គណៈប្រតិភូគណៈកម្មការទី៣ នៃរដ្ឋសភា ចុះសិក្សាស្វែងយល់ពីវិស័យផែនការ វិនិយោគ និងធនធានទឹក នៅខេត្តពោធិ៍សាត់
ភ្នំពេញ៖ ដោយបានការអនុញ្ញាតពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នារសៀលថ្ងៃទី២២ ខែមីនា ឆ្នាំ២០២៤ គណៈប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា បានអញ្ជើញចុះបំពេញបេសកកម្មនៅខេត្តពោធិ៍សាត់ ដឹកនាំដោយ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ បានជួបប្រជុំជាមួយថ្នាក់ដឹកនាំរដ្ឋបាលខេត្តពោធិ៍សាត់ ដឹកនាំដោយ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ និងឯកឧត្តម ម៉ក់ រ៉ា ប្រធានក្រុមប្រឹក្សាខេត្ត ដើម្បីស្វែងយល់អំពីប្រសិទ្ធភាព នៃការអនុវត្តន៍ច្បាប់នានា ពាក់ព័ន្ធនឹងវិស័យដែលគណៈកម្មការទទួលខុសត្រូវ ក៏ដូចជាពិនិត្យមើលពីភាពរីកចម្រើន និងជីវភាពរស់នៅរបស់ប្រជាពលរដ្ឋក្នុងខេត្ត ពិសេសលើការងារធ្វើផែនការវិនិយោគ និងធនធានទឹក។
ឯកឧត្តម ខូយ រីដា អភិបាលខេត្ត បានមានប្រសាសន៍ជម្រាបគណៈប្រតិភូរដ្ឋសភាពីស្ថានភាពទូទៅ និងសភាពការណ៍ក្នុងខេត្ត ពិសេសគឺបានជម្រាបជូនពីការងារមួយចំនួនដែលទាក់ទិននឹងវិស័យទទួលខុសត្រូវរបស់គណៈកម្មការដូចជាការងាររៀបចំផែនការវិនិយោគ និងធនធានទឹកនៅក្នុងខេត្តពោធិ៍សាត់។
ឯកឧត្តមអភិបាលខេត្ត បានមានប្រសាសន៍ទៀតថា នៅលើការងារធ្វើផែនការ ខេត្តពោធិ៍សាត់ បានចុះប្រមូលទិន្នន័យផលិតផលក្នុងស្រុកសរុបGDP ប្រចាំឆ្នាំ ប្រមូលទិន្នន័យសន្ទស្សន៍ថ្លៃទំនិញនៅលើទីផ្សារក្នុងក្រុង ស្រុក ភូមិ ឃុំ ជាប្រចាំ និងបានប្រមូលទិន្នន័យអត្តសញ្ញាណកម្មគ្រួសារក្រីក្រគ្រប់ភូមិ។ ខេត្តក៏បានធ្វើការវិភាគទិន្នន័យ ចងក្រងសៀវភៅឯកសារព័ត៌មាន សៀវភៅព័ត៌មានពិន្ទុតាមវិស័យ និងបានសម្របសម្រួលបច្ចេកទេសស្តីពីការរៀបចំគម្រោងសកម្មភាពអាទិភាពឃុំ សង្កាត់ ដើម្បីដាក់បញ្ចូលក្នុងកម្មវិធីវិនិយោគ៣ឆ្នាំរំកិល ឃុំ សង្កាត់ ព្រមទាំងបានធ្វើការបញ្ចូលទិន្នន័យគម្រោងសកម្មភាពអាទិភាពឃុំ សង្កាត់ ក្នុងប្រព័ន្ធបច្ចេកវិទ្យាតាមរយៈកម្មវិធីគ្រប់គ្រងគម្រោងថ្នាក់ក្រោមជាតិផងដែរ។ ចំពោះវិស័យវិនិយោគ ឯកឧត្តមអភិបាលខេត្តបានបន្តថា ក្រុមហ៊ុនវិនិយោគដែលបានអនុវត្តនៅមូលដ្ឋានក្រុង ស្រុក ឃុំ សង្កាត់ ក្នុងខេត្តពោធិ៍សាត់មានចំនួន ២៥ គម្រោង មានដូចខាងក្រោម៖
១-គម្រោងផ្នែកវាយនភណ្ឌ មានចំនួន៣គម្រោង
២-គម្រោងវិនិយោគវិស័យកសិកម្មមានចំនួន៦គម្រោង
៣-គម្រោងវិនិយោគវិស័យផលិតថាមពលអគ្គិសនីមានចំនួន៥គម្រោង
៤-គម្រោងវិនិយោគវិស័យរ៉ែ(កិនថ្ម)មានចំនួន៤គម្រោង
៥-គម្រោងវិនិយោគវិស័យទេសចរណ៍សេដ្ឋកិច្ចពិសេស មានចំនួន១គម្រោង
៦-គម្រោងវិនិយោគវិស័យផលិតសម្ភារៈអគ្គិសនីមានចំនួន៥គម្រោង
៧-គម្រោងវិនិយោគវិស័យដំឡើងរថយន្ត(FORD) មានចំនួន១គម្រោង។
ក្នុងខេត្តពោធិ៍សាត់មានប្រព័ន្ធធារាសាស្ត្រខ្នាតធំ មធ្យម និងតូច សរុបចំនួន៥១ប្រព័ន្ធ។ ប្រព័ន្ធធារាសាស្ត្រ បាននឹងកំពុងដំណើរការសរុបចំនួន៣៣ប្រព័ន្ធ លើ ៥១ប្រព័ន្ធ ក្នុងនោះមានសំណង់ធំៗកាត់ស្ទឹងចំនួន ៤កន្លែង និងសំណង់សិល្បការ ចំនួន ៩៩៦កន្លែង ដែលមានខ្នាតធំចំនួន ៥កន្លែង ខ្នាតមធ្យមចំនួន ៣៩កន្លែង ខ្នាតតូចចំនួន ៥កន្លែង និងអាងស្តុកទឹកចំនួន ២កន្លែង និងប្រឡាយមេចំនួន ៣៣ខ្សែ ស្មើនឹងប្រវែង ៨៦,០៦៦ម៉ែត្រ និងប្រឡាយរងចំនួន ៩៣ខ្សែ ស្មើនឹងប្រវែង ២៧១,០៥៥ម៉ែត្រ និងប្រឡាយជើងក្អែបចំនួន ១,៥៧៧ខ្សែ ស្មើនឹងប្រវែង ១,៤២១,៩៧៣ម៉ែត្រ និងទំនប់ដីសរុបចំនួន ៦កន្លែង មានប្រវែង ១៥,១៤១ម៉ែត្រ ដែលអាចស្រោចស្រពរដូវវស្សាលើផ្ទៃដីចំនួន ៩៧,៧០១ហិកតា និងរដូវប្រាំង លើផ្ទៃដី ចំនួន ២០,០៤៨ហិកតា និងមានទំនប់ទី៣ និងទំនប់ទី៥ ដែលអាចផ្ទុកទឹកបាន ចំនួន ៥០លានម៉ែត្រគូប ដែលជាអាងស្តុកទឹកសម្រាប់ផ្គត់ផ្គង់ដល់ការស្រោចស្រព និងការប្រើប្រាស់តាមដងស្ទឹងពោធិ៍សាត់ ជាពិសេសសម្រាប់ស្រុកភ្នំក្រវាញ ស្រុកបាកាន ក្រុងពោធិ៍សាត់ និងស្រុកកណ្តៀង ខេត្តពោធិ៍សាត់។
ឯកឧត្តមអភិបាលខេត្ត បានបន្ថែមទៀតថា ទន្ទឹមនឹងលទ្ធផលសម្រេចបានទាំងអស់នេះ ខេត្តក៏បានជួបនូវបញ្ហាប្រឈមមួយចំនួនដែលត្រូវខិតខំដោះស្រាយជាបន្តទៀតដែរ ដើម្បីរួមចំណែកក្នុងការសម្រេចតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលកម្ពុជា សំដៅលើកកម្ពស់កិច្ចអភិវឌ្ឍខេត្តឲ្យបានកាន់តែរីកចម្រើនថែមទៀត។
ក្រោយពីបានស្តាប់ការរាយការណ៍របស់ឯកឧត្តមអភិបាលខេត្តរួចមក ឯកឧត្តមសន្តិបណ្ឌិត ឡូយ សុផាត បានកោតសរសើរ ដោយបានវាយតម្លៃខ្ពស់ដល់ថ្នាក់ដឹកនាំខេត្ត និងមន្ទីរពាក់ព័ន្ធនានា ដែលខិតខំប្រឹងប្រែងក្នុងការធ្វើឱ្យខេត្តពោធិ៍សាត់មានការរីកចម្រើន ដោយបានលើកស្ទួយកម្រិតជីវភាពរបស់ប្រជាពលរដ្ឋក្នុងខេត្តបានកាន់តែប្រសើរឡើង ដើម្បីស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជាក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាការរួមចំណែកយ៉ាងធំធេង ក្នុងការអភិវឌ្ឍសេដ្ឋកិច្ចជាតិឱ្យកាន់តែរីកចម្រើនលើគ្រប់វិស័យ។
បន្ទាប់មកគណៈប្រតិភូគណៈកម្មការទី៣ នៃរដ្ឋសភា បានអញ្ជើញចុះពិនិត្យមើលកន្លែងចិញ្ចឹមត្រីឈ្មោះ ឡេង ប៊ុនលី ស្ថិតនៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់ ៕
