អណ្តើកហ្លួង ឬអណ្តើកសរសៃ ១៥ក្បាល ក្នុងនោះញី ១២ក្បាល ត្រូវបានលែងចូលទៅក្នុងជម្រកធម្មជាតិ នៃប្រព័ន្ធព្រែកស្រែអំបិល

ភ្នំពេញ៖ កាលពីថ្ងៃទី៣១ ខែមីនា ឆ្នាំ២០២៤ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ តំណាងដោយលោកអ៊ុក វិបុល ប្រធាននាយកដ្ឋានអភិរក្សជលផល អង្គការសមាគមន៍អភិរក្សសត្វព្រៃតំណាងដោយលោក Alistair Mould នាយកអង្គការដៃគូអភិរក្ស Mandai Nature លោកស្រី អ៊ី នារីណេត អភិបាលរងខេត្តកោះកុង លោកស្រី Ann Marie Lauritsen តំណាងឲ្យ US Fish Wildlife Service រួមទាំងអាជ្ញាធរមូលដ្ឋានបានលែងអណ្តើកហ្លួង ឬអណ្តើកសរសៃ ចំនួន១៥ក្បាល ដែលក្នុងនោះញី១២ក្បាល ចូលទៅក្នុងជម្រកធម្មជាតិនៃប្រព័ន្ធព្រែកស្រែអំបិល។

អណ្តើកហ្លួងដែលលែងនេះ មានបំពាក់នូវឧបករណ៍តាមដាន ដើម្បីសម្គាល់និងតាមដានការបន្លាស់ទីរបស់វា។

អណ្តើកហ្លួង (Southern River Terrapin) ត្រូវបានចុះក្នុងបញ្ជីក្រហម IUCN Red List ជាប្រភេទសត្វជិតផុតពូជ ហើយត្រូវបានគេជឿថាបានផុតពូជម្តងរួចមកហើយ រហូតត្រូវបានរកឃើញឡើងវិញតាមប្រព័ន្ធព្រែកស្រែអំបិល ក្នុងឆ្នាំ២០០០។

លទ្ធផលនេះបានបញ្ជាក់ពីកិច្ចខិតខំប្រឹងប្រែងក្នុងការងារអភិរក្ស រួមទាំងការការពារសំបុក និងការអភិរក្សដោយមានការចូលរួមពីសហគមន៍ ជាងពីរទសវត្សរ៍មកនេះ ដោយមានការគាំទ្រពី រាជរដ្ឋាភិបាល​នៃព្រះរាជាណាចក្រកម្ពុជា​, Mandai Nature, Turtle Survival Alliance, Allan and Patricia Koval Foundation, US Fish and Wildlife Service, Rainforest Trust, និង US Forest Service ៕