មេបញ្ជាការ បញ្ជាការដ្ឋានរថក្រោះ អញ្ជើញត្រួតពិនិត្យ ទីតាំងធ្វើឃ្លាំងជួសជុលយានដ្ឋាន អគារស្នាក់នៅកងទ័ព និងប្រព័ន្ធទឹកស្អាតក្នុងអង្គភាព

ភ្នំពេញ៖ ឯកឧត្តម ឧត្តមសេនីយ៍ឯក ពៅ ស៊ីថា មេបញ្ជាការរងកងទ័ពជើងគោក មេបញ្ជាការ បញ្ជាការដ្ឋានរថក្រោះ នៅព្រឹកថ្ងៃទី២១ ខែតុលា ឆ្នាំ២០២២ បានអញ្ជើញចុះត្រួតពិនិត្យទីតាំង សាងសង់ឃ្លាំងជួសជុលយានដ្ឋានថ្មី ដែរត្រូវបំពាក់នៅសម្ភារៈជួសជុលទំនើប ជាភាពងាយស្រួលក្នុងការជួសជុល ឯកឧត្តមបានបន្តដើរមើលទីតាំងសាងសង់អគារស្នាក់នៅកងទ័ព និងទីតាំងរៀបចំប្រព័ន្ធទឹកស្អាតក្នុងអង្គភាព សម្រាប់កងទ័ពប្រើប្រាស់មានផាសុខភាពជៀសផុតពីជំងឺផ្សេងៗបានបន្ថែមមួយកម្រិតទៀត ។

ឯកឧត្តម មេបញ្ជាការ បានជំរុញឲ្យគ្រប់បណ្តាអង្គភាពចំណុះ ឲ្យរៀបចំកម្លាំងបច្ចេកទេសយានដ្ឋាន និងកម្លាំងដឹកជញ្ជូន ថែទាំជូតសម្អាតរថក្រោះ រថពាសដែក និងរថយន្តសម្រាប់ដឹកជញ្ជូន ដែលជាការងារស្នូលដ៏ចាំបាច់ដែលមិនត្រូវអាក់ខានបានឡើយ ព្រោះដោយសារយុទ្ធភណ្ឌទាំងអស់នេះគឺជាចំណែកមួយនៃសសរទ្រូងរបស់ប្រទេសជាតិរបស់យើង។

លោកបន្តទៀតថា ការងារសាងសង់ក៏ជាចំណែកមួយនៃការអភិវឌ្ឍន៍ប្រទេសជាតិឲ្យរីកចម្រើន មានសោភ័ណភាព ដូច្នេះហើយទើបលោកខិតខំកសាងអង្គភាព ឲ្យមានភាពរីកចម្រើនដូចសព្វថ្ងៃនេះ ដើម្បីដើរទន្ទឹមស្របទៅនឹងការរីកចម្រើនរបស់ប្រទេសជាតិយើងផងដែរ។

លោកមេបញ្ជាការ បានផ្តាំផ្ញើដល់មេបញ្ជាការគ្រប់បណ្តាអង្គភាពចំណុះទាំងអស់ត្រូវតែខិតខំគោរពនូវផែនការណ៍របស់ថ្នាក់លើអោយបានដាច់ខាត និងពង្រឹងលើការកសាងអង្គភាពឲ្យមានភាពរីកចម្រើនផងដែរ។ ជាមួយគ្នានោះកុំភ្លេចឡើយនៅការប្រយ័ត្នខ្ពស់បំផុត ត្រូវគោរពតាមការណែនាំរបស់រាជរដ្ឋាភិបាល ៣ការពារ និង៣កុំ ព្រមទាំងអនុវត្តវិធានការផ្សេងៗដែលដាក់ចេញដោយក្រសួងសុខាភិបាលឲ្យបានជាប់ជានិច្ច ៕