សម្តេចធិបតី៖ កម្ពុជា មិនត្រឹមតែធានាបាន សន្តិសុខស្បៀងប៉ុណ្ណោះទេ ថែមទាំងអាចនាំចេញផលិតផលកសិកម្ម ៦.២លានតោន ត្រឹម១០ខែ ឆ្នាំនេះ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា កម្ពុជាមិនត្រឹមតែធានាបាននូវសន្តិសុខស្បៀងប៉ុណ្ណោះទេ កម្ពុជាថែមទាំងអាចនាំចេញផលិតផលកសិកម្ម ប្រមាណ៦.២លានតោន ទៅកាន់ទីផ្សារអន្តរជាតិ ក្នុងរយៈពេល ១០ខែឆ្នាំ២០២៣នេះ។

ក្នុងឱកាសអញ្ជើញប្រកាសដាក់ឱ្យ អនុវត្តកម្មវិធី​នយោបាយអាទិភាព ពាក់ព័ន្ធវិស័យកសិកម្ម នាថ្ងៃទី២០ វិច្ឆិកា សម្តេចធិបតី បញ្ជាក់ «ជាការពិតណាស់វិបត្តិស្បៀងអាហារមិនមែនជាបញ្ហាដែលស្រមើស្រមៃនោះទេ នៅក្នុងរយៈពេលប៉ុន្មានឆ្នាំនេះ យើងឃើញដោយសារទី១ បញ្ហាសង្គ្រាមដែលចាប់ផ្តើមពីនៅវិបត្តិអ៊ុយក្រែន-រុស្ស៉ី ដែលជាប្រទេសផលិតនាំចេញស្រូវសាលី ច្រើនក្នុងពិភពលោក បានធ្វើវិបត្តិតម្លៃនៃអាហារជាច្រើនជាពិសេស នៅប្រទេសជឿនលឿនដែលពឹងផ្អែកទៅលើ វត្ថុធាតុដើមទាំងនោះ គឺមានការប៉ះពាល់។ អង្កាលដែលខ្ញុំទៅចូលរួមកិច្ចប្រជុំអាស៊ាន មានការលើកឡើងច្រើនពីកង្វល់នៃឥទ្ធិពលរបស់បាតុភូតអែលនីណូ (El Nino) ដែលធ្វើឱ្យប៉ះពាល់ការផលិតស្បៀងនៅទូទាំងពិភពលោក អាចនាំឱ្យមានកង្វះស្បៀង និងថ្លៃទំនិញ យើងធ្លាប់ឃើញហើយនៅអាស៊ានយើងប៉ុន្មានឆ្នាំមុន ប្រទេសខ្លះត្រូវរហូតបើកកូតាលក់ឱ្យប្រជាពលរដ្ឋ ព្រោះទំនិញថ្លៃ ហើយខ្វះ អីចឹងហើយបានប្រទេសជាច្រើនបើកយុទ្ធការទិញ កន្លងទៅខ្ញុំបានជួបថ្នាក់ដឹកនាំអាស៊ានមួយចំនួន ពួកគាត់ចាប់ផ្តើមប្រមូលទិញ ហើយទិញស្តុកបម្រុងក្នុងករណីចាំបាច់ ដោយសារការព្យាករណ៍ តែផ្ទុយទៅវិញនៅខណៈដែលប្រទេសជាច្រើនកំពុងជួបវិបត្តិនេះ កម្ពុជាយើងធានាបាននូវសន្តិសុខស្បៀង ហើយតាមរបាយការណ៍របស់ឯកឧត្តរដ្ឋមន្ត្រីកសិកម្ម យើងមានអធិរេក (ច្រើនលើស) បាននាំចេញ៦.២លានតោន នៅក្នុង១០ខែកន្លងមកនេះ»។

សម្តេចបន្ថែមថា ការធានាបាននូវសន្តិសុខស្បៀង និងសល់កសិផលដើម្បីនាំចេញនេះ គឺជាតិកតាងមួយបញ្ជាក់ថា កម្ពុជាមិនមែនមានតែសក្តានុពលធនធានធម្មជាតិ និងមានដីដែលមានជីវជាតិនោះទេ ប៉ុន្តែសបញ្ជាក់អំពីការដឹកនាំ ការគ្រប់គ្រង និងដាក់ចេញគោលនយោបាយត្រឹមត្រូវ រួមទាំងការបញ្ចប់សង្គ្រាម ការរំដោះដីកសិកម្មចេញពីគ្រាប់មីន ការមិនយកពន្ធដីកសិកម្ម និងការអនុគ្រោះដល់វិស័យកសិកម្ម របស់រាជរដ្ឋាភិបាលដែលបានដាក់ចេញ គឺទទួលបានផលមកវិញ ៕