកឧត្តមនាយឧត្តមសេនីយ៍ បានធ្វើជាសហប្រធានជាមួយរុស្ស៊ី ដឹកនាំកិច្ចប្រជុំពិគ្រោះយោបល់ SOMTC + រុស្ស៊ី លើកទី១៦។
ក្នុងកិច្ចប្រជុំ ប្រទេសសមាជិកអាស៊ាន និងដៃគូសន្ទនា បានផ្លាស់ប្ដូរទស្សនទៅវិញទៅមក លើកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែនកន្លងមក និងពិភាក្សាបន្តពង្រឹងកិច្ចសហប្រតិបត្តិការបន្ថែម ស្របតាមក្របខណ្ឌកិច្ចសហប្រតិបត្តិការរបស់ ASEAN SOMTC និងប្រទេសដៃគូនីមួយៗ។
ក្រៅពីចូលរួម និងធ្វើជាសហប្រធានដឹកនាំកិច្ចប្រជុំផ្លូវការខាងលើ ឯកឧត្តមនាយឧត្តមសេនីយ៍ បានទទួលជួបពិភាក្សាការងារទ្វេភាគីជាមួយឧត្តមមន្ត្រីនៃប្រទេសចំនួន ៤ ដូចខាងក្រោម៖
១. លោក Hyung Won KIM ប្រធាននាយកដ្ឋានកិច្ចការព្រហ្មទណ្ឌអន្តរជាតិ ក្រសួងយុត្តិធម៌ នៃសាធារណៈរដ្ឋកូរ៉េ។ ភាគីទាំងពីរ បានពិភាក្សាអំពីបញ្ហានានា ពាក់ព័ន្ធនឹងការជួយគ្នាទៅវិញទៅមកផ្នែកច្បាប់ (MLAT) និងការធ្វើបត្យាប័ន រវាងកម្ពុជា និងកូរ៉េ។
២. លោក Brandon P. Yoder អនុប្រធាននាយកដ្ឋានប្រឆាំងគ្រឿងញៀន និងការអនុវត្តច្បាប់អន្តរជាតិ នៃក្រសួងការបរទេសសហរដ្ឋអាមេរិក។ ភាគីទាំងពីរ បានពិភាក្សាអំពីតួនាទីរបស់កម្ពុជា ក្នុងនាមជាប្រទេសសម្របសម្រួលជាមួយសហរដ្ឋអាមេរិក (២០២៤-២០២៧) និងការជួយគាំទ្ររបស់សហរដ្ឋអាមេរិកសម្រាប់ SOMTC ក៏ដូចជាអាស៊ាន លើវិស័យអាទិភាពមួយចំនួន ព្រមទាំងការគាំទ្រដល់ការបណ្ដុះបណ្ដាលការអនុវត្តច្បាប់/វិស័យកិច្ចសហប្រតិបត្តិការនានារវាងអាស៊ាន និងសហរដ្ឋអាមេរិក ។
៣. លោក Vladimir SALOV អនុប្រធាននាយកដ្ឋានទទួលបន្ទុកដោះស្រាយបញ្ហាប្រឈម និងការគំរាមកំហែងថ្មីៗ នៃក្រសួងការបរទេសរុស្ស៊ី។ ភាគីរុស្ស៊ី បានថ្លែងអំណរគុណកម្ពុជា ក្នុងនាមជាប្រទេសសម្របសម្រួលរយៈពេលបីឆ្នាំកន្លងមកនេះ ព្រមទាំងទទួលសំណើរបស់កម្ពុជា បន្តផ្ដល់ការបណ្ដុះបណ្ដាលដល់កងកម្លាំងនគរបាលជាតិកម្ពុជា និងអាស៊ាន។
៤. ឯកឧត្ដម ឧត្ដមសេនីយ៍ទោ ស៊ុលិណៈ កែវប៉ៈស៊ើត នាយកខុទ្ទកាល័យនៃក្រសួងសន្តិសុខសាធារណៈ និងជាប្រធាន SOMTC-ឡាវ។ ភាគីទាំងពីរ បានពិភាក្សាការងារ និងផ្លាស់ប្ដូរយោបល់អំពីកិច្ចសហប្រតិបត្តិការនានា ក្នុងនាមជាប្រទេសជិតខាង ជាពិសេសការប្រយុទ្ធប្រឆាំងនឹងបទល្មើសគ្រឿងញៀន ការឆបោកតាមអនឡាញ ការជួញដូរ និងការរត់ពន្ធមនុស្ស៕
