សិក្ខាកាមមកពីសាកលវិទ្យាល័យជាតិបាត់ដំបងប្រមាណជាង៦០នាក់ ចុះទស្សនកិច្ចសិក្សានៅស្ថានីយ៍ប្រព្រឹត្តកម្មទឹកកខ្វក់ទី៣ ក្នុងខេត្តព្រះសីហនុ ដើម្បីស្វែងយល់បន្ថែមអំពីការសាងសង់ និងបច្ចេកវិទ្យាថ្មីចុងក្រោយ MABR

ព្រះសីហនុ៖ នៅព្រឹកថ្ងៃទី២៤ ខែសីហា ឆ្នាំ២០២៣ នៅទីតាំង ស្ថានីយ៍ប្រព្រឹត្តកម្មទី៣ ក្នុងខេត្តព្រះសីហនុ មានសិក្ខាកាមប្រមាណជាង៦០នាក់ ជានិស្សិតវិស្វករសំណង់ស៊ីវិល និងបច្ចេកវិទ្យាព័ត៌មាន មកពីសាកលវិទ្យាល័យជាតិបាត់ដំបង បានចូលទស្សនកិច្ចសិក្សា អំពីសំណង់នានា និងសំណង់គម្រោងស្ថានីយ៍ប្រព្រឹត្តកម្មទឹកខ្វក់ទី៣ ដែលស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។ ស្ថានីយ៍នេះ ដំណើរការដោយស្វ័យប្រវត្តិ និងអាចគ្រប់គ្រងពីចម្ងាយ តាមរយៈប្រព័ន្ធបញ្ជាដ៏ទំនើប។

លោកបណ្ឌិត លី រិទ្ធ ជាអគ្គនាយកក្រុមហ៊ុន XWATER TECHNOLOGY CO.,LTD មានសេចក្តីសោមនស្សរីករាយជាខ្លាំង ពេលបានឃើញលោកគ្រូ អ្នកគ្រូ និងនិស្សិតទាំងអស់ ដែលបានមកទស្សនកិច្ចសិក្សាស្វែងយល់សំណង់នានា និងសំណង់គម្រោង ស្ថានីយ៍ប្រព្រឹត្តកម្មទឹកខ្វក់ទី៣នេះ។ ក្នុងដំណើរទស្សនកិច្ចនេះ លោកអគ្គនាយកក្រុមហ៊ុន បានធ្វើបទបង្ហាញដោយផ្ទាល់ នៅទីតាំងស្ថានីយ៍ទី៣ ដែលមានសមត្ថភាពប្រព្រឹត្តកម្មទឹកកខ្វក់បានប្រមាណជាង ២ម៉ឺនម៉ែត្រគូបក្នុងមួយថ្ងៃ ដោយប្រើប្រាស់បច្ចេកវិទ្យាចុងក្រោយ Membrane Aerated Biofilm Reactor (MABR)។

លោកអគ្គនាយកបានបន្តថា សមិទ្ធផលទាំងអស់បានលេចរូបរាងឡើងនៅពេលនេះ គឺមិនមែនជាភាពចៃដន្យនោះទេ គឺកើតចេញពីការប្រឹងប្រែងការងារជារួម ទាំងកម្លាំងកាយចិត្ត បទពិសោធន៍ចំណេះជំនាញ ឆ្លងកាត់ការយកចិត្តទុកដាក់ខ្ពស់ ដោយក្រុមការងារ XWater ដែលជាវិស្វករកូនខ្មែរ។ លោកបានបញ្ជាក់ថា តាមរយៈបទពិសោធន៍ការសាងសង់អាងប្រព្រឹត្តកម្មទាំង៣ទីតាំងនេះរួចមក កត់សម្គាល់ឃើញថា សមត្ថភាព និងស្មាដៃរបស់កូនខ្មែរយើងខំធ្វើឡើងមិនចាញ់បរទេសនោះទេ អាចប្រកួតប្រជែងលើឆាកអន្តរជាតិទៅថ្ងៃមុខបានថែមទៀតផង ទាំងគុណភាព តម្លៃសាងសង់ជាដើម។

ជាចុងក្រោយលោកបណ្ឌិត លី រិទ្ធ ជាអគ្គនាយកក្រុមហ៊ុន XWATER TECHNOLOGY CO.,LTD បានណែនាំ និងលើកទឹកចិត្តដល់និសិ្សតកំពុងសិក្សាជំនាញវិស្វកម្មសំណង់ស៊ីវិល និងបច្ចេកវិទ្យាព័ត៌មាន មកពីសាកលវិទ្យាល័យជាតិបាត់ដំបង ឱ្យខិតខំប្រឹងប្រែងសិក្សាស្វែងយល់ ឱ្យកាន់តែច្រើនបន្ថែមទៀតលើជំនាញរបស់ខ្លួន កំពុងតែចាប់យក ស្របពេលខេត្តព្រះសីហនុកំពុងមានស្ថានីយ៍ប្រព្រឹត្តកម្មចំនួន៣កន្លែងកំពុងដាក់ឱ្យដំណើរការ សុទ្ធតែជាស្នាដៃរបស់វិស្វករកូនខ្មែរ។

ជាក់ស្តែង ក្រុមនិសិ្សត រំពឹងថា ស្ថានីយ៍ប្រព្រឹត្តកម្មទឹកកខ្វក់នឹងមានក្លិនមិនល្អ ដោយសារតែជាទីតាំងប្រមូលទឹកកាកសំណល់ពីប្រភពផ្សេងៗនៅក្នុងក្រុង។ ផ្ទុយទៅវិញ ដំណើរទស្សនកិច្ចគឺ ពុំមានក្លិនស្អុយភាយចេញមកក្រៅឡើយ។ នេះសបញ្ជាក់ឱ្យឃើញ ពីប្រសិទ្ធដ៏ខ្ពស់របស់បច្ចេកវិទ្យា MABR ក្នុងការបំបែកសារធាតុពុលត្រឹមរយៈពេលខ្លី និងសន្សំសំចៃថាមពលអគ្គិសនី។ បច្ចេកវិទ្យានេះ ពិតជាសមស្រប សម្រាប់តំបន់ឆ្នេរទេសចរណ៍ ដូចក្រុងព្រះសីហនុ។

ដោយមើលពីការអភិវឌ្ឍ យ៉ាងឆាប់រហ័សនៅខេត្តព្រះសីហនុនាពេលបច្ចុប្បន្ន ក្រៅពីដំណើរទស្សនកិច្ចសិក្សា នៅសំណង់នានា និងសំណង់គម្រោងស្ថានីយ៍ប្រព្រឹត្តកម្មទឹកខ្វក់ទី៣ លោកគ្រូ អ្នកគ្រូ និងនិសិ្សតប្រមាណជាង៦០នាក់ក៏បានទៅទស្សនានៅតាមបណ្តារម្មណីយដ្ឋានផ្សេងៗទៀតក្នុងខេត្តព្រះសីហនុផងដែរ។

គូសបញ្ជាក់ដែរថា ស្ថានយ៍អាងប្រព្រឹត្តកម្មទឹកកខ្វក់ទី៣ បានចាប់ផ្តើមការសាងសង់ឡើងកាលពីថ្ងៃទី១៨ ខែកញ្ញា ឆ្នាំ២០២១ ហើយចាប់ដំណើរការចម្រោះនាថ្ងៃទី០៨ ខែសីហា ឆ្នាំ២០២៣កន្លងទៅនេះ៕