ឯកឧត្តម ញ៉ែម សំអឿន ដឹកនាំកិច្ចប្រជុំបូកសរុបលទ្ធផលការងាររយៈពេល៩ខែ(មករា-កញ្ញា) និងលើកទិសដៅការងារបន្ត ត្រីមាសទី៤ ឆ្នាំ២០២៣ របស់សាខាកាកបាទក្រហមកម្ពុជាខេត្តរតនគិរី

ភ្នំពេញ៖ ឯកឧត្តម ញ៉ែម សំអឿន ប្រធានគណៈកម្មាធិការសាខាកាកបាទក្រហមកម្ពុជាខេត្តរតនគិរី នារសៀលថ្ងៃទី២៩ ខែកញ្ញា ឆ្នាំ២០២៣ បានដឹកនាំកិច្ចប្រជុំបូកសរុបលទ្ធផលការងាររយៈពេល៩ខែ(មករា-កញ្ញា) និង លើក ទិសដៅការងារបន្តត្រីមាសទី៤ ឆ្នាំ២០២៣ របស់សាខា កាកបាទក្រហមកម្ពុជាខេត្តរតនគិរី នៅសាលប្រជុំ អគារB សាលាខេត្ត។

របៀបវារៈសំខាន់ៗចំនួន៤ត្រូវបានដាក់ជូនអង្គប្រជុំពិនិត្យ និងពិភាក្សារួមមាន៖
១. ពិនិត្យកំណត់ហេតុកិច្ចប្រជុំនាពេលកន្លងមក។
២. បទបង្ហាញរបាយការណ៍បូកសរុបលទ្ធផលការងារ និងការងារហិរញ្ញវត្ថុរយៈពេល៩ខែ (មករា-កញ្ញា)ឆ្នាំ២០២៣។
៣.កិច្ចពិភាក្សាស្តីពីការរៀបចំរាត្រីសមោសរ។
៤.ការបូកសរុបនិង បិទកិច្ចប្រជុំដោយឯកឧត្តមប្រធានគណៈកម្មាធិការសាខា។

ថ្លែងបើកកិច្ចប្រជុំ ឯកឧត្តម ញ៉ែម សំអឿន បានមានប្រសាសន៍ថា កិច្ចប្រជុំនេះ គឺរៀបចំឡើងដើម្បីពិនិត្យរៀបចំនូវរបាយការណ៍ ហិរញ្ញវត្ថុ និង បូកសរុបលទ្ធផលអនុវត្តការងារក្នុងវិស័យអាទិភាពទាំងបួនរួមមាន៖ ការគ្រប់គ្រងគ្រោះមហន្តរាយ វិបត្តិភ័យ និងបម្រែបប្រួលអាកាសធាតុ ការងារសុខភាព និងការថែទាំសុខភាព ក្នុងសហគមន៍ ការងារលើកកម្ពស់គោលការណ៍គ្រឹះ និងតម្លៃមនុស្សធម៌ការងារអភិវឌ្ឍស្ថាប័ន និងអភិវឌ្ឍន៍ធនធាន និងបញ្ហា ប្រឈមផ្សេងៗ។

ជាមួយគ្នានោះដែរ ឯកឧត្តម ញ៉ែម សំអឿន បានពិភាក្សាជាមួយអង្គប្រជុំ និងដាក់ចេញនូវទិសដៅ បន្តសម្រាប់ត្រីមាសទី៤ ឆ្នាំ២០២៣ រួមមាន៖
១. ត្រៀមលក្ខណៈ រៀបចំរាត្រីសមោសរ ឆ្នាំ ២០២៣ និងការងារសមាជិកភាពប្រចាំឆ្នាំ ដើម្បីកៀរគររកមូលនិធិ ពីសប្បុរសជនគ្រប់មជ្ឈដ្ឋាន សម្រាប់បន្តកិច្ចការមនុស្សធម៌ ជួយដល់ ប្រជាពលរដ្ឋរងគ្រោះងាយរងគ្រោះ និងជួបវិបត្តិភ័យផ្សេងៗ។
២. សហការជាមួយអាជ្ញាធរគ្រប់កំរិត បន្តអនុវត្តការងារសំខាន់ៗក្នុងវិស័យអាទិភាពទាំង៤ ពិសេសបន្តបញ្ជ្រាបការផ្សព្វផ្សាយ ការលើកកម្ពស់ការយល់ដងពីសុវត្ថិភាពចរាចរណ៍ ការប្រែប្រួលអាកាសធាតុ ការងារសុខភាពសហគមន៍ និងបន្តចុះសួរសុខទុក្ខបងប្អូនប្រជាពលរដ្ឋរងគ្រោះ និងងាយរងគ្រោះតាមលទ្ធភាពសាខា ៕