ឯកឧត្តម ជាម យៀប អញ្ជើញពិនិត្យមើលវឌ្ឍនភាពការសាងសង់ផ្លូវបេតុងអាមេប្រវែង ២,១០០ម៉ែត្រ នៅស្រុកពាមរក៍ ខេត្តព្រៃវែង
ភ្នំពេញ៖ នាព្រឹកថ្ងៃទី១១ ខែឧសភា ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវសិរីចរណវិសុទ្ធិអគ្គមហាឧបាសិកាពុទ្ធសាសនូបត្ថម្ភក៍ ហាក់ ជូ បានអញ្ជើញពិនិត្យមើលវឌ្ឍនភាពការសាងសង់ផ្លូវបេតុងអាមេប្រវែង ២,១០០ម៉ែត្រ ស្ថិតនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង។
ផ្លូវបេតុងអាមេប្រវែង ២,១០០ម៉ែត្រ ចាប់ពីខ្លោងទ្វារវត្តពោសិរីអណ្តែត ហៅវត្តព្រែកចាម រហូតដល់ភូមិព្រែកចាម ដែលមានប្រវែង ២,១០០ម៉ែត្រ បានប្រារព្ធបើកការដ្ឋានសាងសង់កាលពីថ្ងៃទី៨ ខែមីនា ឆ្នាំ២០២៤ មកទល់ពេលនេះបានប្រមាណ៥០%ហើយ និងកម្មករកំពុងមមាញឹកដើម្បីធ្វើផ្លូវនេះឱ្យបានចប់សព្វគ្រប់មុនរដូវវស្សា។
សូមបញ្ជាក់ថា ផ្លូវបេតុងអាមេនេះ ជាគំនិតផ្តួចផ្តើមរបស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវសិរីចរណវិសុទ្ធិអគ្គមហាឧបាសិកាពុទ្ធសាសនូបត្ថម្ភក៍ ហាក់ ជូ និងសប្បុរសជននានា ជូនប្រជាពលរដ្ឋនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង ដើម្បីរួមចំណែកកសាងហេដ្ឋារចនាសម្ព័ន្ធនៅថ្នាក់មូលដ្ឋានឱ្យមានការអភិវឌ្ឍរីកចម្រើនថែមទៀត។
ឯកឧត្តមកិត្តិសេដ្ឋាបណ្ឌិត ជាម យៀប បានស្នើសុំឱ្យមេការ និងកម្មករធ្វើផ្លូវ ជួយចាក់ដីអោយមានកម្ពស់ខ្ពស់ជាងនីវូទឹកដើម្បីរក្សាភាពរឹងមាំរបស់ផ្លូវធានាបានស្តង់ដារឹងមាំយូរអង្វែង ៕
