អំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ តាមរយៈអាជ្ញាធរខេត្តមណ្ឌលគិរី បន្តនាំយកផ្តល់ជូនគ្រួសារខ្វះខាតចំនួន ៣គ្រួសារ នៅស្រុកអូររាំង

ភ្នំពេញ៖ គ្រឿងឧបភោគបរិភោគ និងថវិកាមួយចំនួន ត្រូវបានក្រុមការងារយុវជនទិសអាគ្នេហ៍ របស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី តាមរយៈអាជ្ញាធរខេត្តមណ្ឌលគិរី និងសហការី នាព្រឹកថ្ងៃទី២៨ ខែមិថុនា ឆ្នាំ២០២៣ បានបន្តនាំយកទៅចែកជូនគ្រួសារចាស់ជរា គ្រួសារក្រីក្រកូនច្រើន និងកុមារកំព្រា នៅភូមិអណ្តូងក្រឡឹង និងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី។

លោក នួន សារ៉ន អភិបាលខេត្តស្តីទី និងលោក ងិន សុវិមាន ប្រធានកិត្តិយសសមាគមយុវជនទិសអាគ្នេយ៍ (៥៤) ប្រចាំខេត្ត បានពាំនាំការផ្តាំផ្ញើសួរសុខទុក្ខពីសំណាក់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ក៏ដូចជាថ្នាក់ដឹកនាំខេត្តមណ្ឌលគិរី ដែលជានិច្ចកាល ថ្នាក់ដឹកនាំតែងតែយកចិត្តទុក្ខដាក់ និងគិតគូរពីសុខទុក្ខ និងការរស់នៅរបស់ប្រជាពលរដ្ឋទូទៅ ជាពិសេស ប្រជាពលរដ្ឋដែលជួបការលំបាក និងរងគ្រោះដោយប្រការផ្សេងៗ។ ជាក់ស្តែង ជនចាស់ជរា គ្រួសារក្រីក្រកូនច្រើន និងកុមារកំព្រាចំនួន ៣គ្រួសារនាពេលនេះ ទទួលបានអំណោយមួយចំនួន ដើម្បីជួយដោះស្រាយក្នុងជីវភាពរស់នៅបានមួយកម្រិត។

លោក នួន សារ៉ន ក៏បានណែនាំដល់ប្រជាពលរដ្ឋ ត្រូវខិតខំចិញ្ចឹមសត្វ និងដាំដុះដំណាំរួមផ្សំផ្សេងៗ ដើម្បីឲ្យជីវភាពរស់នៅមានលក្ខណៈសមរម្យ ជាពិសេស ត្រូវថែទាំសុខភាពឲ្យបានល្អ។ បន្ថែមលើសនេះ លោក នួន សារ៉ន ក៏បានអំពាវនាវដល់ប្រជាពលរដ្ឋទាំងអស់ ត្រូវចូលរួមបោះឆ្នោតជ្រើសរើសតំណាងរាស្រ្តនីតិកាលទី៧ ដែលប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ខាងមុខនេះឲ្យបានគ្រប់ៗគ្នា។

សូមបញ្ជាក់ថា អំណោយដែលផ្តល់ជូនគ្រួសារចាស់ជរា គ្រួសារក្រីក្រកូនច្រើន និងកុមារកំព្រា ចំនួន ០៣គ្រួសារនាពេលនេះរួមមាន៖ ក្នុងមួយគ្រួសារ ទទួលបានអង្ករ ៥០គីឡូ, មី ១កេស, ទឹកស៊ីអ៊ីវ ១យួរ, ទឹកត្រី ១យួរ, ត្រីខ ១យួរ, សារុង និងក្រមា និងថវិកា ១០មុឺនរៀល។ ដោយឡែកគ្រួសារដែលមានកូនតូចៗចំនួន ០៥នាក់ក្នុងបន្ទុក ក្រុមការងារបានជួយឧបត្ថម្ភថវិកាបន្ថែមចំនួន ៣០ម៉ឺនរៀល ដើម្បីទិញសង្ក័សីប្រក់ដំបូលផ្ទះ ៕