អគ្គនាយកបច្ចេកទេស នៃក្រសួងធនធានទឹក ដឹកនាំមន្ត្រីជំនាញ ចុះពិនិត្យវឌ្ឍនភាពគម្រោង ក្នុងភូមិសាស្ត្រខេត្តព្រៃវែង និងខេត្តស្វាយរៀង
ភ្នំពេញ៖ នៅថ្ងៃសៅរ៍ ៧រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២ ខែមីនា ឆ្នាំ២០២៤ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសក្រសួង ធនធានទឹក និងឧតុនិយម អមដំណើរដោយលោក ថាំង វីយុទ្ធដា ប្រធាននាយកដ្ឋានវិស្វកម្មបានដឹកនាំក្រុមការងារបច្ចេកទេសក្រសួង ចុះពិនិត្យវឌ្ឍនភាពគម្រោងនៅស្រុកកំចាយមារ ខេត្តព្រៃវែង និងស្រុកស្វាយជ្រំ ខេត្តស្វាយរៀង។
ក្នុងឱកាសនោះ ឯកឧត្តមអគ្គនាយក លោកប្រធាននាយកដ្ឋានវិស្វកម្ម និងមន្ត្រីបច្ចេកទេសក្រសួង សហការជាមួយលោក គឹម សាវុធ ប្រធានមន្ទីរធនធានទឹក និងឧតុនិយមខេត្តស្វាយរៀង និងលោក រស់ រិទ្ធី អនុប្រធានមន្ទីរធនធានទឹក និងឧតុនិយមខេត្តព្រៃវែង ព្រមទាំងមន្ត្រីមន្ទីរ បានចុះពិនិត្យវឌ្ឍនភាពគម្រោងចំនួន ២រួមមាន៖ ទី១)ប្រឡាយដោះទឹកកំពង់ជ្រៃ មានលទ្ធភាពដោះទឹកជំនន់ទឹកភ្លៀង និងទឹកជំនន់ពីស្ថានីយកំពង់ជ្រៃដែលស្ថិតនៅក្នុងឃុំឈើទាល និងឃុំស្វាយធំ ស្រុកស្វាយជ្រំ ខេត្តស្វាយរៀង និងទី២)ប្រឡាយមេទុកស្រូវ មានលទ្ធភាពស្រោចស្រពស្រូវវស្សាចំនួន ៦៧៦ហិកតា ស្រូវប្រាំងចំនួន ៣៨០ហិកតា និងដំណាំរួមផ្សំចំនួន ១០ហិកតា ដែលស្ថិតនៅក្នុងឃុំជាច ស្រុកកំចាយមារ ខេត្តព្រៃវែង ៕
