ឯកឧត្ដម ខូវ ឆាយ ជឿជាក់ថា វត្តមានស្ដេចប្រដាល់ Manny Pacquiao ជាការទទួលស្គាល់របស់គុនខ្មែរ ទៅលើឆាកអន្ដរជាតិ កាន់តែមានវិសាលភាពធំជាងមុន
ភ្នំពេញ៖ ស្ដេចប្រដាល់សកលពិភពលោក Manny Pacquiao នឹងធ្វើដំណើរទស្សនកិច្ចលើកទី២ នៅកម្ពុជា ក៏ដូចជាអញ្ជើញជាភ្ញៀវកិត្តិយសចូលរួមទស្សនាការប្រកួតកីឡាប្រដាល់គុនខ្មែរ ក្នុងព្រឹត្តិការណ៍សង្វៀនហនុមានគុនខ្មែរ នៅទីក្រុងកោះពេជ្រ នាថ្ងៃទី៣១ ខែឧសភា ឆ្នាំ២០២៤ សប្ដាហ៍នេះ។
ជុំវិញវត្តមានរបស់ស្ដេចប្រដាល់ ដែលជានិមិត្តរូបនៃប្រទេសហ្វីលីពីន មកកាន់ទឹកដីកម្ពុជា បានធ្វើឲ្យឯកឧត្ដម ខូវ ឆាយ ប្រធានសហព័ន្ធកីឡាប្រដាល់គុនខ្មែរ សម្ដែងការស្វាគមន៍ និងមានក្ដីរំភើបឥតឧប្បមា បន្ទាប់ពីទទួលបានព័ត៌មានថា ក្រៅពីដំណើរទស្សនកិច្ច Manny Pacquiao នឹងផ្ដល់កិត្តិយសចូលរួមទស្សនាផ្ទាល់ នៃការប្រកួតកីឡាប្រដាល់គុនខ្មែរ ។ ឯកឧត្ដមបានចាត់ទុកនេះ គឺជាព្រឹត្តិការណ៍ប្រវត្តិសាស្ដ្រថ្មីមួយ ដែលនឹងជំរុញវិសាលភាព «គុនខ្មែរ» កាន់តែល្បីល្បាញលើឆាកអន្ដរជាតិ។
ឯកឧត្ដម ខូវ ឆាយ បានគូសបញ្ជាក់ថា «នេះគឺជាព្រឹត្តិការណ៍មួយដ៏វិសេសវិសាល ហើយព្រឹត្តិការណ៍នេះ ក៏កម្រនឹងកើតមានក្នុងប្រវត្តិសាស្ដ្រគុនខ្មែរយើង ដែលទទួលនូវវត្ដមានរបស់កំពូលស្ដេចប្រដាល់ដ៏ល្បីល្បាញលើពិភពលោក ។ នេះជារឿងមួយ ដែលអាចធ្វើឲ្យគុនខ្មែរយើង កាន់តែរីកចម្រើនឈានទៅមុខ ដោយសារយើងឃើញថា សូម្បីតែកំពូលស្ដេចប្រដាល់សកលលើពិភពលោក ក៏ទទួលស្គាល់នូវគុនខ្មែរយើង ហើយអញ្ជើញមកចូលរួមជាភ្ញៀវកិត្តិយស និងទស្សនាផ្ទាល់ការប្រកួតរបស់យើងដែរ»។
ប្រធានសហព័ន្ធដដែលបន្ដថា Manny Pacquiao គឺជាស្ដេចប្រដាល់ ដែលពិភពលោកទទួលស្គាល់ ហើយមានប្រជាពលរដ្ឋគ្រប់ប្រទេសលើពិភពលោក ភាគច្រើនក៏ស្គាល់លោកដែរ ។ ពេលគេស្គាល់ គេនឹងតាមដានរាល់សកម្មភាពរបស់លោក ពិសេសសារព័ត៌មានធំៗលើពិភពលោក កំឡុងពេលលោកធ្វើដំណើរទស្សនកិច្ចក្នុងប្រទេសកម្ពុជា ក៏ដូចជាទស្សនាការប្រកួតគុនខ្មែរ ក៏នឹងមានតាមដាន និងចុះផ្សាយច្រើនដែរ ។ ទាំងនេះ គឺផលវិជ្ជមាន ដែលនឹងជះឥទ្ធិពលលើវិស័យកីឡាប្រដាល់គុនខ្មែរ។
ឯកឧត្ដម ខូវ ឆាយ បានបង្ហាញសុទិដ្ឋិនិយមថា «ខ្ញុំជឿជាក់ថា វត្តមានរបស់គាត់(Manny Pacquiao) នឹងជះឥទ្ធិពលវិជ្ជមាន ឬក៏ថា ជាការទទួលស្គាល់របស់គុនខ្មែរយើងទៅលើឆាកអន្ដរជាតិ កាន់តែមានវិសាលភាពធំជាងមុន មានន័យថា ប្រទេសមួយចំនួន ដែលមិនធ្លាប់ស្គាល់គុនខ្មែរ នឹងចាប់ផ្ដើមមកស្គាល់ និងកស្វែងយល់ពីគុនខ្មែរ តាមរយៈវត្តមានលោក Manny Pacquiao ព្រោះបើពួកគាត់ស្គាល់ និងគាំទ្រ Manny Pacquiao ។ អ៊ីចឹងគាត់ច្បាស់ជាស្គាល់ពីគុនខ្មែរយើង តាមរយៈលោក Manny Pacquiao នេះដែរ»។
ទន្ទឹមជាមួយព្រឹត្តិការណ៍ប្រដាល់គុនខ្មែរ ដែលនឹងមានវត្តមានកំពូលអ្នប្រដាល់សកលអាជីពអង្គុយទស្សនាផ្ទាល់នេះដែរ ឯកឧត្ដម ខូវ ឆាយ បានជំរុញឲ្យដៃគូសហការ ជាពិសេសមន្ដ្រីបច្ចេកទេស និងកីឡាករគុនខ្មែរ រៀបចំ និងធ្វើការប្រកួតឲ្យកាន់តែពិសេស ដើម្បីជាការទទួលស្វាគមន៍លោក Manny Pacquiao ក៏ដូចជាការបង្ហាញទៅលើឆាកអន្ដរជាតិឲ្យបានឃើញពីសិល្បៈក្បា់ចគុនបុរាណខ្មែរដ៏ល្អផូផង់នាឱកាសផងដែរ។
ឯកឧត្ដម ខូវ ឆាយ បន្ថែមថា «ក្នុងនាមសហព័ន្ធ យើងបានផ្ដែផ្ដាំដល់កីឡាករ ត្រូវប្រកួតបញ្ចេញឲ្យអស់ពីសមត្ថភាព និងប្រកបដោយក្រមសីលធម៌ និងវិជ្ជាជីវៈខ្ពស់ ក្នុងនាមជាកីឡាករគុនខ្មែរ ទោះបីចាញ់-ឈ្នះ ក្នុងស្មារតីកីឡា ។ យើងក៏បានផ្ដាំផ្ញើដល់មន្ដ្រីបច្ចេកទេសរៀបចំការប្រកួតទាំងអស់ ធ្វើយ៉ាងម៉េចអនុវត្តការងារប្រកបដោយវិជ្ជាជីវៈខ្ពស់ ក៏ដូចជាការទទួលខុសត្រូវខ្ពស់បំផុត ដើម្បីឲ្យទទួលបានការសាទរអំពីអន្ដរជាតិ ក៏ដូចជាបងប្អូនប្រជាពលរដ្ឋខ្មែរ ដែលគាំទ្រវិស័យកីឡាប្រដាល់គុនខ្មែរទូទាំងប្រទេស ក៏ដូចជាក្រៅប្រទេសផង»។
គួរដឹងថា Manny Pacquiao ធ្លាប់បានអញ្ជើញទស្សនកិច្ចនៅប្រទេសកម្ពុជាម្ដងមកហើយ កំឡុងអមដំណើរទស្សនកិច្ចផ្លូវការរបស់លោក Rodrigo Duterte អតីតប្រធានាធិបតីហ្វីលីពីន កាលពីឆ្នាំ១៣ ខែធ្នូ ឆ្នាំ២០១៦ ។ ក្រៅពីអាជីពប្រដាល់ សព្វថ្ងៃបុរសវ័យ ៤៥ឆ្នាំរូបនេះ ក៏ជាសមាជិកព្រឹទ្ធសភាហ្វីលីពីនផងដែរ។
ចំពោះកម្មវិធីប្រកួតហនុមានគុនខ្មែរ នាថ្ងៃទី៣១ ខែឧសភា ឆ្នាំ២០២៤ នៅទីក្រុងកោះពេជ្រ ឆាប់ៗខាងមុខនេះ នឹងមានកីឡាករលំដាប់កំពូលកម្ពុជា ៣រូប ត្រូវប្រកួតមិត្តភាពអន្ដរជាតិ រួមមានកីឡាករ ពេជ្រ សម្បត្តិ, យ៉េន ឌីណា និង ភក្ដី គុនខ្មែរ ។ រីឯកីឡាករគុនខ្មែរ ៤រូបទៀត ត្រូវប្រកួតម៉ារ៉ាតុង ដើម្បីឈានទៅដណ្ដើមខ្សែក្រវាត់ អមប្រាក់រង្វាន់ ២០លានរៀល ក្នុងនោះមានកីឡាករ អេ អាំម៉ារីនភូថង ត្រូវជួបសិស្សច្បង សូត្រ វាសនា និងកីឡាករ ឡុង សំណាង ជួបកីឡាករ ផាន់ គ្រាន់៕
