ឯកឧត្ដមបណ្ឌិត ជ្រុន ថេរ៉ាវ៉ាត ចុះត្រួតពិនិត្យ និងវាយតម្លៃ លើគម្រោងជួសជុលផ្លូវល្បាយក្រួសចំនួន២គម្រោង ក្នុងស្រុកព្រះនេត្រព្រះ និងស្រុកអូរជ្រៅ

ភ្នំពេញ៖ ឯកឧត្ដមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃអង្គារ ២រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣១ ខែតុលា ឆ្នាំ២០២៣ បានដឹកនាំគណ:ប្រតិភូ ដោយមានការអញ្ចើញចូលរួមពីឯកឧត្តម សាន វិសាល រដ្ឋលេខាធិការ,ឯកឧត្តម ហួត សារឹម អនុរដ្ឋលេខាធិការ,មន្រ្តីជំនាញនាយកដ្ឋានផ្លូវលំ, មន្រ្តីលេខាធិការដ្ឋានដ្ឋាន PU និងតំណាងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃ លើគម្រោងជួសជុលផ្លូវល្បាយក្រួសចំនួន២គម្រោងដូចខាងក្រោម៖
-គម្រោងទី១ ជាផ្លូវល្បាយក្រួស មានប្រវែង១២ ៦០០ម៉ែត្រ ចំណុចចាប់ផ្ដើមពីភូមិរំដួលទៅភូមិកំបោរ ឃុំភ្នំលាភ ស្រុកព្រះនេត្រព្រះ
-គម្រោងទី២ ជាផ្លូវល្បាយក្រួស មានប្រវែង១១ ១០០ម៉ែត្រនៅពីផ្លូវជាតិលេខ៥ ភូមិអញ្ចាញ ទៅភូមិពន្លិច ឃុំសំរោង ស្រុកអូរជ្រៅ។

សូមបញ្ចាក់ថាផ្លូវទាំង២គម្រោងនេះ ជាផ្លូវអន្តរាគមន៍បន្ទាន់ទឹកជំនន់ឆ្នាំ២០២២ ស្ថិតក្រោមការស្ថាបនាដោយនាយកដ្ឋានវិស្វកម្មក្រសួងការពារជាតិ។

ជាលទ្ធផលគណ:ប្រតិភូអន្តរក្រសួងបានពិនិត្យដោយយកចិត្តទុកដាក់បំផុត ទាំងគុណភាព សោភណ្ឌភាព និងសុវត្ថិភាព បានយល់ព្រម និងឯកភាពទទួលយកការជួសជុលផ្លូវទាំង២គម្រោងនេះ។

ជាចុងក្រោយប្រតិភូអន្តរក្រសួងបានណែនាំឲ្យប្រជាពលរដ្ឋចូលរួមថែរក្សាផ្លូវនេះ កុំឲ្យដឹកលើទម្ងន់កំណត់ កុំចាក់ដីឲ្យខ្ពស់ជាងផ្លូវ និងជាពិសេសចូលរួមគោរពច្បាប់ចរាចរផ្លូវគោកទាំងអស់គ្នា ៕