ឯកឧត្តមសាស្រ្តាចារ្យ យីត ស៊ុនណារ៉ា អញ្ជើញបើកសិក្ខាសាលាស្តីពី សមិទ្ធផលរយៈពេល៥ឆ្នាំ និងផែនការបន្ត របស់សាកលវិទ្យាល័យវិទ្យាសាស្ត្រសុខាភិបាល

ភ្នំពេញ៖ នៅព្រឹកថ្ងៃទី៤ ខែមេសា ឆ្នាំ២០២៤ ឯកឧត្តមសាស្រ្តាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល តំណាងដ៏ខ្ពង់ខ្ពស់ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញចូលរួមជាអធិបតីក្នុងពិធីបើកសិក្ខាសាលាស្តីពី សមិទ្ធផលរយៈពេល៥ឆ្នាំ (២០១៩-២០២៣) និងផែនការឆ្នាំ២០២៤ របស់សាកលវិទ្យាល័យវិទ្យាសាស្ត្រសុខាភិបាល (ស.វ.ស) នៅសណ្ឋាគារសិង្គហមិត្ត ខេត្តកែប។

ក្នុងនាមក្រសួងសុខាភិបាល ឯកឧត្តមសាស្រ្តាចារ្យ បានវាយតម្លៃខ្ពស់ចំពោះភាពរីកចម្រើនឈានឡើងរបស់ ស.វ.ស ពីមួយឆ្នាំទៅមួយឆ្នាំ។ ឯកឧត្តមសាស្រ្តាចារ្យបានជំរុញអង្គសិក្ខាសាលាចូលរួមពិភាក្សាឱ្យបានផុសផុល ដើម្បីផ្តល់ជាធាតុចូលសម្រាប់សៀវភៅសមិទ្ធផលឆ្នាំ២០១៩-២០២៣ ឱ្យកាន់តែមានគុណភាពសមស្រប ឆ្លើយតបនឹងភាពជាក់ស្តែង។

ឯកឧត្តមក៏បានផ្តល់នូវអនុសាសន៍គន្លឹះជូនស.វ.ស ក្នុងការរៀបចំផែនការយុទ្ធសាស្រ្តថ្មី និងផែនការឆ្នាំ២០២៤ ដោយអនុលោមតាមផែនការយុទ្ធសាស្រ្តរបស់ក្រសួងសុខាភិបាល និងគោលការណ៍ណែនាំផ្សេងៗរបស់រាជរដ្ឋាភិបាល។

ក្នុងរយៈពេល៥ឆ្នាំ កន្លងមកនេះ ស.វ.ស សម្រេចបានសមិទ្ធផលធំៗជាច្រើន រួមមានទាំងការអភិវឌ្ឍកម្មវិធីសិក្សាថ្មី កែសម្រួលកម្មវិធីសិក្សាដែលមានស្រាប់ផ្តោតលើសមត្ថភាព អភិវឌ្ឍឧបករណ៍គរុកោសល្យនានា និងឧបករណ៍វាយតម្លៃនិស្សិត ការពង្រឹងគុណភាពកម្មសិក្សានិស្សិត ពង្រឹងនិងពង្រីកការងារស្រាវជ្រាវ នវានុវត្តន៍ និងការផ្តល់សេវា។ ជាពិសេស ស.វ.ស ទទួលបានការទទួលស្គាល់គុណភាពពេញសិទ្ធ រយៈពេល៥ឆ្នាំ ពីឆ្នាំ២០១៩ ដល់ឆ្នាំ២០២៣ និងការទទួលបានការវាយតម្លៃក្នុងចំណាត់ថ្នាក់ ៥១-១០០ ក្នុងចំណោមសាកលវិទ្យាល័យលើពិភពលោកសម្រាប់ “Innovation in student mobility and Openness” ពី The World University Rankings for Innovation (The WURI) ក្នុងឆ្នាំ២០២២ និងឆ្នាំ២០២៣។ ស.វ.ស បានផលិតធនធានមនុស្ស ក្នុងវិស័យសុខាភិបាល សរុបចំនួន ៥,៥៤៥ នាក់ (ស្រី ២,៨៧១ នាក់) ក្នុងនោះ ៩៧% មានការងារធ្វើ។

សូមបញ្ជាក់ផងដែរថា អង្គសិក្ខាសាលានេះមានការអញ្ជើញចូលរួមពីសំណាក់ ឯកឧត្តមសាស្រាចារ្យ អ៊ុង សំអាន អនុរដ្ឋលេខាធិការក្រសួងសុខាភិបាល ឯកឧត្តមសាស្រ្តាចារ្យ សាផុន វឌ្ឍនៈ សាកលវិទ្យាធិការស.វ.ស ថ្នាក់ដឹកនាំ មន្រ្តីរាជការ និងបុគ្គលិកនៃស.វ.ស និងភ្ញៀវកិត្តិយស ដៃគូអភិវឌ្ឍជាតិ-អន្តរជាតិ សរុបប្រមាណ ១០០នាក់៕