គណៈកម្មាធិការពិគ្រោះយោបល់កិច្ចការស្ត្រីនិងកុមារ ខេត្តបន្ទាយមានជ័យ រៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅបន្តឆ្នាំ២០២៤
ភ្នំពេញ៖ គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្តបន្ទាយមានជ័យ បានរៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅបន្តឆ្នាំ២០២៤ នៅសាលប្រជុំធំ សាលខេត្តបន្ទាយមានជ័យ នាថ្ងៃទី២៧ ខែកុម្ភៈ ឆ្នាំ២០២៤ ។
លោកជំទាវ ធីវ សុខុម ប្រធានគណៈកម្មាធិការពិគ្រោះយោបល់កិច្ចការស្ត្រីនិងកុមារ (គ ក ស ក)ខេត្ត បានបញ្ជាក់ថា ក្នុងរយៈពេល១ឆ្នាំកន្លងមកនេះគណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត បានអនុវត្តការងារយ៉ាងមមាញឹក និងខ្ជាប់ខ្ជួនបំផុត ទៅតាមតួនាទី និងភារកិច្ចរបស់ខ្លួន ព្រមទាំងបានចុះ ពង្រឹងបន្ថែមអំពីការអនុវត្តតួនាទីភារកិច្ច ការ រៀបចំផែនការសកម្មភាព ផែនការថវិកា និងកិច្ចការពារកុមារ ដល់ ក្រុមករងារក្រុងស្រុកទាំង៩ និងក្រុមការងារឃុំសង្កាត់បានចុះសួរសុខទុក្ខ គ្រួសារកុមារក្រីក្រ កុមាររងគ្រោះ និងងាយរងគ្រោះ នៅតាមមូលដ្ឋាន និងបានផ្ដល់ឃីត ដែល ជាអំណោយរបស់អង្គការ យូនីសេហ្វ ដោយមានការចូលរួមយ៉ាងផុសផុលផងដែរ។
ឯកឧត្តម លី សុវណ្ណារិទ្ធ អភិបាលខេត្តស្តីទី បានក៏ថ្លែងការកោតសរសើរ ចំពោះអង្គការដៃគូរ ដែលមានការសហការជាមួយរដ្ឋបាលខេត្ត បានរៀបចំកិច្ចប្រជុំនេះឡើង ដោយមានការចូលរួមពីគ្រប់អ្នកពាក់ព័ន្ធក្នុងដែនសមត្ថកិច្ចទាំងមូល នៃរដ្ឋបាលខេត្ត មន្ទីរអង្គភាពពាក់ព័ន្ធ រដ្ឋបាលក្រុង ស្រុក រដ្ឋបាលឃុំសង្កាត់ និងអង្គការដៃគូ។ ចំពោះរដ្ឋបាលក្រុងស្រុក ឃុំ សង្កាត់ លោកបានណែនាំ គួរតែធ្វើការវិភាគថវិកា ដល់ គ ក ស ក ក្រុងស្រុក និង គ ក ន ក ឃុំសង្កាត់ ដើម្បីមានធនធានសម្រាប់អនុវត្តតួនាទី ភារកិច្ចរបស់ខ្លួនឱ្យបានរលូន និងដើម្បីពង្រឹងសមត្ថភាពស្ត្រី ដើម្បីឱ្យស្ត្រីមានសិទ្ធិក្នុងការធ្វើការសម្រេចចិត្ត ព្រោះថាស្ត្រីជាមាតានៃពិភពលោក ស្រ្តីជាឆ្អឹងខ្នងនៃប្រទេសជាតិ ។
ក្នុងឱកាសនោះបន្ទាប់ពីបញ្ចប់នៃកិច្ចប្រជុំ ក្រុមការងារ គណៈកម្មាធិការពិគ្រោះយោបល់កិច្ចការស្ត្រីនិងកុមារ (គ ក ស ក)ខេត្ត ក្រុង ស្រុក រួមនិងអង្គការដៃគូតែបានចូលរួមយ៉ាងសកម្ម ក៏ទទួលបាននូវបណ្ណសរសើរ គណៈកម្មាធិការពិគ្រោះយោបល់កិច្ចការស្ត្រីនិងកុមារ (គ ក ស ក)ខេត្តផងដែរ៕
