ភ្នំពេញ៖ នៅថ្ងៃទី២៥ ខែកក្កដា ឆ្នាំ២០២៣ គ្រួសារកសិករមកពីភូមិ ស្រះសំបួរ ឃុំពង្រ ស្រុកតាំងគោក ខេត្តកំពង់ធំ បានប្រទះសត្វខ្សឹបញីមួយក្បាល Bengal Florican (Houbaropsis bengalensis) នៅពេលយប់។ ដោយមើលឃើញថា សត្វមានសភាពទន់ខ្សោយនិងមានជំងឺ កសិករបានសម្រេចចិត្តជួយសង្គ្រោះ ដោយនាំយកសត្វខ្សឹបញីមួយក្បាលនេះមកផ្ទះ។
នាព្រឹកបន្ទាប់ សមាជិកសហគមន៍បានទាក់ទង ទៅក្រុមការងារគម្រោងរបស់អង្គការ WCS ប្រចាំតំបន់ទេសភាពបឹងទន្លេសាប ដើម្បីស្នើសុំជំនួយក្នុងការជួយសង្គ្រោះ សត្វស្លាបជិតផុតពូជបំផុតមួយនេះ ដែល បច្ចុប្បន្ននៅប្រទេសកម្ពុជា ប្រភេទសត្វស្លាបដ៏កម្រនេះមានវត្តមាន តែនៅតំបន់វាលស្មៅលិចទឹក នៃទំនាបបឹងទន្លេសាបប៉ុណ្ណោះ។
អង្គការ WCS និង មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) បានសហការគ្នាលើការជួយសង្គ្រោះសត្វខ្សឹបញីមួយនេះ។ ពេទ្យសត្វរបស់អង្គការ ACCB បានធ្វើការវាយតម្លៃសុខភាព និងផ្តល់ការថ្នាំព្យាបាលនៅទីតាំងសង្គ្រោះ បន្ទាប់មកវាត្រូវបានផ្ទេរទៅកន្លែងដាក់ឱ្យនៅដាច់ពីគេនៅក្នុងមជ្ឈមណ្ឌល (ACCB) ។ សត្វខ្សឹប គឺងាយនឹងទទួលរងនូវស្ថានភាពថប់អារម្មណ៍ធ្ងន់ធ្ងរ ដែលអាចប៉ះពាល់ដល់សុខភាព និងសុខុមាលភាពរបស់ពួកគេយ៉ាងខ្លាំង ហើយវាក៏បានស្ថិតនៅក្រោមការឃ្លាំមើលយ៉ាងដិតដល់ពីក្រុមការងារ ACCB ។
ជាសំណាងល្អ បក្សីបានបង្ហាញពីសញ្ញាប្រសើរឡើងនៃការជាសះស្បើយក្នុងរយៈពេលពីរទៅបីថ្ងៃ បន្ទាប់ពីទទួលបានការព្យាបាល និងការថែទាំប្រកបដោយវិជ្ជាជីវៈដោយក្រុមដែលមានបទពិសោធន៍របស់អង្គការ ACCB ហើយវាហាក់ដូចជាបានសម្របខ្លួនបានយ៉ាងល្អទៅនឹងការស្ថិតនៅក្រោមការថែទាំរបស់មនុស្ស។
សត្វខ្សឹបញីដែលត្រូវបានជួយសង្គ្រោះមួយក្បាលនេះ មានគុណតម្លៃសេនេទិកសម្រាប់ចំនួនសត្វខ្សឹបផ្សេងទៀត ដែលត្រូវបានរក្សាទុកនៅអង្គការ ACCB ហើយដូច្នេះវានឹងត្រូវបានដាក់បញ្ចូលនៅក្នុងចំនួនប្រជាសាស្ត្រសត្វខ្សឹបដែលត្រូវធានាការថែទាំនៅ ACCB ។ ការធានាលើចំនួនប្រជាសាស្ត្រសត្វខ្សឹប នេះគឺជាផ្នែកមួយនៃយុទ្ធសាស្ត្រគ្រប់គ្រងផែនការអភិរក្ស ដែលត្រូវបានបង្កើតឡើងក្នុងភាពជាដៃគូរវាងក្រសួងបរិស្ថាន អង្គការ WCS ប្រចាំនៅកម្ពុជា និងអង្គការACCB ដើម្បីអភិរក្សប្រភេទសត្វព្រៃពីការវិនាសផុតពូជ។
