សម្ដេចធិបតី៖ ការសាងសង់អាកាសយាន ដ្ឋានអន្តរជាតិ សៀមរាបអង្គរថ្មីនេះ គឺជាចក្ខុវិស័យវែងឆ្ងាយ គឺការអភិវឌ្ឍ និងការអភិរក្ស
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានបញ្ជាក់ថា ការសាងសង់អាកាសយាន ដ្ឋានអន្តរជាតិ សៀមរាបអង្គរថ្មីនេះ ដែលមានចម្ងាយប្រមាណ ៥០គីឡូម៉ែត្រ ពីទីប្រាសាទអង្គវត្ត គឺជាចក្ខុវិស័យវែងឆ្ងាយ របស់សម្ដេចតេជោ ហ៊ុន សែន គឺការអភិវឌ្ឍ និងការអភិរក្ស។
ក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការ អាកាសយានដ្ឋានអន្តរជាតិសៀមរាបអង្គរ នាព្រឹកថ្ងៃទី១៦ ខែវិច្ឆិកា ឆ្នាំ២០២៣ សម្ដេចធិបតី ហ៊ុន ម៉ាណែត មានប្រសាសន៍ថា ការសម្ពោធដាក់ឲ្យប្រើប្រាស់ ព្រលានយន្ដហោះនេះ គឺជាប្រវត្តិសាស្ដ្រមួយ ដែលមានលក្ខណៈទំនើប អាចទទួលបានជើងយន្ដហោះច្រើន ហើយក៏ជាសមិទ្ធផលមួយ មិនមែនសម្រាប់តែបច្ចុប្បន្ន ប៉ុន្ដែជាការត្រៀមលក្ខណៈសម្រាប់អនាគត។
សម្ដេចធិបតីនាយករដ្ឋមន្ដ្រី មានប្រសាសន៍បន្តថា «ការសម្រេចចិត្តកសាងព្រលានយន្ដហោះថ្មីនៅទីនេះ ប្ដូរពីទីតាំងចាស់ កន្លងទៅមានបងប្អូនមានការចាប់អារម្មណ៍ ថាហេតុអ្វីបានជាយើងចាំបាច់លើកព្រលានយន្ដហោះមួយ៥គីឡូពីអង្គរ មកដល់៥០គីឡូពីអង្គរ ការរៀបចំ និងជ្រើសរើសទីតាំង គឺផ្អែកលើចក្ខុវិស័យវែងឆ្ងាយរបស់ សម្ដេចតេជោ គឺការរៀបចំអភិវឌ្ឍន៍នៅទីនេះ គឺជាមិត្តរូបនៃការរុញការងារពីរ រួមមាន៖ ទីមួយ គឺការអភិវឌ្ឍ និងទីពីរ គឺការអភិរក្ស ត្រូវដើរទន្ទឹមគ្នា»។
សម្ដេចធិបតី ក៏បានរៀបរាប់ថា ការអភិវឌ្ឍ គឺការរៀបចំកសាងហេដ្ឋារចនាសម្ព័ន្ធទំនើបដែលព្រលាននៅទីនេះ ដោយចាត់ទុកថា «ព្រលានយន្ដហោះទំនើប» នឹងត្រៀមការហោះហើរច្រើនជើង។ ចំពោះការអភិរក្ស គឺជាការរក្សាកេរតំណែល របស់ដូនតាខ្មែរ។ សម្ដេចលើកឡើងថា សមិទ្ធផលអាកាសយានដ្ឋាន អន្តរជាតិសៀមរាប-អង្គរថ្មី គឺបានបង្ហាញពីចំណង ទំនាក់ទំនង ដែកថែបដ៏លេចធ្លោររវាងកម្ពុជា និងចិន។
សូមរំលឹកថា ផ្លូវអាកាស គឺជាអាទិភាពគន្លឹះទី២ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ ដំណាក់កាលទី១។ មិនតែប៉ុណ្ណោះ ជាកិច្ចការអាទិភាពទី២ នៃបញ្ចកោណទី២ ដោយផ្តោតលើការលើកកម្ពស់ការតភ្ជាប់ និងការបង្កើនប្រសិទ្ធភាព នៃវិស័យដឹកជញ្ជូន និងឡូជីស្ទិក ដែលមានគោលដៅយុទ្ធសាស្ត្រ ផ្តោតលើការបង្កើន ប្រសិទ្ធភាពហេដ្ឋារចនាសម្ព័ន្ធគាំទ្រ ការកសាង និងការអភិវឌ្ឍហេដ្ឋារចនាសម្ព័ន្ធថ្មីៗ ៕
