សម្ដេចតេជោ និងប្រមុខការពារជាតិអាមេរិក ផ្លាស់ប្ដូរទស្សនៈគ្នាទៅវិញទៅមកលើបញ្ហា សង្រ្គាមរវាងរុស្ស៊ី-អ៊ុយក្រែន ជម្លោះរវាងប៉ាឡេស្ទីន-អ៊ីស្រាអែល និងតំបន់សមុទ្រចិនខាងត្បូង

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងឯកឧត្ដម ឡយ ជេម អូស្ទីន III (Lloyd James Austin III) រដ្ឋមន្ត្រីការពារជាតិសហរដ្ឋអាមេរិក បានផ្លាស់ប្ដូរទស្សនៈគ្នាទៅវិញទៅមកលើបញ្ហា សង្រ្គាមរវាងរុស្ស៊ីនិងអ៊ុយក្រែន ជម្លោះរវាងប៉ាឡេស្ទីន និងអ៊ីស្រាអែល និងតំបន់សមុទ្រចិនខាងត្បូងផងដែរ។

នៅថ្ងៃទី៤ ខែមិថុនា ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន បានអនុញ្ញាតឱ្យ ឯកឧត្ដម ឡយ ជេម អូស្ទីន III (Lloyd James Austin III) រដ្ឋមន្ត្រីការពារជាតិសហរដ្ឋអាមេរិក ចូលជួបសម្ដែងការគួរសម និង ពិភាក្សាការងារ នៅវិមានព្រឹទ្ធសភា រាជធានីភ្នំពេញ។

ទាក់ទងបញ្ហានៅក្នុងតំបន់សមុទ្រចិនខាងត្បូង សម្ដេចតេជោប្រធានព្រឹទ្ធសភា បានលើកឡើងថាដើម្បីឱ្យមានសន្តិភាព ស្ថិរភាព នៅក្នុងតំបន់នោះ ភាគីពាក់ព័ន្ធទាំងអស់ត្រូវ៖
ទី១)គោរពឲ្យបានម៉ឺងម៉ាត់នូវកិច្ចព្រមព្រៀងDOC
ទី២)ភាគីដែលមានជម្លោះត្រូវដោះស្រាយជាមួយគ្នា
ទី៣) ធ្វើយ៉ាងណាឱ្យសម្រេចនូវកិច្ចព្រមព្រៀង COC ដែលភាគីកម្ពុជាបានខិតខំចង់ឲ្យសម្រេចបានកាលពីឆ្នាំ ២០២២ នៅពេលដែលកម្ពុជា ជាប្រធានអាស៊ាន ដើម្បីធានាសន្តិសុខ សុវត្ថិភាព យូរអង្វែងក្នុងតំបន់។

លើបញ្ហាសង្គ្រាមរវាងអ៊ុយក្រែននិងរុស្ស៊ី និងជម្លោះនៅមជ្ឈិមបូព៌ា សម្ដេចតេជោប្រធានព្រឹទ្ធសភា និងឧត្តមអូស្ទីន បានឯកភាពគ្នាថា សង្រ្គាមមិនអាចបញ្ចប់សង្គ្រាមបានទេ គឺត្រូវតែមានដំណោះស្រាយតាមការចរចារ ពិសេសក៏បានឯកភាពគ្នាទៅលើដំណោះស្រាយរដ្ឋពីរសម្រាប់មជ្ឈិមបូព៌ា ដែលនឹងផ្ដល់នូវសុខសន្តិភាពយូរអង្វែងសម្រាប់អ៊ីស្រាអ៊ែល និងប៉ាឡេស្ទីន ៕