ភ្នំពេញ៖ ឯកឧត្តម ស៊ុំ ធី អគ្គនាយករងនៃអគ្គនាយកដ្ឋានគោលនយោបាយ និងយុទ្ធសាស្ត្រ តំណាងដ៏ខ្ពស់ខ្ពស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន កាលពីថ្ងៃទី៩ ខែវិច្ឆិកា ឆ្នាំ២០២២ បានចូលរួមជាវាគ្មិន នៅក្នុងព្រឹត្តិការណ៍អម COP27 ស្តីពីការលើកកម្ពស់មហិច្ឆតាសកម្មភាពឆ្លើយតបនឹងការប្រែប្រួលអាកាសធាតុ ដែលរៀបចំឡើងដោយ UNESCAP។
ឯកឧត្តមបានបញ្ជាក់ថា កម្ពុជាជាប្រទេសដែលរួមចំណែកតិចតួចបំផុតដល់ការប្រែប្រួលអាកាសធាតុ ដោយក្នុងរយៈពេល៣ទសវត្សរ៍ចុងក្រោយនេះ ប្រទេសកម្ពុជាបានបញ្ចេញឧស្ម័នផ្ទះកញ្ចក់សុទ្ធ តិចជាង០,៣% នៃការបញ្ចេញឧស្ម័នពិភពលោក។ ឯកឧត្តម ក៏បានបង្ហាញពី ផែនការរួមចំណែករបស់កម្ពុជាឆ្លើយតបនឹងការប្រែប្រួលអាកាសធាតុ (NDC) និងយុទ្ធសាស្ត្ររយៈពេលវែងសម្រាប់អព្យាក្រឹតភាពកាបូន។
ជាមួយគ្នានេះ ឯកឧត្តមបានបន្ថែមថា ការវិនិយោគលើថាមពលកកើតឡើងវិញ កំពុងកើនឡើងជាលំដាប់ ដែលជាផ្នែកមួយក្នុងការលើកកំពស់ភាពធន់ និងការកាត់បន្ថយឧស្ម័នផ្ទះកញ្ចក់នៅក្នុងវិស័យថាមពល។ កម្ពុជាក៏កំពុងយកចិត្តទុកដាក់ខ្ពស់ដល់លើតួនាទីព្រៃឈើក្នុងការឆ្លើយតបនឹងការប្រែប្រួលអាកាសធាតុ ដែលរួមមានការអនុវត្តគម្រោង REDD-Plus, ដំណោះស្រាយផ្អែកលើធម្មជាតិ និងការទូទាត់សម្រាប់សេវាកម្មប្រព័ន្ធអេកូឡូស៊ី។ កម្ពុជា ក៏កំពុងធ្វើការងារយ៉ាងសកម្មក្នុងការជំរុញការវិនិយោគបៃតង។
ឯកឧត្តមក៏បានសង្កត់ធ្ងន់ថា កម្ពុជាត្រៀមខ្លួនជាស្រេចក្នុងការពង្រីកកិច្ចសហប្រតិបត្តិការជាមួយដៃគូ និងវិស័យឯកជន ក្នុងការគៀគរហិរញ្ញប្បទានអាកាសធាតុ និងអនុវត្តផែនការឆ្លើយតបនឹងការប្រែប្រួលអាកាសធាតុ៕
