ក្រុមប្រជាសហគមន៍តំបន់ការពារធម្មជាតិអូររៃ ស្ថិតក្នុងដែនជម្រកសត្វព្រៃលំផាត់ បង្ហាញពីការប្តេជ្ញាចិត្តក្នុងការចូលរួមការពារធនធានធម្មជាតិ
ភ្នំពេញ៖ ឯកឧត្តម នេត្រ ភក្រ្តា រដ្ឋលេខាធិការ និងជាមន្រ្តីនាំពាក្យក្រសួងបរិស្ថានបានឲ្យដឹងថា ក្រុមប្រជាសហគមន៍តំបន់ការពារធម្មជាតិអូររៃ ស្ថិតក្នុងដែនជម្រកសត្វព្រៃលំផាត់ ភូមិសាស្ត្រ ស្រុក កូនមុំ ខេត្តរតនគិរី បានបង្ហាញពីការប្តេជ្ញាចិត្តក្នុងការចូលរួមការពារធនធានធម្មជាតិក្នុងនេះដូចជាព្រៃឈើ និងសត្វព្រៃឱ្យគង់វង្សសម្រាប់ទុកដល់កូនចៅជំនាន់ក្រោយ។
គួរបញ្ជាក់ថា សហគមន៍តំបន់ការពារធម្មជាតិអូររៃ ស្ថិតក្នុងដែនជម្រកសត្វព្រៃលំផាត់ ភូមិសាស្ត្រស្រុកកូនមុំ ខេត្តរតនគិរី មានផ្ទៃទំហំផ្ទៃដី ២៦៨០ហិកតា មានករចូលរួមពីពលរដ្ឋ ៤ភូមិ មានចំនួន ៦៦៧គ្រួសារ ហើយបច្ចុប្បន្ននេះ បងប្អូនសហគមន៍អាចរកអនុផលព្រៃឈើមួយចំនួនរួមមានផ្សិតប៉ក់ ផ្សិតក្ងោក បន្លែបង្ការ ទំពាំង ទឹកឃ្មុំ។ ការបង្កើតសេដ្ឋកិច្ចមូលដ្ឋានគឺជាមូលដ្ឋានរឹងមាំសម្រាប់ការងារអភិរក្សធនធានធម្មជាតិ បន្ថែមពីលើវិធានការច្បាប់។
ក្នុងដំណើរចុះពិនិត្យកិច្ចការអភិរក្សតំបន់ការពារធម្មជាតិនៅក្នុងខេត្តរតននាថ្មីៗនេះ ឯកឧត្តម នេត្រ ភក្រ្តា រដ្ឋលេខាធិការ និងជាមន្រ្តីនាំពាក្យក្រសួងបរិស្ថានបានថ្លែងថា សហគមន៍តំបន់ការពារធម្មជាតិអូររៃគឺជាសហគមន៍តំបន់ការពារធម្មជាតិមួយក្នុងចំណោមសហគមន៍ទាំង១៩០នៅទូទាំងប្រទេស ហើយក៏ស្ថិតនៅក្នុងចំណោមសហគមន៍ទាំង១១នៅ ខេត្តរតនគិរី ដែរ ។ ចំពោះមូលហេតុដែលក្រសួងបរិស្ថានចាំបាច់បង្កើតតំបន់សហគមន៍ ការពារ ធម្មជាតិ គឺទី១ ផ្តល់នូវការទទួលខុសត្រូវ ក្នុងការចូលរួមរបស់សហគមន៍ក្នុងការការពារ និង អភិរក្សធនធានធម្មជាតិរបស់យើង។
ឯកឧត្តមមានប្រសាសន៍ថា ការចូលរួម និងការទទួលខុសត្រូវរបស់សហគមន៍ក្នុងកិច្ចការពារនិង អភិរក្សធនធានធម្មជាតិ ពិតជាមានសារៈសំខាន់ពីព្រោះថានឹងជួយផ្តល់នូវផលប្រយោជន៍ដល់សហគមន៍វិញ។
លោក ទុយ សុផាន់ សមាជិក សហគមន៍ តំបន់ការពារធម្មជាតិ អូររៃ បានឱ្យដឹងថា ពលរដ្ឋសហគមន៍ជាច្រើនបានយល់ដឹងពីការចូលរួមថែរក្សាការពារធនធានធម្មជាតិដើម្បីធានាបាននូវការផ្តត់ផ្គង់ធនធានធម្មជាតិដល់សហគមន៍មូលដ្ឋានក្នុងការប្រើប្រាស់ឱ្យមាននិរន្តភាពទាំងពេលបច្ចុប្បន្ននិងសម្រាប់កូនចៅជំនាន់ក្រោយ។ក្រៅពីនេះក៏ចូលរួមធ្វើឱ្យប្រសើរឡើងនូវធនធានធម្មជាតិ ក្នុងតំបន់ដើម្បីរក្សាបាននូវលំនឹងធម្មជាតិ។
លោក សា ក្រឹង ប្រជាសហគមន៍តំបន់ការពារធម្មជាតិអូររៃ បានឱ្យដឹងថា ការចុះល្បាតការពារព្រៃឈើ និងសត្វព្រៃ ត្រូវបានប្រជាសហគមន៍ចូលរួមយ៉ាងសកម្ម ហើយតាមរយៈការចូលរួមពីសហគមន៍ក៏ដូចជាអាជ្ញាធរមូលដ្ឋានឃើញថាសត្វព្រៃបើទោះបីមានការបាត់បង់ខ្លះក្តី ក៏តំបន់មួយនេះនៅសល់សត្វព្រៃមួយចំនួនផងដែរ។ តាមរយៈការអប់រំផ្សព្វផ្សាយឱ្យពលរដ្ឋសហគមន៍ចេះស្រឡាញ់សត្វព្រៃនិងចូលរួមអភិរក្សនេះឃើញថា បច្ចុប្បន្នបានធ្វើឱ្យពលរដ្ឋកាន់តែច្រើនបានយល់ដឹងច្បាស់លាស់ ហើយអ្នកដែលធ្លាប់តែដាក់អន្ទាក់សត្វព្រៃក៏បញ្ឈប់សកម្មភាព ហើយ ងាកមកប្រកបរបរផ្សេងវិញ។
ទាក់ទិនក្នុងរឿងនេះដែរ លោក សឿង ខេមរៈ ប្រធានការិយាល័យ ដែនជម្រកសត្វព្រៃលំផាត់ ភូមិសាស្ត្រ ស្រុក កូនមុំ ខេត្ត រតនគិរី បានឱ្យដឹងថាបើប្រៀបធៀបកាលពីមុនមកបទល្មើសមានការថយចុះខ្លាំង តែយ៉ាងណាក៏មិនអស់ទាំងស្រុងនោះដែរដូចជាបទល្មើសព្រៃឈើ បទល្មើសសត្វព្រៃនៅឃើញកើតមានខ្លះៗនៅឡើយ។សម្រាប់បទល្មើសមួយទៀតដែលត្រូវបានទប់ស្កាត់និងកំពុងកើតមានច្រើនដែរគឺបទល្មើសទន្រ្ទានដីព្រៃ ។ក្រៅពីនេះដូចជាបទល្មើសដាក់អន្ទាក់ឃើញថាក៏ធ្លាក់ចុះច្រើនដូចគ្នា។
គួរបញ្ជាក់ថាសហគមន៍តំបន់ការពារធម្មជាតិអូររៃមានផ្ទៃទំហំផ្ទៃដី ២៦៨០ ហិកតា មានការ ចូលរួមពីពលរដ្ឋ ៤ ភូមិមានចំនួន ៦៦៧ គ្រួសារ ។ប្រជាសហគមន៍មួយនេះ ក្រៅពីប្រកបរបរ កសិកម្ម ការប្រកបរបរបន្ទាប់បន្សំក្នុងស្រុកភូមិ និងក្រៅពីនេះបងប្អូនសហគមន៍អាចរកអនុផលព្រៃឈើមួយចំនួនរួមមានផ្សិតប៉ក់ ផ្សិតក្ងោក បន្លែបង្ការ ទំពាំង ទឹកឃ្មុំសម្រាប់ផ្គត់ផ្គង់ជីវភាពផងដែរ៕
