ថ្នាក់ដឹកនាំ នាយទាហាន នាយទាហានរង កងពលធំអន្តរាគមន៍លេខ៣ ប្រមាណ ២៥០នាក់ ស្ម័គ្រចិត្តបរិច្ចាគឈាមជូនមន្ទីរសុខាភិបាលខេត្តព្រះវិហារ

ភ្នំពេញ៖ ថ្នាក់ដឹកនាំ នាយទាហាន នាយទាហានរង កងពលធំអន្តរាគមន៍លេខ៣ ប្រមាណ ២៥០នាក់ ស្ម័គ្រចិត្តបរិច្ចាគឈាមជូនមន្ទីរសុខាភិបាលខេត្តព្រះវិហារ ដើម្បីអបអរសាទរខួបអនុស្សាវរីយ៍លើកទី៧០ ទិវាកំណើតកងយោធពលខេមរភូមិន្ទ (១៩៥៣-២០២៣) ។

ពិធីនេះធ្វើឡើងនៅថ្ងៃទី១ ខែវិច្ឆិកា ឆ្នាំ២០២៣ ក្រោមអធិបតីភាព ឯកឧត្តម គីម រិទ្ធី អភិបាលខេត្តព្រះវិហារ និងឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការ កងពលធំអន្តរាគមន៍លេខ៣ និងវត្តមាន ឯកឧត្តម វេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ ព្រមទាំង ប្រតិភូអមដំណើរ និងក្រុមមន្ត្រីជំនាញសុខាភិបាល ខេត្តព្រះវិហារ ព្រមទាំង ឯឧត្តម មេបញ្ជាការ មេបញ្ជាការរង នាយទាហាន និងពលទាហាន កងពលធំអន្តរាគមន៍លេខ៣ ។

ក្នុងនាម ឯកឧត្ដម មេបញ្ជាការ កងពលធំ នាយ-ពលទាហាន សូមសម្តែងនូវមនោសញ្ចេតនារំភើបរីករាយឥតឧបមា នៅក្នុងពិធីបរិច្ចាគឈាម ដើម្បីអបអរសាទរខួបអនុស្សាវរីយ៍លើកទី៧០ នៃទិវាកំណើតកងយោធពលខេមរភូមិន្ទនាពេលនេះ អង្គភាពបានរៀបចំ នាយ-ពលទាហានស្ម័គ្រចិត្តបរិច្ចាគឈាម មកពីបណ្តាការិយាល័យ កងឯកភាព និងវរសេនាតូច ចំណុះទីបញ្ជាការកងពលធំអន្តរាគមន៍លេខ៣ សរុបចំនួន ២៥០នាក់ (គ្រប់ចំនួនតាមការស្នើសុំ) និងបានត្រៀមកម្លាំងបម្រុងមួយចំនួនផ្សេងទៀត ក្នុងករណីចាំបាច់ជាក់ស្តែងណាមួយ ។ អង្គភាពក៍បានរៀបចំចាត់តាំងក្រុមគ្រូពេទ្យ របស់ទីបញ្ជាការកងពលធំ ១ក្រុម ចំនួន១០រូប ដើម្បីសហការនិងជួយសម្របសម្រួលរាល់ការងារចាំបាច់នានា ជាមួយមន្ត្រីជំនាញសុខាភិបាលខេត្ត ក្នុងពេលប្រារព្ធពិធីបរិច្ចាគឈាមនេះ រហូតដល់បញ្ចប់ផងដែរ។

ក្នុងនោះដែរ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ បានមានប្រសាសន៍សំណេះសំណាលសាកសួរសុខទុក្ខ ដល់នាយ និងពលទាហាន និងកោតសរសើរយ៉ាងក្រៃលែង ចំពោះវីរភាពអង់អាចក្លាហាន របស់នាយទាហាន នាយទាហានរង និងពលទាហាន កងពលធំអន្តរាគមន៍លេខ៣ និងកងតូចអន្តរាគមន៍ចំណុះទាំង៣ ដែលបានបូជាអាយុជីវិត សាច់ស្រស់ឈាមស្រស់ ក្នុងបុព្វហេតុការពារបូរណភាពទឹកដី ជាតិ សាសនា ព្រះមហាក្សត្រ និងនាយករដ្ឋមន្ត្រី នៃព្រះរាជាណាចក្រកម្ពុជា ជាពិសេសបំផុតក្នុងថ្ងៃនេះ ឯកឧត្ដម មេបញ្ជាការ មេបញ្ជាការរង នាយ-ពលទាហាន កងពលធំអន្តរាគមន៍លេខ៣ បានស្ម័គ្រចិត្តបរិច្ចាគឈាមស្រស់សម្រាប់ជួយសង្គ្រោះដល់ប្រជាជនគ្រប់រូប គ្រប់មជ្ឍដ្ឋាន គ្រប់ឋានៈ វណ្ណៈ មិនប្រកាន់ពូជសាសន៍ ដោយក្តីស្រឡាញ់ពេញបេះដូង។

សូមបញ្ជាក់ផងដែរថា ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ ក៍រួមចំណែកស្ម័គ្រចិត្ត បរិច្ចាគឈាមជូនមន្ទីរសុខាភិបាលខេត្តព្រះវិហារ ដើម្បីអបអរសាទរខួបអនុស្សាវរីយ៍លើកទី៧០ នៃទិវាកំណើតកងយោធពលខេមរភូមិន្ទ(១៩៥៣-២០២៣)ដោយក្តីស្រឡាញ់ពេញបេះដូង របស់ឯកឧត្តមផងដែរ ៕