ឯកឧត្តម សួស ប្រាថ្នា៖ ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលកើតឡើងពីការបោះឆ្នោត ជាតំណាងសាធារណៈ និងជាអ្នកការពារ បម្រើផលប្រយោជន៍របស់ពលរដ្ឋទាំងអស់ ក្នុងដែនសមត្ថកិច្ចរបស់ខ្លួន

ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងបញ្ជាក់ថា ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលកើតឡើងពីការបោះឆ្នោត គឺជាតំណាងសាធារណៈ និងជាអ្នកការពារ បម្រើផលប្រយោជន៍របស់ប្រជាពលរដ្ឋទាំងអស់ក្នុងដែនសមត្ថកិច្ចរបស់ខ្លួន។

ថ្លែងក្នុងឱកាសអញ្ជើញបើកកិច្ចប្រជុំស្តីពីការផ្សព្វផ្សាយកិច្ចការត្រៀមចូលកាន់តំណែង
ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ នាថ្ងៃទី២៧ ខែឧសភា ឆ្នាំ២០២៤ ឯកឧត្តម សួស ប្រាថ្នា បានមានប្រសាសន៍ថា ការដាក់ចេញនូវសេចក្តីណែនាំស្តីពីបទបញ្ជាផ្ទៃក្នុង(ថ្មី) និងប្រកាសស្តីពីការចូលកាន់តំណែង និងកិច្ចប្រជុំសាមញ្ញលើកទី១ លើកទី២ របស់ក្រុមប្រឹក្សា គឺជាឯកសារគតិយុត្តមួយដ៏សំខាន់សម្រាប់ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សខណ្ឌ ប្រើប្រាស់ជាមូលដ្ឋានក្នុងការរៀបចំដីកាបទបញ្ជាផ្ទៃក្នុង និងរបៀបរបបធ្វើការរបស់ខ្លួនឲ្យស្របតាមច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ និងលិខិតបទដ្ឋានគតិយុត្តនានា ព្រមទាំងធានាឲ្យដំណើរការកិច្ចប្រជុំរបស់ក្រុមប្រឹក្សាប្រព្រឹត្តទៅដោយរលូន មានសង្គតិភាពជាមួយនីតិវិធីច្បាប់កំណត់។

ឯកឧត្ដមបន្ថែមថា ផ្អែកតាមស្មារតីនៃអនុក្រឹត្យលេខ២១៥ និងអនុក្រឹត្យលេខ២១៦ អនក្រ.បក ចុះថ្ងៃទី១៤ ខែធ្នូ ឆ្នាំ២០០៩ ស្តីពីតួនាទី ភារកិច្ច និងទំនាក់ទំនង​ការងាររវាងក្រុមប្រឹក្សា គណៈអភិបាល ក្រុមប្រឹក្សាមានសិទ្ធិអំណាច២ គឺសិទ្ធិអំណាចធ្វើសេចក្តីសម្រេចខាងបញ្ញត្តិ និងសិទ្ធិអំណាចធ្វើសេចក្តីសម្រេចខាងប្រតិបត្តិ។ ក្នុងការអនុវត្តសិទិ្ធអំណាចរបស់ខ្លួន ក្រុមប្រឹក្សាត្រូវធ្វើឡើងតាមរយៈកិច្ចប្រជុំក្រុមប្រឹក្សា ដែលជាកិច្ចប្រជុំសាមញ្ញ ត្រូវរៀបចំឡើងរៀងរាល់ខែស្របតាមការអនុម័តរបស់ក្រុមប្រឹក្សា ឬកិច្ចប្រជុំវិសាមញ្ញ ឬកិច្ចប្រជុំសម្ងាត់ទៅតាមស្ថានភាពជាក់ស្តែងនៃតម្រូវការកិច្ចប្រជុំ ហើយកិច្ចប្រជុំក្រុមប្រឹក្សា អាចយកជាការបានលុះត្រា តែកិច្ចប្រជុំនោះប្រព្រឹត្តទៅត្រឹមត្រូវតាមបទបញ្ជាផ្ទៃក្នុងនៃក្រុមប្រឹក្សានីមួយៗ។

ឯកឧត្ដម សួស ប្រាថ្នា គូសបញ្ជាក់ថា ដូច្នេះ នៅក្នុងកិច្ចប្រជុំសាមញ្ញលើកទី១ ក្រុមប្រឹក្សាអាណត្តិទី៤ នឹងត្រូវអនុវត្តនូវកិច្ចការសំខាន់ចំនួនបី ក្នុងរបៀបវារៈកិច្ចប្រជុំសាមញ្ញរបស់ខ្លួន ដែលរួមមាន (ទីមួយ) ធ្វើការផ្សព្វផ្សាយសេចក្តីណែនាំរបស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុងរបស់ក្រុមប្រឹក្សា និងគំរូបទបញ្ជាផ្ទៃក្នុងរបស់ក្រុមប្រឹក្សា (ទីពីរ)ផ្តួចផ្តើមរៀបចំសេចក្តីព្រាងប្រតិទិនកិច្ចប្រជុំសាមញ្ញរបស់ខ្លួន (ទីបី)សេចក្តីរាយការណ៍អំពីលទ្ធផលការងារនៅក្នុងអាណត្តិទី៣ ការងារសេសសល់ និងទិសដៅ ការងារបន្តរយៈពេល៣ខែដោយអភិបាលរាជធានី ខេត្ត ក្រុង ស្រុក ខណ្ឌ និង (ទី៤)បញ្ហាផ្សេងៗ។ ប៉ុន្តែនៅក្នុងកិច្ចប្រជុំសាមញ្ញលើកទី១នេះ ក្រុមប្រឹក្សាមិនត្រូវអនុម័តកិច្ចការណាមួយនោះឡើយ។ ដោយឡែក សម្រាប់កិច្ចប្រជុំសាមញ្ញលើកទី២ ក្រុមប្រឹក្សាត្រូវអនុម័តឲ្យបាននូវឯកសារសំខាន់ៗ ចំនួន៣ គឺ៖ កំណត់ ហេតុកិច្ចប្រជុំលើកទី១, ដីកាស្តីពីបទបញ្ជាផ្ទៃក្នុង និងប្រតិទិនកិច្ចប្រជុំសាមញ្ញរបស់ខ្លួន ៕