ប្រជាពលរដ្ឋរងគ្រោះ និងរងផលប៉ះពាល់ដោយការបាក់ស្រុតផ្ទះតាមមាត់ច្រាំងព្រែកថី ទទួលបានអំណោយសង្គ្រោះបន្ទាន់

ភ្នំពេញ៖ ប្រជាពលរដ្ឋរងគ្រោះ និងរងផលប៉ះពាល់ដោយការបាក់ស្រុតផ្ទះតាមមាត់ច្រាំងព្រែកថី ចំនួន ៧៧គ្រួសារ នៅភូមិព្រែកថី និង ភូមិព្រែកសំរោង សង្កាត់រកាខ្ពស់ ក្រុងតាខ្មៅ បានទទួលអំណោយសង្គ្រោះបន្ទាន់ និងថវិកាពីសាខាកាកបាទក្រហមកម្ពុជាខេត្តកណ្ដាល នៅរសៀលថ្ងៃទី១៧ ខែមករា ឆ្នាំ២០២៣ ។

ឯកឧត្តម គង់ សោភ័ណ្ឌ អភិបាលខេត្តខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ព្រមទាំងសហការី មន្ត្រីរាជការ បានចុះសួរសុខទុក្ខ ចែកអំណោយជូនដល់គ្រួសាររងគ្រោះ និង គ្រួសាររងផលប៉ះពាល់ដោយការបាក់ស្រុតដី តាមច្រាំងព្រែកថី ដោយជំនន់ទឹកភ្លៀង សរុប ៧៧គ្រួសារ ស្ថិតក្នុងភូមិព្រែកសំរោង និងភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល។

ក្នុងឱកាសនោះឯកឧត្តម គង់ សោភ័ណ្ឌ បានថ្លែងនូវការសោកស្ដាយចំពោះការខូចខាតផ្ទះសម្បែង និងទ្រព្យសម្បត្តិរបស់បងប្អូនរងគ្រោះ ដែលនេះជាគ្រោះមហន្តរាយបង្កដោយធម្មជាតិ គ្មាននរណាម្នាក់ចង់ជួបប្រទះឡើយ ជាពិសេស លោកក៏បាននាំមកនូវផ្តាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា និន្នាការនយោបាយអ្វីឡើយ។

ឯកឧត្តមបានបន្តថា ថ្វីត្បិតតែអំណោយមនុស្សធម៌ ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី មិនសមល្មមនឹងទំហំនៃការខាតបង់ក៏ពិតមែន តែក៏អាចជួយសម្រាលទុក្ខបាករបស់បងប្អូនបានមួយកម្រិតផងដែរ ហើយនេះក៏ជាការបង្ហាញនូវការយកចិត្តទុកដាក់ ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជាដែលមានសម្ដេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ជាប្រធាន ពោលគឺទីណាមានទុកលំបាកទីនោះមានកាកបាទក្រហមកម្ពុជាចុះជួយ គ្រប់ទីកន្លែង គ្រប់ពេលវេលាក្នុងសកម្មភាពមនុស្សធម៌។

អំណោយមនុស្សធម៌ដែលបានចែកជូនក្នុង ១គ្រួសារទទួលបាន៖ អង្ករ ២៥ គីឡូក្រាម ,មី ១កេស ,ទឹកស៊ីអ៊ីវ ១យួរ ,ទឹកត្រី ១យួរ ,ត្រីខ ១យួរ ,ទឹកសុទ្ធ ១កេស ,ម៉ាស ១ដុំ ,អាវរងា ២ ,កៅស៊ូតង់ចំនួន១ និងថវិកាចំនួន ២០ម៉ឺនរៀល ៕