ប្រធានសហព័ន្ធជនពិការអាស៊ាន៖ យើងបែកគ្នាពិតមែន ប៉ុន្តែប្រជាជនកម្ពុជាបង្កប់មនោសញ្ចេតនាមិត្តភាពដ៏ជ្រាលជៅ ក្នុងបេះដូងយើងគ្រប់ៗគ្នា
ភ្នំពេញ៖ ឯកឧត្តម OSOTH BHAVILAI ប្រធានសហព័ន្ធ កីឡាជនពិការអាស៊ានបានលើកឡើងថា «រាត្រីនេះ យើងត្រូវបែកគ្នាក៏ពិតមែន ប៉ុន្តែប្រទេស កម្ពុជា និងប្រជាជនកម្ពុជាប្រកបដោយមនោសញ្ចេតនាមិត្តភាពដ៏ជ្រាលជ្រៅ ដោយអ្វីៗទាំង អស់នេះបានបង្កប់នៅក្នុងបេះដូងរបស់យើងគ្រប់ៗគ្នា»។
នៅក្នុងឱកាសចុងក្រោយ នៃពិធីបិទការប្រកួតកីឡាជនពិការអាស៊ានលើកទី១២ នៅពហុកីឡដ្ឋានជាតិមរតកតេជោ រាជ ធានីភ្នំពេញ កាលពីយប់ថ្ងៃសុក្រ ទី៩ ខែមិថុនា ឆ្នាំ២០២៣ ក្រោមវត្តមានដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ឯកឧត្តម OSOTH BHAVILAI គូសបញ្ជាក់ថា «រាត្រីដ៏ត្រកាលនេះ យើងសូមអបអរសាទ នៃ ការបញ្ចប់ដំណើរការកម្មវិធីប្រកួតកីឡាអាស៊ានប៉ារ៉ាហ្គេមដ៏អស្ចារ្យ។ នាទីនេះ យើងក៏បាន ឈានដល់ពេលវេលាត្រូវជម្រាបលាគ្នាពីព្រឹត្តិការណ៍ប្រកួតកីឡាជនពិការអាស៊ានប៉ារ៉ាហ្គេម លើកទី១២ ឆ្នាំ២០២៣ ផងដែរ។ ឆ្លងកាត់មួយសប្ដាហ៍កន្លងមកនេះ យើងបានឃើញយ៉ាង ច្បាស់នូវទិដ្ឋភាពដ៏អស្ចារ្យនៃការជំរុញលើកទឹកចិត្តដ៏កក់ក្ដៅដល់អត្តពលិកជនពិការ។ ក្នុងនាមម្ចាស់ផ្ទះ កម្ពុជាបានរៀបចំ និងបង្ហាញសមត្ថភាពពិតប្រាកដឈានទៅទទួលបាន ជោគជ័យដ៏ត្រចះត្រចង់ បើទោះបីកម្ពុជាទើបរៀបចំការប្រកួតកីឡាអាស៊ានប៉ារ៉ាហ្គេម លើក ទី១ ក៏ដោយសូមអបអរសាទរ»។
ក្នុងនាមសហព័ន្ធកីឡាជនពិការអាស៊ាន ឯកឧត្តម OSOTH BHAVILAI បានបង្ហាញនូវការ ថ្លែងអំណរគុណដល់រាជរដ្ឋាភិបាលនៃព្រះរាជាណាចក្រកម្ពុជា, គណៈកម្មាធិការជាតិរៀបចំ អាស៊ានប៉ារ៉ាហ្គេម (CAMAPGOC), សមាជិកប្រតិបត្តិក្រុមប្រឹក្សាប្រតិបត្តិ, មន្ត្រីបច្ចេកទេស ជា តិ-អន្តរជាតិ សហព័ន្ធកីឡា ដែលបង្កើតភាពជោគជ័យ និងអនុស្សាវរីយ៍ដ៏ជ្រាលជ្រៅ ពុំអាចបំ ភ្លេចបានក្នុងព្រឹត្តិការណ៍នេះ។
ឯកឧត្តមបន្ថែមថា «បន្ថែមពីលើនេះ ខ្ញុំសូមថ្លែងអំណរគុណជូនចំពោះអត្តពលិកជនពិការទាំងអស់។ ខ្ញុំសូមអប អរសាទរយ៉ាងកក់ក្ដៅ និងសូមប្រកាសថា អ្នកគឺជាអ្នកឈ្នះទាំងអស់គ្នាពិតប្រាកដ។ សូមថ្លែងអំណរគុណជូនចំពោះអ្នកស្ម័គ្រចិត្ត គឺអ្នកដែលបាននាំមកនូវក្តីសោមនស្សរីករាយ នាំមកនូវភាពកក់ក្តៅ និងមិត្តភាពដ៏ជ្រាលជ្រៅបំផុត។ សូមថ្លែងអំណរគុណចំពោះអ្នកគាំទ្រ និងប្រជាជនកម្ពុជា គឺដោយសារការគាំទ្ររបស់អ្នកបានជំរុញកម្លាំងថាមពល ឆ្ពោះទៅរកភាពជោគជ័យដល់ក្រុមអត្តពលិកមានពិការភាព តាមរយៈសកម្មភាពប្រកួតកីឡា នាពេលនេះ»។
ដោយបានចូលរួមអបអរសាទរ ប្រទេសឥណ្ឌូណេស៊ី ដែលបានស្ថិតនៅលើចំណាត់ថ្នាក់ខ្ពស់ជាងគេ ឯកឧត្តមប្រធានសហព័ន្ធកីឡាជនពិការអាស៊ានរូបនេះក៏បានថ្លែងអំណរគុណជាថ្មីម្តងទៀត ដល់កម្ពុជា ដែលធ្វើឱ្យយើងចងចាំមិនអាចបំភ្លេចបាននូវការផ្ដល់ភាពភ្ញាក់ផ្អើលដ៏អស្ចារ្យនេះ។ «ជាទីបញ្ចប់ នារាត្រីដ៏ត្រកាលនេះ យើងខ្ញុំសូមជម្រាបលាកម្ពុជា ប៉ុន្តែក្នុងរយៈពេល៣០ខែទៀត យើងនឹងជួបគ្នា រឹតចំណងមិត្តភាពគ្នាម្ដងទៀតនៅ KORAT ព្រះរាជាណាចក្រថៃ ក្នុងការប្រកួតកីឡាជនពិការអាស៊ាន លើកទី១៣ ពីថ្ងៃទី២០-២៦ ខែមករា ឆ្នាំ២០២៦ខាងមុខ៕
