ក.ប.ប. សហការជាមួយ GIZ រៀបចំ «វេទិកាពិភាក្សាតុមូលពាក់ព័ន្ធនឹងការអនុវត្តច្បាប់របស់អគ្គនាយកដ្ឋាន ក.ប.ប.»
ភ្នំពេញ៖ នាថ្ងៃទី១៦ ខែសីហា ឆ្នាំ២០២៣ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» នៃក្រសួងពាណិជ្ជកម្ម សហការជាមួយទីភ្នាក់ងារសហប្រតិបត្តិការអាល្លឺម៉ង់ (GIZ) បានរៀបចំ «វេទិកាពិភាក្សាតុមូលពាក់ព័ន្ធនឹងការអនុវត្តច្បាប់របស់អគ្គនាយកដ្ឋាន ក.ប.ប.» នៅទីស្នាក់ការអគ្គនាយកដ្ឋាន ក.ប.ប. ក្រោមអធិបតីភាពរបស់លោក ឃួន សាវុធ អគ្គនាយករង តំណាងដ៏ខ្ពង់ខ្ពស់ ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. និងលោកស្រី សេង ដាលីន ទីប្រឹក្សាសម្រាប់កិច្ចសហប្រតិបត្តិការសេដ្ឋកិច្ចនិងការអភិវឌ្ឍន៍វិស័យឯកជន (GIZ)។
សមាសភាពចូលរួមក្នុងវេទិកាខាងលើរួមមាន ឯកឧត្តម លោកជំទាវ លោកអគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានសាខា ក.ប.ប. រាជធានី ខេត្ត ប្រធានការិយាល័យ អនុប្រធានការិយាល័យ មន្ត្រីរាជការនៃអគ្គនាយកដ្ឋាន ក.ប.ប. សរុបប្រមាណ ១៦០នាក់។
គោលបំណងនៃវេទិកានេះ គឺផ្តល់ឱកាសដល់សិក្ខាកាមទាំងអស់ក្នុងការចែករំលែកបទពិសោធន៍ល្អៗទៅវិញទៅមក និងពិភាក្សាលើបញ្ហាថ្មីៗដែលកើតមានទ្បើងរបស់មន្រ្តីអនុវត្តច្បាប់ពាក់ព័ន្ធនឹងកិច្ចការការពារអ្នកប្រើប្រាស់ កិច្ចការប្រកួតប្រជែង ការបង្ក្រាបការក្លែងបន្លំនិងបទល្មើសនានា ជាពិសេសក្នុងវិស័យប្រេងឥន្ធនៈ ការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា និងអាជីវកម្មស្រាស។ល។ ក្រោមអាណត្តិរបស់អគ្គនាយកដ្ឋាន ក.ប.ប.។ ទន្ទឹមនឹងនេះក៏បានជួយពង្រឹងការយល់ដឹងបន្ថែមពីរបៀបនៃការសរសេរកំណត់ហេតុ របៀបកសាងសំណុំរឿងទៅតុលាការ និងបទពិសោធន៍ការងារនាពេលកន្លងមក។
ជាមួយគ្នានេះផងដែរវេទិកាតុមូលនេះនឹងបញ្រ្ជាបការយល់ដឹងព្រមទាំងពង្រឹងសមត្ថភាពដល់មន្ត្រីអនុវត្តច្បាប់នៃអគ្គនាយកដ្ឋាន ក.ប.ប. ឱ្យបានយល់ដឹងកាន់តែស៊ីជម្រៅអំពីច្បាប់ និងបទប្បញ្ញត្តិពាក់ព័ន្ធនានា ដើម្បីលើកកម្ពស់សិទ្ធិនិងផលប្រយោជន៍របស់អ្នកប្រើប្រាស់ ធានាបាននូវបរិយាកាសប្រកួតប្រជែងដោយស្មើភាព និងពង្រឹងសមត្ថភាពដល់មន្ត្រីស៊ើបអង្កេតនៃអគ្គនាយកដ្ឋាន ក.ប.ប. ក្នុងការអនុវត្តច្បាប់ និងបទប្បញ្ញត្តិទាំងនោះធ្វើយ៉ាងណាឱ្យទទួលបានប្រសិទ្ធភាព និងប្រសិទ្ធផលខ្ពស់៕
