ឯកឧត្តម ហ៊ុន ម៉ានី អញ្ជើញដឹកនាំកិច្ចប្រជុំជាមួយលោកជំទាវ ទេព កូលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ

ភ្នំពេញ៖ នាព្រឹកថ្ងៃទី២៨ ខែមិថុនា ឆ្នាំ២០២៣ ក្នុងក្របខណ្ឌក្រុមប្រឹក្សាយុវជនគ្រឹះស្ថានឧត្តមសិក្សារបស់ ស.ស.យ.ក. ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អមដំណើរដោយឯកឧត្តមអនុប្រធាន និងថ្នាក់ដឹកនាំ ស.ស.យ.ក. បានអញ្ជើញដឹកនាំកិច្ចប្រជុំជាមួយលោកជំទាវ ទេព កូលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ និងជាសមាជិកគណៈដឹកនាំចលនាយុវជនស្ម័គ្រចិត្ត ស.ស.យ.ក. ប្រចាំគ្រឹះដ្ឋានឧត្តមសិក្សាឯកជន ព្រមទាំងគណៈគ្រប់គ្រង ថ្នាក់ដឹកនាំ នៃសាកលវិទ្យាល័យភ្នំពេញអន្តរជាតិ (PPIU)។

កិច្ចប្រជុំនេះ បានប្រព្រឹត្តទៅក្នុងគោលដៅដើម្បីស្តាប់នូវរបាយការណ៍វឌ្ឍនភាពរបស់សាកលវិទ្យាល័យ និងស្វែងយល់ពីស្ថានភាពនានា ជាពិសេសបន្តពិនិត្យលទ្ធភាព និងពិភាក្សាលើការងារអភិវឌ្ឍសមត្ថភាពយុវជនទាំងក្នុង និងក្រៅក្របខណ្ឌការងារស្ម័គ្រចិត្ត ស.ស.យ.ក. ធ្វើយ៉ាងណាពង្រីកការផ្ដល់ឱកាសដល់យុវជន និងនិស្សិតនៅសកលវិទ្យាល័យបន្ថែមទៀត។

ក្នុងជំនួបនាព្រឹកនេះ ឯកឧត្តម ហ៊ុន ម៉ានី បានធ្វើការកោតសរសើរ និងវាយតម្លៃខ្ពស់ចំពោះភាពរីកចម្រើន និងសមិទ្ធផលនានារបស់សាកលវិទ្យាល័យដែលសម្រេចបានក្រោមការដឹកនាំរបស់ថ្នាក់ដឹកនាំ លោកគ្រូ អ្នកគ្រូ សាស្រ្តាចារ្យ ជាពិសេសការផ្ដល់ឱកាសឱ្យយុវជនក្នុងសាកលវិទ្យាល័យ ផ្សារភ្ជាប់ខ្លួនជាមួយការចូលរួមក្នុងកិច្ចការសង្គម មនុស្សធម៌តាមរយៈសកម្មភាពនានាក្នុងក្របខណ្ឌក្រុមប្រឹក្សាយុវជនគ្រឹះស្ថានឧត្តមសិក្សានៃស.ស.យ.ក. បន្ថែមលើបេសកកម្មស្នូលរបស់ខ្លួនក្នុងការបណ្តុះបណ្តាលធនធានមនុស្ស។

ជាមួយគ្នានេះ មិនខុសពីសព្វមួយដង បន្ទាប់ពីជំនួបជាមួយគណៈដឹកនាំសាកលវិទ្យាល័យ ឯកឧត្តមប្រធាន នឹងបន្តជួបជាមួយ សមាជិក សមាជិកា ក្នុងរចនាស័ម្ពន្ធ ស.ស.យ.ក. ប្រចាំសាកលវិទ្យាល័យភ្នំពេញផងដែរ៕