ក្រសួងបរិស្ថាន គាំទ្រឱ្យមានការវិនិយោគ ដែលជួយការពារនិងអភិរក្សធនធម្មជាតិ និងលើកកម្ពស់ជីវភាពសហគមន៍

ភ្នំពេញ៖ នៅថ្ងៃទី០៦ ខែឧសភា ឆ្នាំ២០២៤ ឯកឧត្តម សាន វណ្ណទី រដ្ឋលេខាធិការប្រចាំការក្រសួងបរិស្ថាន បានអញ្ជើញទទួលជួបសំណេះសំណាល និងពិភាក្សាការងារ ជាមួយប្រតិភូក្រុមហ៊ុនជប៉ុន MIRATH Agri Tech ដែលបានសម្រេចបោះទុនវិនិយោគ បើករោងចក្រកែច្នៃគ្រាប់ស្វាយចន្ទី និងសំបកស្វាយចន្ទីទៅជាប្រេងជីវឥន្ធនៈ។ រោងចក្រនេះ មានសមត្ថភាពកែច្នៃស្វាយចន្ទី ១៥០០តោនក្នុងមួយឆ្នាំ នៅខេត្តកំពង់ធំ។

ឯកឧត្តម សាន វណ្ណទី បានថ្លែងសាទរចំពោះគម្រោងវិនិយោគកែច្នៃគ្រាប់ស្វាយចន្ទី និងសំបកស្វាយចន្ទី បង្កើតជាថាមពលស្អាត ដើម្បីជំរុញការវិនិយោគបៃតង ស្របតាមយុទ្ធសាស្រ្តបញ្ចកោណ របស់រាជរដ្ឋាភិបាលកម្ពុជានីតិកាលទី៧នៃរដ្ឋសភា។

ឯកឧត្តមរដ្ឋលេខាធិការប្រចាំការ បានមានប្រសាសន៍ថា ក្រសួងបរិស្ថាន បានសម្តែងការគាំទ្រ និងលើកទឹកចិត្ត៖
១).គាំទ្រគម្រោងវិនិយោគ ដែលអាចជួយទាំងកំណើនសេដ្ឋកិច្ចសង្គម សេដ្ឋកិច្ចគ្រួសារ និងពិសេសជួយលើកកម្ពស់ដល់ជីវភាពសហគមន៍មូលដ្ឋាន។
២).លើកទឹកចិត្តឱ្យក្រុមហ៊ុនចូលរួម សហការជាមួយក្រសួង ស្ថាប័នពាក់ព័ន្ធ ដើម្បីជួយការពារ និងអភិរក្សធនធានធម្មជាតិ ជាពិសេសសម្រេចគោលដៅមុំយុទ្ធសាស្រ្ត ស្អាត បៃតង និងចីរភាព នៃយុទ្ធសាស្រ្តចក្រាវិស័យបរិស្ថាន។
៣).ធានាការគោរពគោលការណ៍ដែលពាក់ព័ន្ធនឹងវិស័យបរិស្ថានប្រកបដោយប្រសិទ្ធភាព ៕