ឯកឧត្តម អ៊ូច ភា បានអញ្ជើញចុះពិនិត្យទីតាំង ប្រារព្ធពិធីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅអាងស្តុកទឹកទន្លេបាទី

ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ អមដំណើរដោយ លោក ខាន់ សុខា អភិបាលរងខេត្ត និងលោក ភួន ឈីម អភិបាលស្រុកបាទី និងសហការី ប្រធានមន្ទីរ អង្គភាពជុំវិញខេត្ត អាជ្ញាធរដែនដី នាព្រឹកថ្ងៃសៅរ៍ ទី០៨ ខែតុលា ឆ្នាំ២០២២ បានអញ្ជើញចុះពិនិត្យទីតាំង ប្រារព្ធពិធីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅអាងស្តុកទឹកទន្លេបាទី ស្ថិតនៅឃុំក្រាំងធ្នង់ ស្រុកបាទី ខេត្តតាកែវ ដែលមានរយៈពេល ៣ថ្ងៃ នាពេលឆាប់ៗខាងមុខនេះ។

គួរម្លឹកផងដែរថា អំឡុងឆ្នាំ២០២០ អាងស្ដុកទឹកទន្លេរបាទី ក៏ធ្លាប់រៀបចំការ ប្រឡងប្រណាំងទូកកាណូ ទូកនាគ និងទូកអ៊ីរ៉ង់ ដណ្ដើមពានរង្វាន់សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ផងដែរ។

សូមជម្រាបជូនដែរថា ទន្លេបាទី ជាគោលដៅទេសចរណ៍បែប វប្បធម៌ ប្រវត្តិសាស្ដ្រ ធម្មជាតិដែលមហាជនទូទៅអាចចាត់ទុកថាជាកន្លែងដែលមានសកម្មភាពទេសចរណ៍ចម្រុះ មានតំបន់ប្រាសាទ វត្តអារាម បឹងធម្មជាតិ អាហារដ្ឋាន និងមានសកម្មភាពទេសចរណ៍មួយចំនួនទៀតដែលទាក់ទាញចំណាប់អារម្មណ៍អ្នកទេសចរដ៏ច្រើនកុះករមកទស្សនាជារៀងរាល់រដូវកាល ជាពិសេសថ្ងៃឈប់សម្រាក។ អ្នកទេសចរអាចសម្រាកលំហែកាយតាមម្លប់ខ្យុះលើទឹក ទស្សនាកំសាន្តតាមផ្ទៃទឹកបឹងធម្មជាតិ ដោយជិះទូក ឬឧបករណ៍ផ្សេងៗដែលអាចបម្រើដល់ភ្ញៀវទេសចរផងដែរ។ ជាមួយគ្នានេះដែរ ភ្ញៀវទេសចរជាតិ និងអន្តរជាតិ អាចដើរទស្សនា នៅតាមប្រាង្គប្រាសាទបុរាណ ( ប្រាសាទយាយពៅ និងប្រាសាទតាព្រហ្ម) ៕