ឯកឧត្តមបណ្ឌិត ជាម ច័ន្ទសោភ័ណ ណែនាំឲ្យក្រុមការងារគណបក្សចុះមូលដ្ឋានឃុំទាំង១៤ ក្នុងស្រុកមេមត់ បន្តពង្រឹង និងពង្រីកសមាជិក រក្សាសាមគ្គីភាពផ្ទៃក្នុង ក្តាប់ឲ្យបានបញ្ហា ដោះស្រាយរាល់សំណើរសំណូមពលរដ្ឋ បន្តការអភិវឌ្ឍន៍ក្នុងមូលដ្ឋាន

ភ្នំពេញ៖ ឯកឧត្តមបណ្ឌិត ជាម ច័ន្ទសោភ័ណ សមាជិកគណៈកម្មាធិការគណបក្សថ្នាក់កណ្តាល ជាប្រធានគណៈកម្មាធិការគណបក្សខេត្ត និងជាប្រធានក្រុមការងារគណបក្សចុះមូលដ្ឋានស្រុកមេមត់ បានណែនាំឲ្យក្រុមការងារគណបក្សចុះមូលដ្ឋានឃុំទាំង១៤ ក្នុងស្រុកមេមត់ បន្តពង្រឹង និងពង្រីកសមាជិក រក្សាសាមគ្គីភាពផ្ទៃក្នុងរចនាសម្ព័ន្ធ ក្តាប់ឲ្យបាននិងដោះស្រាយរាល់សំណើរសំណូមពលរដ្ឋ ជាពិសេសបន្តការអភិវឌ្ឍន៍ក្នុងមូលដ្ឋាន។

ឯកឧត្តមបណ្ឌិត ជាម ច័ន្ទសោភ័ណ បានមានប្រសាសន៍បែបនេះ ក្នុងឱកាសអញ្ជើញជាអធិបតីក្នុងពិធីប្រកាសក្រុមការងារគណបក្សចុះមូលដ្ឋានឃុំទាំង១៤ ក្នុងស្រុកមេមត់ នៅស្នាក់ការគណបក្សប្រជាជនស្រុកមេមត់ នាព្រឹកថ្ងៃទី១១ ខែឧសភា ឆ្នាំ២០២៤។

ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានប្រគល់សេចក្តីសម្រេចតែងតាំងប្រធាន អនុប្រធាន និងសមាជិកសមាជិកា ក្រុមការងារគណបក្ស ប្រជាជន ចុះមូលដ្ឋាន ឃុំទាំង១៤ ក្នុងស្រុកមេមត់ ព្រមទាំងសាទរចំពោះក្រុមការងារទាំងអស់ ៤៥៧នាក់ ផងដែរ។

ឯកឧត្តមបណ្ឌិតប្រធានក្រុមការងារគណបក្សចុះមូលដ្ឋានស្រុកមេមត់ បានផ្តាំផ្ញើសមាជិកសមាជិកាទាំង១៤ឃុំ បន្តផ្សព្វផ្សាយ យុទ្ធសាស្ត្រ បច្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត។ ជាពិសេសត្រូវស្រុះស្រួលឯកភាព ប្រកបដោយឆន្ទៈមុតស្រួច បន្តពង្រឹងកិច្ចការងាររចនាសម្ព័ន្ធ ត្រូវមានរបបជីវភាពប្រជុំប្រចាំខែ ដើម្បីដឹងសកម្មភាពអ្វីខ្លះ បានដឹងសំណូមពរពលរដ្ឋ ដើម្បីដោះស្រាយ។

ឯកឧត្តមបណ្ឌិត ជាម ច័ន្ទសោភ័ណ បានបន្ថែមថា ចំពោះបញ្ហាដោះបានដោះ តែដោះមិនបាន សូមផ្តល់ព័ត៌មានមកក្រុមការងារថ្នាក់ខេត្ត គឺនៅចាំជួយគាំទ្រ។ ព្រមទាំង ក្រើនរំលឹក ត្រូវតែរក្សាខ្សែក្រវ៉ាត់ឲ្យបាន បន្តយកឲ្យសម្លេងគាំទ្រមិនឲ្យមានការថមថយនោះទេ។

ជាចុងក្រោយ ឯកឧត្តមបណ្ឌិតប្រធានគណៈកម្មាធិការគណបក្សខេត្ត បានគូសបញ្ជាក់បន្ថែមថា ចំពោះអ្នកដែលមិនគាំទ្របក្សប្រជាជនយើង មួយចំនួនតូចនោះ កុំប្រងើយកន្តើយ កុំបោះបង់ ត្រូវបន្តចុះសួរសុខទុក្ខ ឲ្យដូចសមាជិកយើង ដើម្បីទាញយកសមានចិត្តពួកគាត់ ឲ្យងាកមកគាំទ្រ ព្រោះជាពលរដ្ឋកម្ពុជា សុទ្ធសឹងមានឈាមជ័រខ្មែរដូចគ្នា ដែលយើងត្រូវរួមរួមគ្នា បង្ហាញឲ្យយល់ច្បាស់ពីគោលនយោបាយយ៉ាងល្អប្រពៃ របស់គណបក្សប្រជាជនកម្ពុជា ៕