រដ្ឋមន្ត្រីកសិកម្ម បង្ហាញមោទកភាពចំពោះពលរដ្ឋកម្ពុជា ដែលអាចផលិតកសិកម្ម (ស្បៀង) បំពេញតម្រូវការក្នុងស្រុក និងអាចនាំចេញទៅក្រៅប្រទេស
ភ្នំពេញ៖ ថ្លែងក្នុងពិធីបើកពិព័រណ៍កសិកម្ម «ភូមិកសិផលខ្មែរ» និងវេទិកាពិភាក្សា «រសជាតិកសិផល» ដែលមានរយៈពេលពីរថ្ងៃចាប់ពីថ្ងៃទី១ ដល់ថ្ងៃទី២ ខែមិថុនា ឆ្នាំ២០២៤នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រជាកសិករកម្ពុជា បានខិតខំប្រឹងប្រែងផលិតកសិកម្ម ដើម្បីទ្រទ្រង់ដល់ការផ្គត់ផ្គង់ស្បៀងអាហារទីផ្សារក្នុងស្រុក និងឈានដល់ការនាំចេញទៅក្រៅប្រទេស។
វេទិកាពិភាក្សា «រសជាតិកសិផល» គឺបានរៀបចំឡើង ដើម្បីបំផុសស្មារតីជាតិនិយម ជួយដល់កសិករខ្មែរ និងជំរុញការគាំទ្រកសិផលខ្មែរឱ្យកាន់តែខ្លាំងក្លាបន្ថែមទៀត ក្នុងចំណោមតួអង្គពាក់ព័ន្ធទាំងអស់ ជាពិសេសអ្នកទទួលទាន និងអ្នកប្រើប្រាស់។ ឯកឧត្តមរដ្ឋមន្ត្រី មានប្រសាសន៍ថា ក្នុងចំណោមផលិតផលកសិកម្មទាំងអស់ ប្រជាកសិករកម្ពុជា បានផលិតកសិកម្មអាហារមានបរិមាណប្រមាណ៨,៤លានតោន ដែលអាចផ្កត់ផ្គងទីផ្សារក្នុងស្រុក និងបាននាំចេញទៅកាន់ទីផ្សារក្រៅប្រទេសជាច្រើន ស្របពេលដែលបណ្តាប្រទេសជុំវិញពិភពលោក កំពុងជួបនូវវិបត្តិនានាពីការប្រែប្រួលអាកាសធាតុ និងកង្វះស្បៀងអាហារដោយសារសង្គ្រាមជាដើម។
ឯកឧត្តមរដ្ឋមន្ត្រី បានឱ្យដឹងបន្តថា ប្រទេសកម្ពុជាមិនត្រឹមតែអាចធានាបាននូវសន្តិសុខស្បៀងពេញលេញសម្រាប់ប្រជាជននៅទូទាំងប្រទេសប៉ុណ្ណោះទេ ប៉ុន្តែកម្ពុជាក៏អាចមានលទ្ធភាពនាំចេញចែកចាយទៅកាន់ទីផ្សារអន្តរជាតិក្នុងបរិមាណមួយច្រើនគួរសមផងដែរ។
ឯកឧត្តមរដ្ឋមន្ត្រី បញ្ជាក់យ៉ាងដូច្នេះថា៖«កម្ពុជាយើងបាននាំចេញផលិតផលកសិកម្មជាង៨,៤លានតោន ដែលរួមមាន៖ ស្រូវអង្ករ ចន្ទី ដំឡូងមី ម្រេច ចេក ស្វាយ មៀនប៉ៃលិនជាដើម»។ ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ បានសហការយ៉ាងជិតស្និទ្ធជាមួយអង្គការស្បៀង និងកសិកម្មរបស់សហប្រជាជាតិ ហៅកាត់ថា (FAO) ដើម្បីលើកកម្ពស់ប្រព័ន្ធស្បៀងអាហារឱ្យកាន់តែប្រសើរឡើង ស្របទៅតាមគោលដៅដែលបានគ្រោងទុក ដោយក្នុងនោះ យើងសម្រេចបានលើភាពល្អប្រសើរឡើងទាំង៤រួមមាន៖ «ផលិតកម្មកាន់តែប្រសើរ, អាហារូបត្ថម្ភកាន់តែប្រសើរ, ជីវិតរស់នៅកាន់តែប្រសើរ, និងបរិស្ថានកាន់តែប្រសើរ»។
សូមបញ្ជាក់ផងដែរថា នៅថ្ងៃនៃពិធីបើកពិព័រណ៍កសិកម្ម «ភូមិកសិផលខ្មែរ» និងវេទិកាពិភាក្សា «រសជាតិកសិផល» លោកជំទាវទី១នៃកម្ពុជា បណ្ឌិត ពេជ ចន្ទមុន្នី ហ៊ុន ម៉ាណែត បានអំពាវនាវ និងរំឭកដល់ថ្នាក់ដឹកនាំ គណៈប្រតិភូធំៗដែលបានធ្វើដំណើរចេញទៅក្រៅប្រទេស ត្រូវគិតគូរនាំយកផលិតផលកសិកម្មខ្មែរទៅជាមួយ ដើម្បីធ្វើជាអំណោយផ្ញើដល់បណ្តាប្រទេសដទៃ ដែលជាការជួយផ្សព្វផ្សាយពីផលិតផលខ្មែរទៅកាន់ឆាកអន្តរជាតិ។
លោកជំទាវបណ្ឌិត បានថ្លែងថា៖«នាងខ្ញុំបានពិភាក្សាជាមួយ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម យើងគួរតែរៀបចំឱ្យមានគ្រាប់ស្វាយចន្ទី មានអ្វីផ្សេងទៀត ដែលជាផលិតផលក្នុងស្រុកយើង ដើម្បីជូនជាកាដូ ជូនទៅគាត់ [ប្រតិភូក្រៅប្រទេស] ហើយយើងក៏នឹងដឹងថា ពេលដែលគាត់បានភ្លក់ គាត់ដឹងថា នេះគឺជាផលិតផលកសិផលរបស់ខ្មែរ! ពេលខ្លះត្រឡប់មកវិញ ឬមួយក៏គាត់បានស្គាល់ក្រុមហ៊ុនណានៅក្នុងស្រុករបស់គាត់ គឺគាត់ទទួលថា ខ្មែរយើងមានផលិតផលដែលល្អចឹង គឺគាត់អាចនឹងទាក់ទងមក» ៕
