ភ្នំពេញ៖ ចាប់ពីថ្ងៃទី២៩ ដល់ថ្ងៃទី៣០ ខែឧសភា ឆ្នាំ២០២៦ គណៈប្រតិភូចិនដឹកនាំដោយ លោក Xu Yunguo លេខាបក្សសាលាបណ្តុះបណ្តាលវិជ្ជាជីវៈ និងបច្ចេកទេស ឡាយអ៊ូ នៃខេត្តសានដុង បានអញ្ជើញមកបំពេញទស្សនកិច្ចសិក្សានៅកម្ពុជា ដើម្បីឈ្វេងយល់ពីការបណ្តុះបណ្តាលជំនាញវប្បធម៌ និងការអភិរក្សបេតិកភណ្ឌជាតិ។
គណៈប្រតិភូចិនបានជួបពិភាក្សាជាមួយ ឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ ដើម្បីបង្ហាញឆន្ទៈរួមគ្នាក្នុងការពង្រឹងកិច្ចសហប្រតិបត្តិការអភិវឌ្ឍធនធានមនុស្ស។ សកម្មភាពនេះទទួលបានការគាំទ្រយ៉ាងពេញទំហឹងពី លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌។
លោក សាន ផល្លា សាកលវិទ្យាធិការរង បានណែនាំពីជំនាញសំខាន់ៗទាំង៥ របស់សាកលវិទ្យាល័យ និងបាននាំគណៈប្រតិភូទស្សនាស្នាដៃស្រាវជ្រាវរបស់និស្សិត។
គណៈប្រតិភូបានឈ្វេងយល់ពីសកម្មភាពរោងជាងទាំង៥ របស់សារមន្ទីរជាតិ ក្នុងការជួសជុល និងថែរក្សាសមុច្ច័យបុរាណ ដែលបទបង្ហាញនេះធ្វើឡើងដោយ លោកស្រី ចាប សុធារ៉ា អនុប្រធាននាយកដ្ឋានសារមន្ទីរជាតិ។
លោក ហេង កំសាន្ត នាយកសាលា បានបង្ហាញពីដំណើរការបណ្តុះបណ្តាលសិស្សលើជំនាញសិល្បៈវប្បធម៌ ដើម្បីសាងគ្រឹះនៃការអភិរក្សអត្តសញ្ញាណជាតិ មុននឹងពួកគេបន្តទៅថ្នាក់ឧត្តមសិក្សា។
មូលដ្ឋានគ្រឹះនៃធនធានមនុស្ស និងការអភិរក្សរបស់កម្ពុជាស្ថាប័នអប់រំ និងអភិរក្សរបស់កម្ពុជាបានបង្ហាញពីតថភាពនៃការបណ្តុះបណ្តាល និងខ្សែសង្វាក់ការងារដូចខាងក្រោម៖ស្ថាប័នតួនាទី និងជំនាញសំខាន់ៗសាលាជាតិវិចិត្រសិល្បៈបណ្តុះបណ្តាលជំនាញបឋម ផ្ទេរចំណេះដឹង និងសាងគ្រឹះដើម្បីបន្តមរតកសិល្បៈខ្មែរដល់យុវជន។សាកលវិទ្យាល័យភូមិន្ទវិចិត្រសិល្បៈផលិតធនធានមនុស្សកម្រិតខ្ពស់លើ ជំនាញសំខាន់ៗចំនួន ៥ រួមមាន៖ សិល្បៈ, វប្បធម៌, ស្ថាបត្យកម្ម, បុរាណវិទ្យា, និងការអភិរក្សបេតិកភណ្ឌ។សារមន្ទីរជាតិមាន រោងជាងចំនួន ៥ សម្រាប់បំពេញការងារបច្ចេកទេស ជួសជុល ថែរក្សាវត្ថុបុរាណ ដោយប្រើប្រាស់មូលធនមនុស្សដែលបញ្ចប់ការសិក្សាពីសាកលវិទ្យាល័យភូមិន្ទវិចិត្រសិល្បៈ។
លោកបណ្ឌិតជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជាចិនបានឱ្យដឹងថា ដំណើរទស្សនកិច្ចនេះ បានឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់កម្ពុជា (តាមរយៈកិច្ចសហការរវាង សាលាជាតិវិចិត្រសិល្បៈ សាកលវិទ្យាល័យភូមិន្ទវិចិត្រសិល្បៈ សារមន្ទីរជាតិ និងអាជ្ញាធរអប្សរា) ក្នុងការកសាងមូលធនមនុស្ស និងអភិរក្សបេតិកភណ្ឌជាតិប្រកបដោយចីរភាព។ ជាមួយគ្នានេះ វាក៏ជាការបើកទ្វារពង្រឹងចំណងមិត្តភាព ផ្លាស់ប្តូរបទពិសោធន៍ និងពង្រីកកិច្ចសហប្រតិបត្តិការអប់រំ-វប្បធម៌រវាងកម្ពុជា និងចិនឱ្យកាន់តែរឹងមាំបន្ថែមទៀត៕
