មន្ត្រីក្រសួងបរិស្ថាន ចូលរួមសមាជអេកូឡូស៊ីអន្តរជាតិលើកទី១០ (X Nevsky International Ecological Congress) ចាប់ពីថ្ងៃទី២៥-២៦ ខែឧសភា នៅទីក្រុង Saint Petersburg នៃសហព័ន្ធរុស្សី

ភ្នំពេញ៖ ក្រុមការងារក្រសួងបរិស្ថានដឹកនាំដោយឯកឧត្តម ដាញ់ សេរី អគ្គនាយកនៃអគ្គនាយកដ្ឋានគាំពារបរិស្ថាន និងទទួលបន្ទុកជាប្រធាននាយកដ្ឋាន EIA ឯកឧត្តម ប្រាក់ ថាវអមិដា អគ្គនាយករងនៃអគ្គនាយកដ្ឋានគោលនយោបាយ និងយុទ្ធសាស្ត្រ ឯកឧត្តមអគ្គរាជទូតព្រះរាជាណាចក្រកម្ពុជាប្រចាំសហព័ន្ធរុស្សី និងក្រុមការងារបានចូលរួមសមាជអេកូឡូស៊ីអន្តរជាតិលើកទី១០ (X Nevsky International Ecological Congress) ចាប់ពីថ្ងៃទី២៥-២៦ ខែឧសភា ឆ្នាំ២០២៣ នៅទីក្រុង Saint Petersburg នៃសហព័ន្ធរុស្សី។

សមាជមានការចូលរួមពីសំណាក់ប្រទេសជាសមាជិកអាស៊ានដូចជា កម្ពុជា មីយ៉ាម៉ា ឥណ្ឌូនេស៊ី ថៃ និងវៀតណាមតំណាងប្រទេសមកពីទ្វីបអាស៊ីកណ្តាល តំណាងប្រទេសមកពីទ្វីបអាហ្វ្រិក តំណាងប្រទេសចិន តំណាងអង្គការជាតិ-អន្តរជាតិ និងអង្គការសហប្រជាតិ (UNEP)។

អង្គសមាជបានពិនិត្យ និងពិភាក្សាលើប្រធានបទសំខាន់ៗ រួមមានបញ្ហប្រឈមថ្មីៗ នៃការប្រែប្រួលអាកាសធាតុ បរិវត្តកម្មឌីជីថលសម្រាប់វិស័យអេកូឡូស៊ី ធនធានទឹកសម្រាប់អនាគត អេកូ-ទេសចរណ៍ ទំនាក់ទំនងមនុស្ស និងផែនដី ការកំណត់យុទ្ធសាស្រ្ត និងជំរើសវិធានការនៃកិច្ចគាំពារបរិស្ថាន សេដ្ឋកិច្ចចក្រា ការអភិរក្សបរិស្ថាននៅតំបន់អាក់ទិច និងអង់តាក់ទិក ផលិតផលសរីរាង្គ (ការលើកកម្ពស់កិច្ចសហប្រតិបត្តិការ) និងតួនាទីព្រៃឈើក្នុងដំណើការធម្មជាតិ។

ជារួម សហព័ន្ធរុស្ស៊ីក៏បានស្នើសុំសមាជិកនៃអង្គសមាជពិនិត្យលទ្ធភាពនៃកិច្ចសហប្រតិបត្តិការ ដើម្បីលើកកម្ពស់កិច្ចខិតខំប្រឹងប្រែងរួមគ្នាលើវិធានការឆ្លើយតបការប្រែប្រួលអាកាសធាតុ កិច្ចគាំពារ និងអភិរក្សបរិស្ថានក្នុងតំបន់ និងសកល៕