នាយឧត្តមសេនីយ៍ គៀត ច័ន្ទថារិទ្ធ ដឹកនាំកិច្ចប្រជុំជាមួយក្រុមការងាររៀបចំ និងតាមដានកិច្ចប្រជុំប្រចាំឆ្នាំរបស់អគ្គនាយកអន្តោប្រវេសន៍ និងប្រធានកុងស៊ុលអាស៊ាន

ភ្នំពេញ៖​ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នារសៀលថ្ងៃចន្ទ ១៥រោច ខែបឋមាសាឍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៧ ខែកក្កដា ឆ្នាំ២០២៣ បានដឹកនាំកិច្ចប្រជុំជាមួយក្រុមការងាររៀបចំ និងតាមដានកិច្ចប្រជុំប្រចាំឆ្នាំរបស់អគ្គនាយកអន្តោប្រវេសន៍ និងប្រធានកុងស៊ុលអាស៊ាន (ហៅកាត់ DGICM) ជាមួយតំណាងដៃគូសន្ទនាអូស្ត្រាលី ដើម្បីត្រៀមរៀបចំចូលរួមកិច្ចប្រជុំ DGICM លើកទី២៦ និងកិច្ចបករជុំពាក់ពន្ធ័ នៅខែសីហា ឆ្នាំ២០២៣ ខាងមុខនេះ ដែលនឹងរៀបចំឡើងនៅប្រទេសថៃ។

ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក បានពិនិត្យលើឯកសារ និងបានធ្វើការពិភាក្សាជាមួយតំណាងភាគីអូស្ត្រាលី ក្នុងការបន្តពង្រឹងកិច្ចសហប្រតបត្តិការក្នុងនាមជាដៃគូសន្ទនារបស់អាស៊ាន ក៏ដូចជាDGICM តាមរយៈការបន្តផ្តល់ជូនវគ្គបណ្តុះបណ្តាលនានាដែលចាំបាច់ក្នុងការអភិវឌ្ឍធនធានមនុស្ស ជូនមន្ត្រីអន្តោប្រវេសន៍អាស៊ាន។

ជាការឆ្លើយតបតំណាងភាគីអូស្ត្រាលីនឹងបន្តពិចារណាចំពោះសំណូមពរនានាពីគ្រប់បណ្តាប្រទេសសមាជិកអាស៊ាន លើកាតផ្តល់ជូនវគ្គបណ្តុះបណ្តាលសមស្របទៅតាមបរិបទ និងតាមការស្នើសុំ។

ជាកិច្ចបញ្ចប់ ឯកឧត្តម នាយឧត្តមសេនីយ៍ បានធ្វើការថ្លែងអំណរគុណចំពោះកិច្ចសហប្រតិបត្តិការកន្លងមក និងសង្ឃឹមថាអង្គភាពទាំងពីរបន្តកិច្ចសហប្រតិបត្តិការឱ្យកាន់តែប្រសើរឡើង ៕