ឯកឧត្តម វេង សាខុន ណែនាំដល់សមាជិកយុវជនបក្សថ្មីទាំង ៣,៤១៧នាក់ ត្រូវដឹងគុណវិរៈភាព និងការលះបង់របស់សម្តេចតេជោប្រធានគណបក្ស ដើម្បីបុព្វហេតុប្រទេសជាតិ និងសុខសន្តិភាពសម្រាប់ប្រជាជនយើង

ភ្នំពេញ៖ ឯកឧត្តម វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារគណបក្សចុះមូលដ្ឋានស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្ត​កំពង់ចាម នាសៀលថ្ងៃសៅរ៍ ៧រោច ខែជេស្ឋ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១០ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីជួបសំណេះសំណាលជាមួយសមាជិកយុវជនបក្សថ្មីសរុបចំនួន ៣,៤១៧នាក់ មកពីឃុំទ្រាន ឃុំរអាង ឃុំគៀនជ្រៃ ឃុំអំពិល និងឃុំរំចេក ស្រុកកំពង់សៀម ខេត្តកំពង់ចាម។

ក្នុងឱកាសនោះដែរ ឯកឧត្តម វេង សាខុន បានមានប្រសាសន៍ណែនាំដល់សមាជិកយុវជនបក្សថ្មីទាំង ៣,៤១៧នាក់ ត្រូវដឹងគុណវិរៈភាព និងការលះបង់ដ៏ធំធេងបំផុតរបស់សម្តេចតេជោ ប្រធានគណបក្ស ដើម្បីបុព្វហេតុប្រទេសជាតិ និងសុខសន្តិភាពសម្រាប់ប្រជាជនយើង។ សមាជិកយើងទាំងអស់ត្រូវរួមគ្នារក្សាម្លប់សន្តិភាពនេះឱ្យបានគង់វង្ស ទោះក្នុងតម្លៃណាក៏ដោយ ព្រោះថាមានសុខសន្តិភាពទើបមានការអភិវឌ្ឍ មានការរីកចម្រើន មានសុខសន្តិភាព ស្ថេរភាពសង្គម ទើបប្រជាជនយើងអាចរស់នៅជុំគ្រួសារដោយកក់ក្តៅ មានសិទ្ធសេរីភាពពេញលេញ។ ហេតុនេះ យើងទាំងអស់គ្នាត្រូវបន្តគាំទ្រសម្តេចតេជោ ប្រធានគណបក្សប្រជាជនកម្ពុជា ត្រូវបន្តគាំទ្រគណបក្សប្រជាជនកម្ពុជា ត្រូវបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨ ទាំងអស់គ្នា នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។

មុននឹងបញ្ចប់ ឯកឧត្តម វេង សាខុន ក៏បានអរគុណ កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង និងការលះបង់ទាំងកម្លាំងកាយចិត្ត និងថវិកាផ្ទាល់ខ្លួនរបស់ក្រុមការងារគណបក្សទាំងអស់ដែលបានចុះជួយរំលែកទុក្ខលំបាករបស់ប្រជាពលរដ្ឋទូទាំងស្រុក​កំពង់សៀម ខេត្តកំពង់ចាម។ ឯកឧត្តមសង្ឃឹម និងជឿជាក់ថាក្រុមការងារនឹងបន្តសកម្មភាពដ៏សកម្មនេះ ដើម្បីប្រជាពលរដ្ឋយើង ៕