ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំស្តីពី យន្តការគាំទ្រសាលារៀនគំរូ នៃគម្រោងកែលម្អការអប់រំចំណេះទូទៅ (GEIP)

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃទី១៧ ខែមករា ឆ្នាំ២០២៤ បានអញ្ជើញដឹកនាំកិច្ចប្រជុំ ស្ដីពី ការគាំទ្រសាលារៀនគំរូ នៃគម្រោងកែលម្អការអប់រំចំណេះទូទៅ (GEIP) ដោយមានការចូលរួមពី មន្ដ្រីពាក់ព័ន្ធមកពីគ្រប់អង្គភាព ក្រោមឱវាទក្រសួង។

គោលបំណង នៃកិច្ចប្រជ៉ំនេះ គឺដើម្បីពិនិត្យវឌ្ឍនភាព នៃការអនុវត្តគម្រោង វិភាគលទ្ធផលសម្រេចបាន និង ដាក់ចេញនូវផែនការ យន្តការគាំទ្រសាលាគំរូ តបតាមអនុសាសន៍របស់សម្តេចមហាបវរធិបតី នាយករដ្ឋមន្ត្រី នៃ ព្រះរាជាណាចក្រកម្ពុជា ដែលបានដាក់ចេញ វិធានគន្លឹះអាទិភាពចំនួន ៤ សំដៅលើកកម្ពស់គុណភាពបង្រៀន និង លទ្ធផលសិក្សារបស់សិស្ស រួមមាន ៖ (១). ការពង្រឹងអភិបាលកិច្ច, (២). ការពិនិត្យកែសម្រួល និងការរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង, វិន័យ, សីលធម៌ និងឥរិយាបថរបស់សិស្ស, (៣). ការយកចិត្តទុកដាក់លើសុខភាពសិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និង (៤). ការជំរុញ និងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ។

កិច្ចប្រជុំនេះ ពិភាក្សាផ្ដោតលើ (១). ការសម្រួចអាទិភាពកំណែទម្រង់វិស័យអប់រំ (២). កិច្ចការត្រូវអនុវត្តតាមសាលា (៣). សូចនាករសម្រាប់វាស់វែងផលសម្រេចសាលារៀនមានប្រសិទ្ធភាព (សាលាគំរូ) , យន្ដការគាំទ្រ និង ការទទួលខុសត្រូវ ក្រុមការងារតាមដានផលសម្រេច ក្រុមបច្ចេកទេស, ក្រុមការងារសម្របសម្រួលទាំង ៣អនុវិស័យ (ការអប់រំកុមារតូច, បឋមសិក្សា , និង មធ្យមសិក្សា) និង ការយន្តការ គាំទ្រការបណ្តុះបណ្តាល។

ក្នុងឱកាសនេះដែរ ឯកឧត្តមបណ្ឌិតសភាចារ្យ បានផ្តល់អនុសាសន៍ឱ្យ បន្ថែមការផ្សព្វផ្សាយពីសកម្មភាព និងលទ្ធផលសម្រេចបាន របស់គម្រោង ,ធ្វើរបាយការណ៍លទ្ធផលផ្ដោតលើសម្មតិកម្ម និងធ្វើការវិភាគ ដើម្បីកែលម្អ ក៏ដូចជា សិក្សាចងក្រងឯកសារស្តីពីករណីសិក្សាផ្សេងៗ ចេញពីការអនុវត្តគម្រោង ដើម្បីបោះពុម្ពផ្សព្វផ្សាយ និងចែកចាយ ទុកជាមរតកចំណេះដឹងដល់អ្នកជំនាន់ក្រោយ៕