ឯកឧត្តមរដ្ឋមន្ត្រី ហង់ជួន ណារ៉ុន អញ្ជើញទស្សនកិច្ចពិនិត្យការរៀន និងបង្រៀននៅ សាលាបឋមសិក្សាបឹងត្បូង ក្នុងស្រុកបារាយណ៍ ខេត្តកំពង់ធំ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២០ ខែកុម្ភៈ ឆ្នាំ២០២៤ បានដឹកនាំក្រុមការងារទស្សនកិច្ច ពិនិត្យការងាររៀន និងបង្រៀននៅគ្រឹះស្ថានសិក្សា ព្រមទាំងស្វែងយល់ពីមតិយោបល់ បញ្ហាប្រឈមផ្សេងៗ នៅ សាលាបឋមសិក្សាបឹងត្បូង ក្នុងស្រុកបារាយណ៍ ខេត្តកំពង់ធំ។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្ត និងថ្លែងអំណរគុណចំពោះ គណៈគ្រប់គ្រងសាលា ក៏ដូចជាលោកគ្រូអ្នកគ្រូ ទាំងអស់ ដែលខិតខំប្រឹងប្រែងយកអស់កម្លាំងកាយចិត្តបំពេញភារកិច្ច ដឹកនាំបង្ហាត់បង្រៀនសិស្សឱ្យទទួលបានលទ្ធផលល្អក្នុងការសិក្សា និងស្នើឱ្យបន្តរក្សាស្មារតីសហការគ្នាចូលរួមអនុវត្តកំណែទម្រង់វិស័យអប់រំនៅកម្ពុជាឱ្យកាន់តែរីកចម្រើនទៅមុខទៀត និងសូមឱ្យលោកគ្រូអ្នកគ្រូ ទាំងអស់ បន្តលើកកម្ពស់គុណភាពអប់រំ រួមទាំងការលើកកម្ពស់អំណានដំបូង ពង្រឹងគុណភាពនៃការបង្រៀនភាសាខ្មែរនៅកម្រិតបឋមសិក្សា “កញ្ចប់សម្ភារៈអំណាន និងគណិតវិទ្យាថ្នាក់ដំបូង” ត្រូវបង្កើតឡើង ដើម្បីឱ្យគ្រប់អ្នកពាក់ព័ន្ធ ជាពិសេសគ្រូបង្រៀនថ្នាក់ទី១ និងទី២ មានកញ្ចប់សម្ភារៈអប្បបរមាមួយ ដែលទាំងអស់គ្នាអាចយកទៅប្រើប្រាស់សម្រាប់ការអនុវត្ត និងពង្រីកការអនុវត្តនៅទូទាំងប្រទេស ក្នុងន័យលើកកម្ពស់គុណភាពអប់រំ តាមរយៈការបង្កើនលទ្ធផលសិក្សារបស់សិស្សពោលគឺ កុមារកម្ពុជាចេះអាន សរសេរ និងគិតលេខទាំងអស់គ្នា”។

ជាមួយនេះដែរ ឯកឧត្តមបណ្ឌិតសភាចារ្យ បានផ្តល់អនុសាសន៍ឱ្យបន្តពង្រឹងយុទ្ធសាស្ត្រការគ្រប់គ្រងតាមសាលារៀនឆ្ពោះទៅលើកកម្ពស់លទ្ធផលសិក្សារបស់សិស្ស ផ្លាស់ប្តូរវប្បធម៌សាលារៀន និងពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់បុគ្គលិកអប់រំ និង សិស្សានុសិស្ស តាមរយៈការអនុវត្ត ស្តង់ដាសាលាគំរូទាំង ៥ ជាមួយនេះដែរ ដើម្បីកែលម្អការបង្រៀនឱ្យកាន់តែប្រសើរ ឈានទៅលើកកម្ពស់លទ្ធផលសិក្សាសិស្សបន្ថែមទៀត និងសូមរៀបចំវិធីសាស្រ្តបង្រៀនថ្មីៗ ដោយផ្ដោតលើការពង្រឹងសមត្ថភាពរិះគិត វិភាគស៊ីជម្រៅ បង្រៀនឱ្យសិស្សមានភាពឆ្លាតវៃចេះបកស្រាយ រកអំណះអំណាង ស្វែងរកគោលគំនិតសំខាន់ៗតាមរយៈការអានឱ្យបានច្រើន និងផ្ដោតលើការពង្រឹងសមត្ថភាពដែលផ្សារភ្ជាប់នឹងការរស់នៅជាក់ស្ដែង អាចយកចំណេះដឹងមកប្រើប្រាស់ក្នុងជីវភាពប្រចាំថ្ងៃ ក៏ដូចជាការរៀបចំកម្មវិធីក្រៅម៉ោងសិក្សា បង្កើតជាគម្រោងផ្សេងៗ និងក្លឹបស្វ័យសិក្សាជាដើម បន្ថែមពីលើកម្មវិធីរៀនពេញមួយថ្ងៃ៕