ឧត្តមសេនីយ៍ទោ សម្បត្តិ សុធារដ្ឋ អញ្ជើញប្រគល់ថវិកាឧបត្ថម្ភគោលនយោបាយ និងថវិកាសមាគម ជូនដល់មន្ត្រីនគរបាលចូលនិវត្តន៍ និងក្រុមគ្រួសារមន្រ្តីនគរបាលមរណៈ
ភ្នំពេញ៖ នាព្រឹកថ្ងៃអង្គារ ៧កើត ខែមិគសិរ ឆ្នាំថោះ ចត្វាស័ក ព.ស.២៥៦៧ ត្រូវនិងថ្ងៃទី១៩ ខែធ្នូ ឆ្នាំ២០២៣ ស្នងការដ្ឋាននគរបាលខេត្តកែប បានរៀបចំពិធីជួបសំណេះសំណាល និងបើកផ្តល់ថវិកាឧបត្ថម្ភគោលនយោបាយ និងថវិកាសមាគម ជូនដល់មន្ត្រីចូលនិវត្តន៍ និងក្រុមគ្រួសារមន្ត្រីមរណៈចំនួន ១៤នាក់ ក្រោមអធិបតីភាព លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប ដោយមានការអញ្ជើញចូលរួមពី នាយ នាយរង ការិយាល័យបុគ្គលិក។
ក្នុងនោះថវិកាសរុបចំនួន ១៣៦,៦៧២,៥០០រៀល រួមមាន៖
-ថវិកាគោលនយោបាយមន្ត្រីនគរបាលចូលនិវត្តន៍ និងមន្ត្រីមរណ:ចំនួន ១៣នាក់ ថវិកាចំនួន ១១៧,៣៤០,០០០រៀល
-ថវិកាសមាគម មន្ត្រីនគរបាលមរណៈចំនួន ១នាក់ ថវិកាចំនួន ១៩,៣៣២,៥០០រៀល។
នាឱកាសនោះលោកឧត្តមសេនីយ៍ទោ ស្នងការ បានសម្តែងនូវក្តីនឹករលឹក ហើយបានរំលឹកពីស្នាដៃមន្ត្រីនគរបាលចូលនិវត្តន៍ និងមន្ត្រីនគរបាលមរណៈ ដែលបានបំពេញភារកិច្ចបម្រេីជាតិមាតុភូមិ និងប្រជាពលរដ្ឋកន្លងមក ព្រមទាំងបានបន្សល់នូវស្នាដៃជាច្រេីនដល់មន្ត្រីនគរបាលជំនាន់ក្រោយជាគំរូ និងបានពាំនាំនូវប្រសាសន៍ផ្តាំផ្ញើសួរសុខទុក្ខ និងចូលរួមរំលែកទុក្ខ ពីសំណាក់ថ្នាក់ដឹកនាំក្រសួងមហាផ្ទៃ និងថ្នាក់ដឹកនាំអគ្គស្នងការដ្ឋាននគរបាលជាតិផងដែរ ៕
