ប្រមុខរាជរដ្ឋាភិបាល ណែនាំឱ្យក្រសួងសាធារណការ ត្រូវបន្តការថែទាំផ្លូវជាតិទាំងអស់ឱ្យបានល្អប្រសើរ បើមានការខូចខាតណាមួយត្រូវជួសជុលឲ្យបានឆាប់រហ័ស

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ណែនាំឱ្យក្រសួងសាធារណការ និងដឹកជញ្ជូន និងអាជ្ញាធរគ្រប់ជាន់ថ្នាក់ ត្រូវបន្តការថែទាំងផ្លូវជាតិលេខ៥ និងបណ្តាផ្លូវជាតិ ស្ពាន និងទ្រព្យសម្បត្តិរដ្ឋទាំងអស់ឱ្យបានល្អប្រសើរ ហើយនៅពេលមានការខូចខាតណាមួយត្រូវជួសជុលឲ្យបានឆាប់រហ័ស ចៀសវាងការបណ្ដោយឲ្យមានការខូចខាតធ្ងន់ធ្ងរ។

សម្តេចមហាបវរធិបតី ហ៊ុន ម៉ាណែត បានថ្លែងយ៉ាងដូចនេះនាព្រឹកថ្ងៃពុធ ១០កើត ខែកត្ដិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២២ ខែវិច្ឆិកា ឆ្នាំ២០២៣នេះនាឱកាសដែលសម្តេចអញ្ជើញសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីព្រែកក្តាម រហូតដល់ខេត្តបាត់ដំបង។ ជាមួយនោះក៏មានការបើកការដ្ឋានសាងសង់ផ្លូវពីសិរីសោភ័ណ ទៅកាន់ប៉ោយប៉ែតផងដែរ។

សម្តេចធិបតី ហ៊ុន ម៉ាណែត បានថ្លែងដូចនេះថា «ក្រសួងសាធារណការ និងដឹកជញ្ជូន ក៏ដូចជាអាជ្ញាធរគ្រប់ជាន់ថ្នាក់នៃបណ្ដាមន្ទីរ បណ្ដាខេត្ត នៅតាមបណ្ដោយផ្លូវជាតិលេខ៥នេះ កំណត់យន្តការនឹងសុំចាត់វិធានការឲ្យបានតឹងរ៉ឹងបំផុតក្នុងការថែរក្សាផ្លូវជាតិនេះឲ្យមានគុណភាពល្អប្រសើរសម្រាប់អ្នកដំណើរជានិច្ច នៅក្នុងករណីដែលមានការខូចខាតណាមួយសូមជួសជុលឲ្យបានឆាប់រហ័ស និងចៀសវាងការបណ្ដោយឲ្យមានការខូចខាតធ្ងន់ធ្ងរទៅថ្ងៃក្រោយ»។

សម្តេចធិបតី ហ៊ុន ម៉ាណែត បានបន្ថែមថា ការណែនាំនេះមិនមែនសម្រាប់តែផ្លូវជាតិលេខ៥នោះទេ គឺត្រូវអនុវត្តនៅគ្រប់បណ្ដាផ្លូវ ស្ពាន និងទ្រព្យសម្បត្តិរដ្ឋទាំងអស់ ដែលក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធត្រូវបង្កើតយន្តការរួមដើម្បីឃ្លាំមើល និងជួសជុលជាប្រចាំនូវគុណភាពសំណង់ ហេដ្ឋារចនាសម្ព័ន្ធទាំងអស់ ឱ្យបានល្អប្រសើរជានិច្ច។

សម្តេចធិបតី នាយករដ្ឋមន្ត្រី ក៏បានណែនាំបន្ថែមដល់ក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធត្រូវពង្រឹងសុវត្ថិភាពនៅតាមដងផ្លូវ ជាពិសេសត្រូវពង្រឹងនូវស្លាកសញ្ញាចរាចរណ៍ និងការសម្រួលរំហូរចរាចរណ៍ជាដើម ដើម្បីចៀសវាងនិងកាត់បន្ថយឲ្យបាននូវហានិភ័យនៃគ្រោះថ្នាក់ចរាចរណ៍។

សម្តេចធិបតី ក៏បានបញ្ជាក់ដែរថា ក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធក៏ត្រូវពង្រឹងការបន្ស៉ីគ្នា រវាងគម្រោងអភិវឌ្ឍន៍ហេដ្ឋារចនាសម្ព័ន្ធនីមួយៗ ជាពិសេសការធ្វើផ្លូវ ស្ពាន បណ្ដាញលូ ប្រព័ន្ធទឹក និងប្រព័ន្ធអគ្គីសនីឲ្យស្របទៅតាមប្លង់គោលមួយដើម្បីជៀសវាងការធ្វើរៀងៗខ្លួន ដែលនាំឲ្យខាតបង់ដល់ថវិកាជាតិ ថវិកាជំនួយ ថែមទាំងបង្កផលលំបាកដែលមិនចាំបាច់ដល់ប្រជាពលរដ្ឋ។

បន្ថែមពីនេះដែរសម្តេចធិបតី ហ៊ុន ម៉ាណែត ក៏បានសូមសំណូមពរដល់បងប្អូនប្រជាពលរដ្ឋ ដែលអ្នកប្រើប្រាស់ផ្លូវថ្នល់សូមបន្តចូលរួមគោរពច្បាប់ចរាចរណ៍ទាំងអស់គ្នា និងត្រូវប្រើប្រាស់គន្លងផ្លូវឲ្យបានត្រឹមត្រូវ កុំបើកលើសល្បឿនកំណត់ និងត្រូវប្រុងប្រយ័ត្នជានិច្ចនូវចំណុចដែលមានផ្លូវឆ្លងកាត់ត្រូវចូលរួមទប់ស្កាត់ឲ្យបានដាច់ខាតនូវការដឹកជញ្ជូនលើសកំណត់ទម្ងន់ នឹងត្រូវត្រួតពិនិត្យជាប្រចាំនូវលក្ខណៈបច្ចេកទេសយានយន្តឱ្យបានជាប់ជាប្រចាំផងដែរ ៕