ឯកឧត្ដមបណ្ឌិតសភាចារ្យ ហង់ជួន ណារ៉ុន អញ្ជើញចូលរួមពិធីអបអរសាទរខួប ៣០ឆ្នាំ នៃកម្មវិធីអាហារូបករណ៍អូស្ត្រាលីនៅកម្ពុជា

ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា នាល្ងាចថ្ងៃទី២៨ ខែមីនា ឆ្នាំ២០២៤ បានអញ្ជើញជាអធិបតីក្នុងពិធីអបអរសាទរខួប ៣០ឆ្នាំ នៃកម្មវិធីអាហារូបករណ៍អូស្ត្រាលីនៅកម្ពុជា (Australia Awards Scholarships Program) និងមានការអញ្ជើញចូលរួមពី ឯកឧត្តម Justin Whyatt ឯកអគ្គរដ្ឋទូតអូស្ត្រាលីប្រចាំនៅកម្ពុជា ឯកឧត្ដម ឧបនាយករដ្ឋមន្ត្រី សាយ សំអាល់ ឯកឧត្ដមបណ្ឌិតសភាចារ្យ សុក ស៊ីផាន់ណា ឯកឧត្ដមរដ្ឋមន្ត្រី ឌិត ទីណា ឯកឧត្តមបណ្ឌិត អ៊ាង សុផល្លែត ឯកឧត្ដម សំហេង បុរស ឯកឧត្ដម លោកជំទាវជាថ្នាក់ដឹកនាំភ្ញៀវជាតិ និងអន្តរជាតិមកពីស្ថាប័នពាក់ព័ន្ធ។

មានប្រសាសន៍ក្នុងឱកាសនេះ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី ចំពោះការផ្តល់នូវអាហារូបករណ៍ដ៏មានតម្លៃដល់យុវជនកម្ពុជាជាង ៣ទសវត្សមកនេះ ដែលបានរួមចំណែកអភិវឌ្ឍធនធានមនុស្សកម្ពុជាឱ្យក្លាយជាកម្លាំងដ៏មានសក្ដានុពលក្នុងការចូលរួមអភិវឌ្ឍសង្គមសេដ្ឋកិច្ចកម្ពុជាប្រកបដោយចីរភាព ក៏ដូចជាអរគុណដល់អតីតនិស្សិតដែលទទួលជោគជ័យក្នុងការសិក្សា ហើយបានយកចំណេះជំនាញត្រឡប់មកអភិវឌ្ឍមាតុប្រទេសវិញ។

តាមរយៈអាហារូបករណ៍អូស្ត្រាលីបានកសាងសមត្ថភាពបញ្ញវន្តកម្ពុជាជាង ១ពាន់នាក់ ដែលបច្ចុប្បន្នកំពុងដើរតួនាទីយ៉ាងសំខាន់ក្នុងការជំរុញការផ្លាស់ប្ដូរចំណេះដឹងជំនាញ បទពិសោធន៍ វប្បធម៌ ជំរុញឱ្យមានការផ្លាស់ប្ដូររវាងប្រជាជន និងប្រជាជននៃប្រទេសទាំងពីរ និងជំរុញសមាហរណកម្មកម្ពុជាទៅក្នុងអាស៊ាន។

កម្មវិធីអាហារូបករណ៍អូស្ត្រាលីនៅកម្ពុជាក្នុងរយៈពេល ៣០ឆ្នាំមកនេះ គឺជាសក្ខីភាពដ៏រឹងមាំមួយ នៃទំនាក់ទំនងប្រកបដោយផ្លែផ្ការវាងប្រទេសទាំងពីរ ហើយក្នុងឱកាសនេះដែរ ឯកឧត្ដមបណ្ឌិតសភាចារ្យ បានគូសបញ្ជាក់ជាថ្មីនូវការប្ដេជ្ញាចិត្តក្នុងការបន្តពង្រឹងពង្រីកកិច្ចសហប្រតិបត្តិការជាមួយអូស្ត្រាលី ក្នុងគោលដៅបន្តអភិវឌ្ឍធនធានមនុស្សកម្ពុជាឱ្យកាន់តែប្រសើរឡើង៕