ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងជាថ្មីថា កម្ពុជាប្រឆាំងនឹងការបង្កើតរដ្ឋ ការផ្ដាច់រដ្ឋ ផ្ដាច់ទឹកដី ការប្រើប្រាស់កម្លាំង ដោយប្រឆាំងជាមួយការប្រើប្រាស់កម្លាំង ឬគម្រាមប្រើប្រាស់ កម្លាំងជាមួយប្រទេសដទៃ។
សម្ដេចបានមានប្រសាសន៍បែបនេះ នៅក្នុងពិធីសំណេះសំណាលជាមួយបងប្អូនប្រជាពលរដ្ឋ ដែលស្ម័គ្រចិត្តផ្លាស់ទីពីតំបន់១ និងតំបន់២ នៃរមណីយដ្ឋានអង្គរ មករស់នៅតំបន់អភិវឌ្ឍន៍ ភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប នាព្រឹកថ្ងៃទី១ ខែតុលា ឆ្នាំ២០២២។
សម្ដេចតេជោ ហ៊ុន សែន មានប្រសាសន៍ថា ក្រសួងការបរទេស បានស្នើសុំយោបល់មកសម្ដេច ពាក់ព័ន្ធនឹងបញ្ហាធ្វើប្រជាមាតិ កាត់យកទឹកដី ប្រទេសអ៊ុយក្រែនបញ្ចូលទៅឱ្យប្រទេសរុស្ស៊ី ថាតើកម្ពុជាមានជំហរយ៉ាងណានោះ។
សម្ដេចបញ្ជាក់ថា “សម្ដេចធា្លប់បានប្រកាសហើយថា យើងអត់គាំទ្រទេ ហើយកម្ពុជាប្រឆាំងនឹង ការបង្កើតរដ្ឋ ការផ្ដាច់រដ្ឋ ផ្ដាច់ទឹកដី ការប្រើប្រាស់កម្លាំង ដោយប្រឆាំងជាមួយការប្រើប្រាស់កម្លាំង ឬគម្រាមប្រើប្រាស់ កម្លាំង។ ដូច្នេះគេអាចយល់បានហើយ ប្រសិនបើសេចក្ដីសម្រេចដែលព្រាង ឡើងដោយសហរដ្ឋអាមេរិក និងអាល់បានី ដាក់ឆ្លងក្រុមប្រឹក្សាសន្តិសុខអង្គការសហប្រជាជាតិ មិនបានទេ ច្បាស់ជាទៅមហាសន្និបាត អង្គការសហប្រជាជាតិហើយ”។
សម្ដេចបញ្ជាក់ទៀតថា កម្ពុជាអត់មានជម្រើសណាផ្សេង ព្រោះថា យើងគិតទៅមើល បើនៅសុខ ៗគេលើកទ័ពមកដាក់នៅខេត្តសៀមរាបមួយ បន្ទាប់មកធ្វើប្រជាមាតិ ដើម្បីផ្ដាច់ខ្លួនថាខេត្តសៀមរាប ជារដ្ឋឯករាជ្យមួយ តើយើងទទួលបានដែរ ឬអត់ ពិតជាទទួលយកមិនបាននោះទេ។
សម្ដេចតេជោនាយករដ្ឋមន្ត្រីលើកឡើថា ករណីដូចគ្នាសូម្បីតែនៅអឺរ៉ុប ដូចជា កូសូវ៉ូ ដែលបង្កើត ឡើងដោយណាតូ និងខាងអឺរ៉ុប ក៏យើងមកដល់ម៉ោងនេះ ក៏យើងមិនទទួលស្គាល់ទេ។ នេះជាជំហរ ជាក់លាក់របស់កម្ពុជា៕
