ឧត្តមសេនីយ៍ទោ សោម ស៊ុន បិទវគ្គហ្វឹកហ្វឺតបំប៉នលំហាត់របៀបរយៈពេលខ្លី នៅទីបញ្ជាការតំបន់ប្រតិបត្តិការសឹករងកំពង់ធំ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី២៩ ខែមីនា ឆ្នាំ២០២៤ បានអញ្ជើញជាអធិបតីភាព ក្នុងពិធីបិទវគ្គហ្វឹកហ្វឺនបំប៉នលំហាត់របៀបរយៈពេលខ្លី ជូនដល់សិក្ខាកាម ដែលបានអញ្ជើញមកពីតាមបណ្ដាកងឯកភាព និងនៅក្នុងទីបញ្ជាការតំបន់ប្រតិបត្តិការសឹករង ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ ។
លោកវរសេនីយ៍ទោ អ៊ូ ឆេងកន មេបញ្ជាការរងទទួលបន្ទុកការងារហ្វឹកហ្វឺន បានឡើងរាយការណ៍អំពីផែនការហ្វឹកហ្វឺនបំប៉នលំហាត់របៀបរយៈពេលខ្លី ដែលមានសិក្ខាកាមចូលរួមចំនួន១០៦នាក់ គ្រូយោធាចារ្យ ចំនួន៣នាក់ និងអ្នកគ្រប់គ្រងចំនួន៣នាក់ សរុបចំនួន១១២នាក់ ដែលមានរយៈពេលហ្វឹកហ្វឺន៧ថ្ងៃ ហើយនិងបានវាយតម្លៃអំពីចំណុចខ្លាំង ចំណុចខ្សោយ និងលទ្ធផលនៃការហ្វឹកហ្វឺន របស់សិក្ខាកាមក្នុងវគ្គហ្វឹកហ្វឺនបំប៉នពាក់កណ្ដាលរៀបរយនេះ ទទួលបានលទ្ធផលល្អប្រសើរ គួរជាទីមោទនៈ ។
ឧត្តមសេនីយ៍ទោ សោម ស៊ុន បានថ្លែងអំណរគុណចំពោះគណៈកម្មការគ្រប់គ្រងវគ្គ ក្រុមគ្រូយោធាចារ្យ និងនាយទាហាន នាយទាហានរង និងពលទាហាន ជាសិក្ខាកាមទាំងអស់ ដែលបានយកអស់ពីកម្លាំងកាយចិត្ត ក្នុងការបង្ហាត់បង្រៀន និងការហ្វឹកហ្វឺនរៀនសូត្រ តាមកម្មវិធីគ្រោងទុក ទទួលបានលទ្ធផលល្អប្រសើរ។ នៅក្នុងឱកាសនេះ មេបញ្ជាការតំបន់ប្រតិបត្តិការសឹករងកំពង់ធំ បានគូសបញ្ជាក់ថា កងទ័ពគ្រប់រូបត្រូវតែទទួលបានការហ្វឹកហ្វឺនរៀនសូត្រពង្រឹងកាយសម្បទារឹងមាំ នឹងត្រូវចេះស្ទាត់ជំនាញអំពីលំហាត់របៀបរបស់កងយោពលខេមរភូមិន្ទ ដើម្បីក្លាយទៅជាកងទ័ពដែលមានវិន័យ និងសេចក្តីថ្លៃថ្នូរ ស្របតាមការអភិវឌ្ឍរីកចម្រើនរបស់ប្រទេសជាតិ និងក្នុងពេលដែលប្រទេសជាតិមានសុខសន្តិភាពពេញលេញ ក្រោមការដឹកនាំប្រកបដោយកិត្តិបណ្ឌិត និងគុណធម៌ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឧត្តមសេនីយ៍ទោ សោម ស៊ុន បានផ្ដាំផ្ញើដល់នាយទាហាន នាយទាហានរង និងពលទាហានទាំងអស់ ក្នុងពេលវិលត្រឡប់ទៅកាន់អង្គភាពវិញ ត្រូវបន្តត្រៀមខ្លួនចូលរួមក្នុងកិច្ចសហប្រតិបត្តិការការពារសន្តិសុខ សុវត្ថិភាព ជូនប្រជាពលរដ្ឋសប្បាយរីករាយក្នុងឱកាសសង្ក្រាន្តឆ្នាំថ្មី ដែលនឹងចូលមកដល់នៅពេលខាងមុខនេះ ហើយនិងត្រូវត្រៀមបម្រុងកម្លាំង មធ្យោបាយសម្ភារៈគ្រប់គ្រាន់ ដើម្បីអនុវត្តតាមបទបញ្ជារបស់បញ្ជាការដ្ឋានយោធភូភាគទី៤ និងគណៈបញ្ជាការឯកភាពរដ្ឋបាលខេត្ត ក្នុងការអន្តរាគមន៍ដោះស្រាយសភាពការណ៍ផ្សេងៗ ដែលកើតមានឡើងជាយថាហេតុ នៅក្នុងភូមិសាស្ត្រខេត្តកំពង់ធំ ៕
