ឧត្តមសេនីយ៍ទោ ឡោ សុខា ដឹកនាំកិច្ចប្រជុំស្តីពីការអនុវត្តវិធានការរឹតបន្តឹងអនុវត្តច្បាប់ចរាចរណ៍ផ្លូវគោក ដល់អធិការនគរបាលក្រុងស្រុកទាំងប្រាំ
ភ្នំពេញ៖ កាលពីរសៀលថ្ងៃសុក្រ ១កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹង ថ្ងៃទី១៥ ខែកញ្ញា ឆ្នាំ២០២៣ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគីរី បានអញ្ជើញដឹកនាំកិច្ចប្រជុំស្តីពី ការអនុវត្តវិធានការរឹតបន្តឹងអនុវត្តច្បាប់ចរាចរណ៍ផ្លូវគោកដល់ការិយាល័យចរាចរណ៍ នៃស្នងការដ្ឋាននគរបាលខេត្ត ព្រមទាំងលោកអធិការនគរបាលក្រុងស្រុកទាំងប្រាំ។
កិច្ចប្រជុំនេះធ្វើឡើងនៅសាលប្រជុំស្នងការដ្ឋាននគរបាលខេត្ត ព្រមទាំងមានអញ្ជើញចូលរួមពី លោកឧត្តមសេនីយ៍ត្រី ចាន់ ទិត្យ ស្នងការរងទទួលការងារចរាចរណ៍ព្រមទាំងលោក លោកស្រីដែលជាប្រធានអនុប្រធានការិយាល័យចរាចរណ៍ និងមន្រ្តីនគរបាលក្រោមឱវាទ ព្រមទាំងលោកអធិការនគរបាលក្រុងស្រុកទាំងប្រាំ ដែលបានចូលរួមក្នុងកិច្ចប្រជុំនាឱកាសនោះ។
កិច្ចប្រជុំចាប់ផ្តើម លោកឧត្តមសេនីយ៍ទោ ឡោ សុខា ស្នងការនគបាលខេត្ត បានមានប្រសាសន៍ណែនាំដល់ស្នងការរងទទួលការងារចរាចរណ៍ និងអស់លោកដែលជានាយ នាយរងការិយាល័យចរាចរណ៍ និងមន្រ្តីនគរបាលចរាចរណ៍ក្រោមឱវាទព្រមទាំងលោកអធិការនគរបាលក្រុងស្រុកទាំងប្រាំ ត្រូវធ្វើការផ្សព្វផ្សាយ ស្តីពីការអនុវត្តនូវវិធានការរឹតបន្តឹងការអនុវត្តច្បាប់ចរាចរណ៍ផ្លូវគោក អោយបានមុនក្នុងរយ:ពេល៧ថ្ងៃ ជាមុនសិនមុនពេលយើងធ្វើការចុះអនុវត្តច្បាប់ ជៀសវាងមានការរិះគន់ពីប្រជាពលរដ្ឋ។ ដោយក្នុងរយៈពេលកន្លងមកនេះ យើងសង្កេតនិងមើលឃើញថា គ្រោះថ្នាក់ចរាចរណ៍នៅតែជាបញ្ហាប្រឈម ទើបយើងប្រញាប់ប្រញាល់ ដើម្បីពិនិត្យនិងដាក់ចេញនូវគោលការណ៍ក្នុងការអនុវត្តបន្ត ដើម្បីឲ្យស្របទៅនឹងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧។
ទន្ទឹមនោះផងដែរ លោកឧត្តមសេនីយ៍ទោ ស្នងការ ក៏បានមានប្រសាសន៍បន្តទៀតថា ដើម្បីអនុវត្តច្បាប់ចរាចរណ៍ផ្លូវគោកអោយកាន់តែល្អប្រសើរ និងមានប្រសិទ្ធភាពខ្ពស់នោះ មន្រ្តីជំនាញត្រូវធ្វើការអប់រំផ្សព្វផ្សាយដល់ប្រជាពលរដ្ឋក្នុងមូលដ្ឋាន ឱ្យបានទូលំទូលាយ ដោយគូសបញ្ជាក់អំពីគោលបំណង នៃការអនុវត្តច្បាប់និងណែនាំដល់គ្រប់មន្ត្រីនគរបាលចរាចរណ៍ទាំងអស់ ក៏ត្រូវគោរពវិន័យ បទបញ្ជាជាពិសេសពេលចុះបំពេញការងារ ត្រូវអនុវត្តការងារប្រកបដោយ តម្លាភាព សុក្រឹត្យភាព វិជ្ជាជីវៈ អាកប្បកិរិយា សុភាពរាបសារ ទន់ភ្លន់មិនទន់ជ្រាយម៉ត់ចត់និងការងារ និង ក្រមសីលធម៌ ត្រូវបន្តពង្រឹងការសម្រួលចរាចរណ៍ដល់សិស្សានុសិស្សចេញចូលសាលារៀនឱ្យបានជាប់ជាប្រចាំ នៅតាមបណ្តាលក្រុងស្រុករបស់ខ្លួន កុំឱ្យមានករណីគ្រោះថ្នាក់ចរាចរណ៍កើតមានឡើងជាយថាហេតុណាមួយ ដែលយើងមិនបានដឹងជាមុន។
មុននិងបញ្ចប់លោកឧត្តមសេនីយ៍ទោ ស្នងការ បានជូនពរដល់កម្លាំងទាំងអស់សូមជួបប្រទះ តែពុទ្ធពរទាំងបួនប្រការ គឺ អាយុ វណ្ណៈ សុខៈ ពល: កុំបីឃ្លៀងឃ្លាតឡើយ ៕
